كل ما تريد معرفته عن هندسة القاهرة مواد اعدادي والاقسام

معلومات عن هندسة القاهرة

من انهاردة أن شاءالله هنبدأ نكلم عن اعدادي هندسه ف الكليات والمعاهد الهندسيه من حيث نظام الدراسه المواد والدرجات والأقسام والمذاكرة والنصائح اللي هتحتاجوها

أولاً: مرحباً بيكم في هندسه القاهره وهي الأعلي تصنيفا في الشرق الأوسط وأفريقيا.

ثانيا: في هذا البوست التعريفي هنتكلم عن هندسه القاهره والسنه الأعداديه ونظام الفصلين mainstream ونظام الكريديت CREADlT HOURS وأقسام كريديت وأقسام نظام الفصلين والفرق بين نظام كريديت ونظام الفصلين والمواد وإزاي نتعامل مع الدكاتره ومع السنه اعداديه بالخصوص ونصائح عامه لطلاب الثانويه العامه والفنى بصفه خاصه وازاي الدكاتره اتعاملت معانا فى ظل جائحه كورنا .

ثالثاً: السنه الأعداديه تعتبر سنه عامه وهى من أتقل سنين الكليه لانك بتدرس مواد عامه زى الرياضه والفيزياء والكيمياء عكس التخصص وغير كده وتعتبر السنه الأعداديه سنه حاسمه فى دخولك القسم فلازم تجتهد فيها علشان تدخل القسم اللي انت عاوزه.

لائحه الكليه النظام اتغير كتير فى إعدادى هندسه القاهره من اول سنه 2018علشان غيروا اللايحه الدراسيه وأهم التغيرات بالنسبالك هى:-

الرياضه بتاعت الترم الأول بقت منفصله عن الرياضه بتاعت الترم الثانى يعنى كل ماده من دول مستقله تماما عن التانيه يعنى مبيتجمعش درجاتهم علي بعض فى الآخر ونفس الكلام بالنسبة الفيزياء.
تم تغير نظام التنسيق الاقسام يعني في الاول كانو بيشفوا مجموعك كام وعلى اساسه بتدخل القسم بس دلوقتي فى حاجه اسمها المجموع الاعتبارى ان هما يضيفوا ١٥٠درجه على مجموعك عن طريق حاجه اسمها المواد المؤهله للقسم وهتعرف تفاصيل عن التنسيق لما تدخل الدراسه إن شاء الله.
تم إلغاء ماده الهندسه الوصفيه.
الدفعه بتنقسم جروبين وبيبقى فيه مواد مشتركه مابين الجروبين ومواد مختلفه والترم الثاني بيبدلوا مع بعض.
كل الدراسه باللغه الانجليزيه يعنى لازم تقوي نفسك في الانجلش وغالباً عندنا انجلش فى هندسه مصطلحات هندسيه يعنى سهله إن شاء الله ولكن اللغه دى هتفيديك فى شغلك بعد كدا.

أقسام هندسة القاهرة

رابعاً: هتكلم في النقطه دى عن نظام الفصلين mainstream

نظام الفصلين هو نظام عام بمصاريف كانت السنه دى حوالى 1300جنيه وده للناس اللي بيتم ترشيحهم من مكتب التنسيق إلى كليه هندسه جامعه القاهره.

أقسام نظام الفصلين mainstream وهم عباره عن 12 قسم عام وكل قسم ليه كود معين واذكر أسماءهم وإن شاء الله هتعرف بشئ من التفصيل عن كل قسم وطبيعه العمل فى كل قسم بعد السنه الاعداديه إن شاء الله في جروبات تعريف الاقسام.

(١)cmp هندسه الحاسبات.
(٢)ELC هندسه الألكترونيات والإتصالات الكهربيه.
(٣)EPM هندسه القوى والآلات الكهربيه.
(٤)SPE الهندسه الحيويه والمنظمات.
(٥)ARC الهندسه المعماريه.
(٦) AER هندسه الطيران وعلوم الفضاء.
(٧)MEC الهندسه الميكانيكيه.
(٨)CVE الهندسه المدنيه.
(٩)CHE الهندسه الكيميائيه.
(١٠)PET هندسه البترول.
(١١)MET هندسه فلزات.
(12)MIN هندسه المناجم.

برامج كريدت هندسة القاهرة

خامساً: هتكلم فى النقطه دى عن نظام الساعات المعتمده CREDIT HOURS وده نظام خاص وبيبقي للطالب الذى تم ترشيحه لأي جامعه حكوميه بحد أدنى هندسه حكوميه وحلمو يدخل هندسه القاهره فبيدخل كريديت والمصاريف حوالى 60الف جنيه مصري وعلى حسب الساعه بتبقى بكام وهتعرف ده لما تدخل الكليه إن شاء الله .

أقسام نظام كريديت CREDIT HOURS وهم عباره عن ١٥ برنامج خاص وكل برنامج ليه كود خاص وأذكر أسمائهم وإن شاء الله هتعرف عنهم بشئ من التفصيل عن كل برنامج بعد السنه الاعداديه عن طريق جروبات تعريف الاقسام.

(١)CCE هندسه الاتصالات والحاسبات.
(٢)MDE هندسه التصميم الميكانيكي.
(٣)AET هندسه وتكنولوجيا العماره.
(٤)MEE هندسه ميكاترونكس.
(٥)WEE هندسه المياه والبيئة.
(٦)STE هندسه الأنشاءات.
(٧)HEM هندسه وإدارة الرعايه الصحيه.
(٨)PPC هندسه البترول والبتروكيماويات.
(٩)AEM هندسه وإدارة الطيران.
(١٠)SEE هندسه الطاقه المستدامة.
(١١)CEM هندسه وإدارة النشيد.
(١٢)CIE هندسه البنيه التحيه.
(١٣)IEM هندسه وإدارة الصناعه.
(١٤)MEM هندسه التصنيع والمواد.
(15)EEE هندسه الطاقه الكهربيه.

الفرق بين نظام الفصلين mainstream ونظام الساعات المعتمده CREDIT HOURS

سادسا: فى هذه النقطه هتكلم عن الفرق بين نظام الفصلين mainstream ونظام الساعات المعتمده CREDIT HOURS
• نظام الفصلين هو عبارة عن نظام عام بمصاريف كانت السنه دى حوالى 1300جنيه مصرى ويتم نظام الدراسه 6مواد ترم أول و6مواد ترم ثاني ويحق للطالب يطلع الصف الاعلي بحد أقصى يكون شايل مادتين وممكن يخشهم سمر كورس فى شهر سبتمبر أو يمتحن المادتين مع الدفعه الجديده وده من غير أى مصاريف خالص وبتاحسب بتقديرات عاديه مش GPAعلى عكس نظام الساعات المعتمده واليكم تقديرات نظام فصلين بالرموز
التقديرات :-

إمتياز والرمز م.
جيد جدا والرمز جج
جيد والرمز ج.
مقبول والرمز ل.
ضيعيف (راسب) والرمز ض.

نظام الساعات المعتمده CREDIT HOURS وهو عبارة عن نظام خاص بمصاريف سنويه قد تصل إلى 60الف جنيه مصري وبيتم فيه دراسه المواد كما بنظام الفصلين ويحق للطالب دخول السمر كورس فى المواد وفيه نظام التحسين فى بعض المواد لدخول برنامج معين .

مميزات نظام الساعات المعتمده أيضاً

عدد طلبه قليل
نفس الشهاده وقوة الاعتماد
نظام كريديت يعمل علي دراسه مهارات التفكير
بيتعامل بنظام الGPAوهنعرف ازاي نظام الGPA

التقديرات بنظام الGPA

النسبه المئويه من 90%-١٠٠ %عدد النقاط ٤.٠التقدير ممتاز (أ)والرمز A+
النسبه المئويه من 85%-أقل من 90%عدد النقاط 3.5التقدير ممتاز(ب) والرمز A-
النسبه المئويه من ٨0%-أقل من 85%عدد النقاط 3.0 التقدير جيد جدا (أ) والرمز B
النسبه المئويه من 75-أقل من 80% عدد النقاط 2.5التقديرجيد جدا (ب)والرمزB-
النسبه المئويه من 70-أقل من 75% عدد النقاط 2.0التقدير جيد(أ) والرمز C
النسبه المئويه من ٦٥-أقل من ٧0%عدد النقاط ١.٦التقدير جيد(ب) والرمز C-
النسبه المئويه من 60%-أقل من 65%عدد النقاط 1.3التقدير مقبول (أ) والرمز D
النسبه المئويه من 50%-أقل من 60%عدد النقاط 1.0التقدير مقبول (ب)والرمز D-
النسبه المئويه أقل من 50%عدد النقاط أقل من 1.0التقدير راسب والرمز F

مواد اعدادي هندسة القاهرة

سابعاً: هتكلم فى هذه النقطه عن المواد ودرجات كل ماده والماده ليها رمز معين في اللايحه الجديده

بيتم تقسيم الدفعه اللي عددها ٢٥٠٠طالب إلى ٦جروبات والجروب الواحد فيه ٦ساكشن وبيبقى فيه ٣مواد مشتركه لأول ٣جروبات وهما الإنتاج والكمياء والتطبيقات الهندسيه وحروب ٤و٥و٦بيدرسوا ٣مواد مشتركه وهم الرسم الهندسي والحاسبات والتفكبر النقدي وبيبدلو مع بعض الترم الثاني وأعدادي فيها ١٢ماده أساسية وماده تفكير نقدي ودي ماده نجاح وسقوط ومش داخله في التقدير وإن شاء الله فى هذه النقطه هنتكلم عن كل ماده بالتفصيل وتقسيم درجاتها إن شاء الله.

(١) ماده رياضه ١والكود هو MTH0001

مايعرف برياضه ١ودي ماده عليها ١٥٠درجه منهم ٩٠فاينل و٦٠درجه أعمال سنه وأعمال السنه منهم ٤٠ميدترم و٥غياب وحضور فى الساكشن و١٥كويزات.
وتنقسم ماده رياضه ١إلي فرعين جبر وتفاضل

الجبر وهتاخد فيه حوالي 11درس حل المعادلات الخطيه والمصفوفات وخصائص المصفوفات وعناصر المصفوفة ومقلوب المصفوفه والمحدادت ونظريه المعادلات والدوال كثيرات الحدود والكسور الجزئيه والاستنتاج الرياضى.

التفاضل وهتدرس فيهم حوالى 9دروس مختلفه منهم المجال والمدي وتماثل الدوال والنهايات والاشتقاق وقاعده لوبيتال وسلسله مايكلورن وغيرهم من الدروس.

ماده رياضه فيها شبه كبير بينها وبين الثانويه العامه ودي ماده مش أقول إنها سهله وهى محتاجه تركيز ومتابعه اول باول .
دكاتره ماده الجبر وهم دكتور إيناس ودكتور أحمد عبدالنبى .
معيدين ماده الجبر م.باسم وم.أحمد إمام وغيرهم.
دكاتره ماده التفاضل وهم دكتور ممدوح ودكتور فياض ودكتوره ساره.
معيدين ماده التفاضل نفس معيدين ماده الجبر.

(2) ماده الاستاتيكا والكود هو MEC0001

مايعرف بماده الاستاتيكا ودى ماده عليها 100درجه منهم 60درجه فاينل و40أعمال سنه بتنقسم إلى 20ميدترم وخمسه غياب وحضور السكشين و15كويزات وهتدرس فى هذه الماده حوالى 10شيتات منهم المتجه فى الفراغ والضرب القياسى والاتجاهى والعزوم والاذدواج والقوه والاتزان ومركز الكتل وعزم القصور الذاتي .

-ملحوظه الامتحان فى هذه الماده دى mcQ (إختيارات ) هيدوك مسائل تحلها ورقه فيها اختيارات واختار منها الناتج علطول ومبيبصوش لخطوات الحل علشان الكمبيوتر هو اللي بيصححها لوغلطت فى إختيار المفروض تنقص درجه لا عندنا في نظام الMCQ فى الاستاتيكا هتنقص درجه وربع.

يعني لازم تركز فى الامتحان عارف تختار الآجابه اختارها مش عارف سيب النقطه فاضيه أفضل لإن بتنقص ربع درجه فوق درجه كل اختيار والماده دى عباره عن 10شيتات بتنقسم 5قبل الميدترم و5بعد الميدترم.

والماده دى لازم تذاكرها كويس جدا لأن السنه دى كان الأمتحان فيها صعب جدا وكان فيها نسبه رسوب كبيره وعملو كيرف ونجح النسبه المطلوبه اللى عاوز أقولو انك لازم تذاكرها من محاضرات الدكاتره والشيت وبيبقي فيه أسئله على اسكولر دكتور عابدين لازم تحل من الاسكولر وبيبقي فيه ملازم للمهندس أسامه خالد كويسه جدا ممكن تجيبها تحل منها وبيبقي حالل فيها الشيت ومسائل الاسكولر.

دكاتره ماده الاستاتيكا وهم دكتور عابدين ودكتور شبراوي ودكتور خالد فصيح ودكتور زكريا النجار.
المعيدين وهم المهندس أسامه خالد والمهندس الهوارى والمهندس أحمد عبيد والمهندس عمر محروس وغيرهم من المعيدين.

(٣) ماده فيزياء ١والكود هو PHY0001

مايعرف بماده فيزياء ١والماده دي عليها ١٥٠درجه منهم ٩٠درجه فاينل و٦٠أعمال سنه منهم ٣٥ميدترم و٥درجات غياب وحضور السكشين و١٠درجات نشاط المحاضره و٥درجات كويز ١و٥درجات كويز ٢وهتدرس فى هذه الماده خواص المواد من لزوجه وصلابه وكمان بتدرس فوليد ميكانكس وبتدرس الجاذبيه وكمان بتاخد انواع القياسات وفيزياء حراريه وامتحان الفاينل بتاعها بيكون اختيارات وبتنقسم إلي فرعين خواص ماده وبتدرس الجزء ده قبل الميد ترم والحراريه بعد ميد ترم .

دكاتره ماده فيزياء 1دكتور مدحت المسيري ودكتور نوران محمد على ودكتور سحر النجار وغيرهم.
من أشهر معيدين الماده المهندس مرعي وغيرو من المعيدين.

ودى مواد الترم الأول المشتركه بين 6جروبات في الترم الأول وهتكلم عن المواد الغير مشتركه وبيتم التبديل مع بعض الترم الثانى يعني جروب 1و2و3بيدرسوا التيرم الاول كميا وإنتاج وتطبيقات هندسيه وحروب 4و5و6بيدرسوا رسم هندسي وتفكير نقدى وحاسبات وبيبدلوا مع بعض في 3مواد دول فقط .

(٤) ماده الكمياء العامه للمهندسين والكود هو CHE001

مايعرف بالكمياء ودى ماده عليها 100درجه منهم 60درجه فاينل و40أعمال سنه منهم 20ميدترم و5درجات غياب وحضور السكشين و5كويز 1و5كويز2و5درجات امتحان معمل كمياء وده بيبقي امتحان بسيط جدا عن تجربتين فى المعمل بيجيلك ملحين وبتكشف عنهم وتذكر أسماءهم وده سهل إن شاء الله وفى هذه الماده هتدرس الغازات والاسمنت والمزلقات والاحتراق والتلوث وهتدرس فيها عن التربه وبيبقي فيه محاضره تعريفيه عن قسم كمياء في الأخر.

-ودى ماده تعتبر ماده امتياز حرفيا أهم حاجه تذاكرها من محاضرات والساكشن وبيبقى امتحانها عباره أكمل وصح وغلط ورسومات .

(٥) ماده إنتاج والكود هو MDP0001

ماده الإنتاج عليها 100درجه 60درجه فاينل و40درجه أعمال سنه منهم 20ميدترم و5درجات حضور وغياب الورشه و٥درجات شفوى و٥درجات كويز و٥درجات حل كتاب الورشه والماده دى بتدرس فيها شغل ميكانيكا بتاخد الالآت وبتشوفها وبتشتغل عملى وتعرف كل جزء فيها وبتعرف كل الالآت دى بتعمل ايه ووظيفه كل جزء فيها وبتنقسم الماده إلي جزئين جزء نظرى وده بيبقي محاضرات وجزء عملى بيبقى فى الورشه وجزء مسائل الدكتور بيحل معاك مسائل لازم تركز فيها لأن بيبقي عليها أكبر درجه فى الأمتحان وبتدرس في هذه الماده المواد وخواصها وسباكه وتكوين المعادن واللحام والالآت .

دكاتره ماده الإنتاج دكتور علاء المقدم ودكتور عماد الكاشف
الماده دى مش سهله لازم تذاكرها أول بأول هتحس الدنيا تقيله الأول بس بعد كده هتفهم الدنيا وأهم حاجه وأهم حاجه تذاكر النظرى مع العملى ولو مش فاهم حاجه تقدر تروح للمعيدين فى الورشه وهما هيفهموك الماده عامه.

(٦) ماده تطبيقات هندسيه ومعمليه والكود هو GEN0001

الماده دى بتنقسم 3أقسام ومعليهاش فاينل .

أولا تطبيقات ميكانيكا عليها 40درجه وبيبقى سكشن بتاخده مرتين في الشهر وعباره عن تجارب بتدخل المعمل تعمل التجربه وبترصد نتائج التجربه وهما عباره عن 4تجارب الاحتكاك والتصادم وقانون نيوتن الثاني وبيبقي ليها شيت بتشتريه من مطبعه الكليه وبتحل فيه التجارب وبيبقى عليه 20درجه منهم 10درجات على حضورك وغايبك في المعمل و١٠ درجات على حل الشيت و٢٠ امتحان على التجارب وده بيبقي بعد كويز الاستاتيكا .

ثانيا ماده تطبيقات رياضه عليها 40درجه بترحوا فيها معمل الكمبيوتر بتشتغلوا على برنامج اسمه octaveالجزء ده عليه امتحان بعد كل معمل وده اللى بيثبت درجه حضورك وغايبك فى المعمل.

ثالثا المشروع ومعمل الفيزياء بتدخلو معمل الفيزياء حوالى 6أسابيع قبل ميد ترم وبيبقى معاك كتاب للمعمل بتشتريه وتدخل كل تجربه تنفذها وتروح للمعيد يعلملك النواتج ويرصدلك الدرجه وتروح للموظف بتاع المعمل يرصدلك التجربه والكتاب ده عليه حوالي 10درجات وعلشان تاخدو 10درجات كاملين لازم تحضرو كل التجارب وبيبقي فيه ميدترم للتجارب دى وعليه 20درجه وبيبقي بنظام الاختيارات علي التجارب والقوانين وبيبقى ليه ملزمه فى مكتبه إفندينا شامله الاختبارات اللي فاتت والقوانين وكل حاجه تذاكرها تدخل تقفل والمشروع عليه 40درجه منهم 30درجه خلال أسابيع عمل المشروع و10درجات المناقشه بتاعت المشروع والمشروع ده بيعمله تيم مكون من 6إلى 7افراد ممكن تعملوا عربيه تحكم عن بعد أو تعملوا مشروع اردوينو اوحاجه ماتلاب وبيبقي فيه محاضرتين ازاي تفكر فى مشروع وتختار المشروع اللي انت عاوز تنفذو وبيكون فيه معيد مشرف عليكوا وبيتابعكوا طول الترم اللي هتاخد فيه الماده دى.

(٧) ماده الحاسبات والكود هو MTH0003

الماده دى عليها 100درجه منهم 60درجه فاينل و40أعمال سنه منهم 5كويز 1و20ميدترم و10كويز 2و5درجات غياب وحضور في السكشن والماده دى بتدرس فيها مقدمه البرمجه وخرائط التدفق وأساسيات لغه C++

دكاتره ماده الحاسبات دكتور هيثم ودكتور دعاء.
المعيدين هما المهندس باسم والمهندس محمد هشام والبشمهندس سرور وغيرهم .

(٨) ماده الرسم الهندسي والكود هو lNT0001

ماده الرسم الهندسي من 150درجه منهم 60فاينل و90أعمال سنه أعمال السنه بتتقسم 50رسم ميكانيكي و40درجه معماري وهتتعلم فيها ترسم ايزومترك وهتاخد قطاعات ناقصه واستنتاج مساقط وازاي تستنتج المسقط التالت وهتاخد رسم معماري واستيل وهى ماده مش سهله عاوزه تدريب كتيير ومتابعه فيديوهات على اليوتيوب بتشرح أزاي ترسم بس الفاينل بتاعها بيجي سهل.

(٩) ماده التفكير النقدي والكود هو GEN000X

الماده دى اسمها تفكير نقدى عليها 100درجه منهم 25ميدترم و ١٥ درجة حضور و60فاينل وبتدرس فيها أساليب التفكير النقدي يعنى قريبه من مادة الفلسفة اللى خدتها فى أولى ثانوي ودى تعتبر ماده إمتياز حرفيا بس متستخفش بيها هى ماده سهله جدا بس تفاصيلها كتير.

(١٠) ماده الرياضه ٢والكود هو MTH002

ومايعرف بماده رياضه 2 وبتنقسم إلى فرعين وهما التحليليه والتكامل والماده دى عليها 150درجه منهم 90درجه فاينل و60أعمال سنه منهم 40ميدترم و5غياب وحضور السكشن و15كويزات والهندسة التحليليه بتدرس فيها معادله الاشكال المخروطيه والخط المستقيم ومعادله الخطين والدايره والقطع المكافئ والقطع الزائد والقطع الناقص وكمان هتاخد هندسه فراغيه فيها معادله الخط والمستوى ودايره فى الفراغ .

التكامل بتدرس فيه التكامل المحدود واللامحدود وبعض تطبيقات عليها زى إنك تجيب مساحه شكل أو حجمه أو طول منحنى والمساحه تحت المنحنى.

دكاتره ومعيدين ماده التحليليه هما نفس دكاتره ومعيدين ماده التحليليه .
دكاتره ماده التكامل هما نفس دكاتره التفاضل ومعيدين نفس ماده التفاضل.

(١١) ماده فيزياء ٢والكود هو PHY0002

*والماده دى بتنقسم إلى فرعين هما كهربيه ومغناطسيه والماده عليها 150درجه منهم 90درجه فاينل و60درجه أعمال سنه وبتدرس فى هذه الماده الالكترونات والشحنه الكهربيه والمجال الكهربى والمكثفات والقوه الكهربيه والمغناطسيه هتدرس فيها المجال المغناطيسي والقوه المغناطيسيه والعزم المغناطيسي.

دكاتره الماده دكتور عصام جمعه ودكتور أحمد الصادق ودكتور برهام ودكتوره سحر النجار
المعيدين منهم المهندس محمود مرعى والمهندس أحمد الباز وغيرهم من المعيدين.

(١٢) ماده الديناميكا والكود هو MEC0002

اوما يعرف بالديناميكا ودى ماده عليها ١٠٠درجه منهم ٦٠درجه فاينل و٤٠درجه أعمال سنه وأعمال السنه منقسمه إلى ٢٠درجه ميدترم و٥درجات حضور وغياب فى السكشن و١٥درجه كويزات والماده دى زى الاستاتيكا من حيث نظام الامتحان وهتدرس فى هذه الماده حوالي ١٠شيتات وبتتكلم عن الحركه فى خط مستقيم والحركه على خط مائل والمقذوفات والمحاور القطبيه وقانون نيوتن الثاني والشغل والطاقه .

الدكاتره والمعيدين هما نفس دكاتره ومعيدين ماده الاستاتيكا.

إزاى نتعامل مع الدكاتره.

ثامناً: هتكلم فى النقطه عن إزاى نتعامل مع الدكاتره.
الدكاتره عندنا كويسين جدا وأهم حاجه احترام الدكاتره والتعامل معاهم بحرص ولوعاوز تفهم حاجه من الدكاتره ممكن تروح لدكتور بعد المحاضر وتفهم اللي انت عاوزه وانصحك إن أى معلومه مش عارفها اسأل فيها علشان تعرف المعلومه ولو جات ليك فى الأمتحان تقدر تجاوبها بسهوله .

نصائح لطلاب الثانويه العامه والطلاب الفنى

تاسعاً: نصائح لطلاب الثانويه العامه والطلاب الفنى اللى داخلين الكليه بخصوص المذاكره وازاي تجيب مجموع عالى.

أنسى مجموع الثانويه العامه مش هينفعك فى حاجه إنت داخل إعدادي زيك زي غيرك هتبدأ من الصفر ومجموع الثانويه العامه ملهوش أى لازمه غير أنه جابك الكليه ممكن يبقي طالب أقل منك يطلع الأول على الدفعه وانت تشيل عادى جدا ملهاش علاقه بمجموع الثانويه العامه.
ذاكر من الأول ومتكسلش وتركن ولو ركنت مش هتفوق غير وإنك شايل مواد.
مبدأ اتعب فى الثانوية هترتاح فى الكليه ملهوش وجود وده وهم مافيش حاجه اسمها كده اصلا الحياه كلها تعب .
ذاكر صح وقت معقول احسن من إنك تذاكر وقت طويل قوى من غير فائده.
اهتم بالمحاضرات محتوى الماده من الدكاتره مش من حد تانى وحطها فى إعتبارك كويس.
ذاكر من المحاضرات والساكشن وممكن تاخد الملازم كمصادر تكميليه والملازم بتبقي على درايف الدفعه مش محتاج تشترى ملازم.
الوقت مهم أوى وسرعاتك فى الحل لازم تهتم بسرعه الحل ودى قوى نفسك فيها واهتم هترتاح جدا فى الامتحانات.
مافيش وقت للدلع.
متحاولش تعمل سوبر مان وتلم الماده قبل الامتحان بيوم وتكون مفتحتهاش قبل كده اصلا الكلام ده مش هيحصل وهتجيب مجموع وحش جدا .
لو جبت درجه وحشه فى الميد ترم اوكويز متزعلش بس الحق نفسك وشوف غلطك فين وصلحها بسرعه.
لما تحل اي امتحان مش مسأله توقف معاك تروح معلق فيها وتسيب باقى الامتحان لاسيب المسأله وحل باقى الامتحان والمسأله متحلتش مش مهم تخسر مسأله ولاتخسر الامتحان كله شغل دماغك واطلع بأقل خسائر من الكليه دى.

ازاى الدكاتره اتعاملت معانا فى ظل ظروف جائحة كرونا

عاشراً :ودى اخر نقطه وهتكلم فيها عن ازاى الدكاتره اتعاملت معانا فى ظل ظروف جائحة كرونا احنا قضينا 5أسابيع فعليين من الفصل الدراسي الثاني وكنا ماشين بالمعدل الطبيعي وكان فاضل اسبوع وهنمتحن الميدترم منتصف الفصل الدراسي صدر قرار من رئيس الجمهورية بوقف الدراسه لمده اسبوعين وفيه هذه الفترة واجهنا عاقبات كثيره منها ازاي هنتواصل مع الدكاتره وتوصلنا إلى طريقه الأون لاين وكان فيها عقبات كثيرة جدا منها عدم إمكانية طلاب من التواصل مع الدكاتره لعدم توافر عندهم انترنت ومجلس الكليه عمل إجتماع وحل المشاكل اللي كانت بتواجهنا منها عدم وجود النت في مناطق عديده فى مصر زى القرى وتوصلنا لطريقه اننا نحمل المنهج والمحاضرات والساكشن على فلاشه وبقت متاحه لاى طالب يقدر يذاكر منها بعيدا عن الانترنت لطلاب الغير قادرين على متابعه الانترنت والحمدلله تم الانتهاء من المنهج بصوره طبيعيه وكان الدكاتره واقفين معانا نظرا لجائحه كرونا وظروف التى تمر بها البلاد والحمدلله عدينا الفتره دى من غير أى خسائر والدكاتره اعطونا فرصه فى الوقت في الامتحانات جميعا تحسبا لأى مشكله زى إنقطاع النت اوسوء الشبكه فى مصر وتم بحمدالله إنتهاء هذه الفتره دى على خير متعاونين جميعاً.

قرأ الزوار ايضا:

تعديل المقال

بريمو هندسة Primo Engineering

كل ما تريد معرفته عن هندسة القاهرة مواد اعدادي والاقسام

معلومات عن هندسة القاهرة

أقسام هندسة القاهرة

برامج كريدت هندسة القاهرة