أخر الاخبار

ما هي كلية هندسة عين شمس | مواد اعدادي هندسة والاقسام والتخصصات

تخصصات واقسام كلية هندسة عين شمس


 كلية هندسة جامعة عين شمس  ترحب بكم "welcome" كذا حد سأل عن نظام الكلية بالذات بعد النظام الجديد علي بريمو هندسة هنركز علي  كذا حاجة إن شاء الله 

  • أولا أحب أفكركم أنكم تعبتوا عشان تدخلوا الكلية ف أنتم إن شاء الله قد المسؤولية 
  • بصوا الكلية كلها حاليا ماشية بنظام الCredit Hours System 
  • في النظام التخصصي ده اللي هو النظام العادي و مصروفاته حوالي 1033 جنيه سنويا 
  • أما النظام البيني مصروفاته حوالي من 80 الف جنيه ل 100 الف بالنسبة ل اعدادي 

هنتكلم بالتفصيل شوية 

  • التخصصي بيقبل السنة ديه من 86% *ده النظام العادي اللي بتكون فيه لما بتدخل الكلية من خلال التنسيق إلا لو أنت بنفسك قررت تدخل النظام البيني 
  • أما البيني بيقبل من أقل مجموع ل كليات هندسة الحكومية 


  • التخصصي: العدد في السيكشن بيكون حوالي 55 و المحاضرة حوالي 300 
  • البيني : العدد في السيكشن بيكون حوالي 40 و المحاضرة حوالي 70 

فيه ميزة في النظام البيني ان بيكون فيه بعض التخصصات تقدر تعمل شهادة مزدوجة (جامعة عين شمس - جامعة East London (بتكون ب فلوس زيادة حوالي 600 يورو اول سنة و 500 يورو بعد كدة و تقدر تاخد سنة او سنتين في الجامعة الاجنبية و تاخد تخفيض علي المصروفات الدراسية بتاعتها برا مصر


تقسيمة الدرجات كلية هندسة عين شمس


بالنسبة لي تقسيمة الدرجات فبتكون 

  • التخصصي فيه بعض المواد مابتكونش تقسيمة درجات المادة 60%أعمال سنة و 40% امتحان الفاينل
  • البيني بيكون تقسيم درجات كل المواد أعمال سنة 60% و امتحان الفاينل 40%

نتكلم بقي عن ايه نظام ال Credit Hours System

  • كل مادة بتدرسها بتتكون من عدد من الساعات المعتمدة .. و دي بتكون بتعبر بشكل أو بآخر عن عدد الساعات اللي بتقضيها في المادة
  • المواد عامة بتبقي ساعتين أو 2 أو 3
  • سعر الساعة 1875 جنية و بتكون في العادي حوالي 18 ساعة كل ترم

تخصصات واقسام كلية هندسة عين شمس


تخصصات النظام التخصصي : 

ما هي كلية هندسة عين شمس (مواد اعدادي هندسة والاقسام )
أولا بتتخصص في أقسام عامة الأول (ميكانيكا - كهربا - مدني - عمارة ) و ده بيكون بعد إعدادي ، وبعدها بتخصص جوه القسم ( في اللايحة القديمة كانوا بيدخلوا القسم سنتين و بعدها يتخصصوا لكن في اللايحة الجديدة لسه مفيش كلام أكيد عن الموضوع ده )
  • ميكانيكا فيها 
    • ميكاترونكس
    • قوي ميكانيكية
    • إنتاج و تصميم
    • سيارات
  • كهربا فيها
    •  قوي و آلات كهربية 
    •  حاسبات و نظم 
    •  الكترونيات و اتصالات كهربية
  • مدني بتخصص اما تدخلها
    •  أشغال عامة 
    • ري و هيدروليكا 
    • إنشاءات 
  • عمارة مفيش تخصص جواها

تخصصات النظام البيني بكلية هندسة عين شمس


بالنسبة للنظام البيني التخصص بتختاره وقت التقديم و بتتخصص فيه بعد إعدادي و ممكن تغير التخصص اللي اخترته بعد إعدادي

  • Materials Engineering 
  •  Manufacturing Engineering 
  •  Mechatronics Engineering and Automation
  • Landscape Architecture
  • Environmental Architecture
  •  Housing and Urban Development
  •  Communication Systems Engineering
  •  Energy and Renewable Energy Engineering
  • Computer Engineering and Software Systems
  • Building Engineering
  •  Civil and Infrastructure Engineering

بيبقي في مرشد أكاديمي ل كل مجموعة من الطلبة بيبقي من الدكاترة أو المعيدين هتعرف مين المرشد الأكاديمي بتاعك قبل ما الدراسة تبدأ

و هو بيساعك في تسجيل المواد و تختار المواد اللي تدرسها أزاي و بيكون عنده علم ب اللايحة

كل ترم بتختار المواد اللى عايز تدرسها و عدد ساعاتها بيتجمع و يبقى ده عدد الساعات اللى انت هتدرسه التيرم ده. طبعا الموضوع مش بالحرية الكاملة بيبقى فيه نظام اسمه ال prerequisites
  • يعني فيه مادة مينفعش تاخدها إلا لما تكون نجحت في مادة تاني
  • نظام الدرجات في الساعات المعتمدة مش هو النظام التقليدي (امتياز – جيد جدا - جيد - مقبول ).
  • بيتم حساب معيار معين اسمه ال GPA (Grade point average)
  • و ده الحد الأقصى بتاعه 4 كل مادة بتبقى من 100 درجة لو جبت مثلا 94 تبقى جبت في المادة دي 4 (اللى جاب 94 زي اللي جاب 100) .. و لو جبت من 89 ل 94 تبقى جبت في المادة دي 3.7 و هكذا بيبقى فيه تقسيمة معروفة كل ترم موجودة في الصورة
  • من حق الطالب إنه يدرس خمس أو حتى أربع مواد بس، عادي جدا، طبعا هتاخدهم بعد كدا مش بيتشالو أكيد.

الترم اللي بعده فيه 6 مواد تقدر تدرسهم كلهم أو أقل مثلا:
  • تدرس أربع مواد من بتوع الترم ده وأتنين بتوع الترم اللي فات...
  • مينفعش أكتر من ست مواد إلا لو جبت أمتياز الترم اللي فات، فتقدر تأخد 7 مواد
  • ودي مصلحة للي يعرف يجيب امتياز باستمرار؛ كل ترم ياخد مادة من اللي بعده، فا يخلص في أربع سنين ونص بس.
  • لو جبت درجة وحشة في مادة ويهمك لسبب ما تجيب درجة أعلى، مع إنه مش هيحصل إلا أول سنة عشان تدخل القسم اللي عايزه، تقدر تدرسها تاني وتعمل تحسين بس بفلوس وغالبا أكتر من ٣٠٠٠ للمادة!

مفيش رسوب كامل وإعادة السنة؛ يعني لو خدت 6 مواد ونجحت في مادة واحدة بس مش هتعيد السنة، الترم اللي بعده مواده ليك عادي جدا، عايز تأخدهم براحتك، عايز تأخد المواد اللي منجحتش فيها عادي برضو.

  • المواد لطيفة ومش صعبة للدرجة زي ما هتسمع وهتشوف ناس هتسببلك إحباط كتير، ممكن توصل ليأس بسبب نفسيتك مش الصعوبة!
  • أول ما تلاقي حد يقولك فيه مواد صعب النجاح فيها، أبعد عنه
  • أو هو مهمل مبيذاكرش سواء بيلعب بقا أو كسل أو حتى شغل؛ فدا اسمه إهمال دراسي!

هو كلام صعب لكن دي الحقيقة، أيوة الكلية صعبة وفعلا أصعب كلية هندسة في مصر، وفيها ضغط كتير لكن مش للدرجة اللي بيوصفوها بيها وتقدر أصلا بأريحية متحسش بضغط لو بتذاكر أول بأول

كان زمان فعلا ليها رهبة عظيمة في صعوبة الامتحانات والدراسة، والسبب في كده -كما يقال- إنها كانت معمولة جديد فكان الأول والتاني هندسة القاهرة بيتعينو فيها معيدين والتالت والرابع بيروحو عين شمس، كنوع من المنافسة يعني كانو بيصعبو مستوى الدراسة فيتقال أن عين شمس اللي المعيدين بتوعها درجاتهم أقل من بتوع القاهرة بيطلعو مستويات أعلى وكده بس طبعا على حساب الجودة والكفاءة!
  • لأنهم بيضغطو الطلبة بحيث أن كل الطلبة تذاكر وتتعلم مسائل وده المطلوب من المهندس
  • العادي المتوسط؛ يحل مشاكل...

لكن مفيش اهتمام بشرح المفاهيم العميقة والابداع إلا نادر، فكده الكلية بتضمن تخريج اكبر نسبة من الطلبة ينفع مبدئيا يكونو مهندسين، لكن بيتظلم الطالب اللي فكره عالي عشان وقته هيكون للكلية ومتطلباتها، شبه مفيش فرصة للابداع الشخصي...
  • مهم تقرأوا اللايحة

مواد اعدادي هندسة عين شمس 


بالنسبة لي المواد و المذكرة انت عندك 12 مادة في اعدادي (المستوي العام) علشان اسم اعدادي  المواد هما الترتيب الاتي ده ممكن مش شرط يكون عندك في الجدول او انك تاخد كل المواد دي في الترم الاول و الباقي الترم التاني بس الاكيد انك مش هتاخد mathematics 2 قبل mathematics 1

1st semestre
  1. vibration and waves
  2. mathematics 1
  3. statics
  4. engineering drawimg
  5. chemistry in engineering
  6. computing

2nd semestre
  1.  fundamental of engineering
  2. projection and engineering graphic
  3.  production
  4. mathematics 2
  5.  dynamics
  6. electricity and magnetism

نصائح لطلاب هندسة عين شمس


نيجي بقا للمذاكرة اولا لازم تكون عارف ان غالبا احنا معندناش كتب لي معظم المواد و اننا بتعتمد في المذاكرة في اعدادي او المستوي العام علي الملازم بتاعت الميعدين(ده بالنسبة لي اعداي فقط مش عارف باقي السنين ايه النظام ) و المحاضرات الي انت بتكتبها بشكل اساسي و فيه مراجع بس في الحقيقة احنا كنا بنعتمد عليها في حل المسائل بسبب ان المرجع بيكون كبير جدا و ممكن لو انت عندك وقت و كويس في الانجيلزي تذاكر منه حاجة مثلا واقفة معاك بس منصحكش بي ده علشان هتحتاج لي وقت كبير و انت غالبا معندكش الوقت ده الا لو انت عرفت تنظم وقتك بشكل سليم

و من اهم الحاجات الي فعلا هتدرك قيمتها اوي اوي بشكل كبير جدا في هندسة هو الوقت بسبب انك عندك دايما كم كبير و وقت قليل فا لازم تكون بتعرف تستخدم وقتك بشكل كويس هتفم قصدي لما توصل لي امتحانات الميدترم

نيجي بقا لنصيحة خاصة مني ليك حسب خبرتي انت مش الة يعني مينفعش تضغط نفسك طول اليوم و او انك تاجل حاجة علشان لو اتركمت عليك هتدخل منطقة مش هتحبها انت اخدت محاضرة كمية المعلومات من محاضرة واحدة تقدر تذاكرها اما لو بقا وراك اكتر من محاضرة صدقني الموضوع هيكون صعب بسبب انك ممكن يكون عندك كويز لي مادة تانية فا يكون الاولوية انك تذاكر لي المادة التانية علشان زي ما انت عرفت ان 60في المية اعمال سنة

شرح مواد اعدادي كلية هندسة عين شمس بالتفصيل

شرح مواد اعدادي كلية هندسة عين شمس بالتفصيل

مواد الترم الأول
Mathematics 1
  • كل التفاضل والتكامل في متغير واحد، ومتتابعات لانهائية وهندسة تحليلية
  • في هندسة القاهرة بياخدو أول ترم تفاضل بس وجبر ثانوي تقريبا، الترم التاني تكامل وتحليلية، الترم التالت تفاضل وتكامل متعدد المتغيرات وجبر خطي اللي هتخدوه الترم تاني
  • الرياضة حل كتير بعد حفظ القوانين كويس جدا لأنهم كتار (لاحظ أن باقي الكليات بياخدوها على ترمين) ورق المعيدين مفيد عن كتاب الكلية

Vibrations and waves
  • فيزيا التموجات والاهتزازات زي بتاعة تانية ثانوي بس بعمق
  • دي فهم وبعدين حل كتير وتركيز في التفاصيل
  • فيه معيد ورقه مفيد للشرح والفهم، ومعيد ورقه فيه أفكار كتيرة والأتنين حلوين مع أني محضرتش ولا سكشن ليهم هما الأتنين
  • ومكملتش حضور للدكتور كنت بشوف محاضرات دكتور تبع الكلية على الانترنت لأنه مختصر كتير

Statics
  • الاستاتيكا مش هتفرق كتير عن ثانوي
  • حل كتير ومسكة أيد كويسة للألة الحاسبة مش أكتر
  • فيه معيد ورقه ملخص جدا ومنظم
  • ومعيد تاني من القاهرة ورقه فيه أفكار كتيرة جدا
  • أنا كنت بشوف الأتنين لأني مستلطفها والوحيدة اللي جبت فيها أمتياز عالي A

Chemistry
  • مواضيع كتير بس باختصار
  • أول مرة هتعرف أن الكميا حل مسائل مش حفظ زي ثانوي
  • حل كتير، فيه دكتور ليه ورق أيام ما كان معيد كفاية، الكتاب ملهوش لزمة

Computing
  • مواضيع برضو باختصار
  • فا بما أنها نظري، ورق المحاضرات كفاية

Projection and Engineering graphics
  • الاسقاط ورؤية الأجسام، كانت زمان هندسو وصفية؛ حجات كتير اتشالت
  • يعني لما تشوف حاجة من اتجاه معين هتبان أزي
  • السكشن مصدرها الأساسي وفيه يوتيوب حجات محدودة بس اكتب اسم الكلية في البحث

مواد الترم التاني

Mathematics 2
  • تفاضل وتكامل في عدة متغيرات وجبر خطي
  • باقي الكليات بياخدوها تالت أو رابع ترم زي القاهرة وشبرا، لكن أنتو عباقرة طبعا، اللي بيتاخد في سنة كاملة بتاخدوه اول ترم

Electricity & magnetism
  • فيزيا الكهربا والقوة المغناطيسية
  • فهم كويس وحل كتير، نفس ورق معيدين فيزيا 1

Dynamics
  • الديناميكا هتفرق حجات بسيطة عن ثانوية
  • حل كتير وفهم، نفس ورق معيدين الاستاتيكا

Production
  • الانتاج وطرق التصنيع وانواع المواد واستخراجها
  • قراءة بفهم من المحاضرات

Fundamentals of Engineering
  • أساسيات الهندسة وأقسامها
  • قراءة المحاضرات كفاية
  • فيه برضو أمتحان أو شهادة بنفس الاسم في أمريكا كترخيص لاحتراف المهنة ملهوش علاقة بده، لتفتكر أن دي مادة مهمة وبيمتحنوها برة

Engineering Drawing principles
  • الرسم الهندسي الميكانيكي والمعماري والمدني كبدايات بسيطة بس أمتحانات عميقة!
  • تدريب كتير ورسم باستمرار، كتير بيجيبو أمتياز فيها بسهولة!

ملحوظة بالنسبة للفرق بين التقديرات ونظام الGPA: 
  • طالما قلت أمتياز ونطقتها يبقا 85% فيما فوق اللي هي بنظام الساعات GPA 3 ملكش دعوة بالحروف A أو B أو C
  • متكنش جايب GPA 3.3 مثلا اللي هي +B تقريبا وتقول جيد جدا، باعتبار أن A امتياز
  • لا أنت كده تقريبا 88% يعني أمتياز

ملحوظة برا الموضوع بخصوص الرياضيات:
  • هندسة شبرا عندهم لحد رياضة 6 تخوف صح؟ لا متخوفش لأن لما دخلت على المحتويات بتاعتهم لقيت أن رياضة 5 اللي بياخدوها في قوى كهربية بناخدها أحنا تاني ترم في أول سنة رياضة 2 !!
  • ورياضة 6 بناخدها رابع او خامس ترم تحت اسم أحصاء واحتمالات
  • الغريب برضو أن قسم قوي كهربية بيدرس رياضة أكتر من أتصالات عكس هندسة القاهرة بيدرس رياضة أكتر من قسم طيران وفضاء وكذلك في جامعة زويل اتصالات أكتر قسم بيدرس رياضة!
قرأ الزوار ايضا: