مواد اعدادي كلية هندسة جامعة بنها
اول حاجة هنتكلم عليها وهى المواد
بندرس فى الترم الواحد 8 مواد بمجموع 16 مادة للترمين ، ناس كتير ممكن تتخض من العدد بس صدقنى ديه حاجة لمصلحتك علشان حاجة هتفهمها فى اخر البوست خاصة بالنتيجة
* الترم الاول :
1- رياضة أ : بتدرس فيها تفاضل زى بتاع الثانوية بالظبط بزيادات بسيطة جدا وهتلاقى ليها علاقة بالثانوية بردو ومش هتلاقوا فيه مشكلة وبالنسبة للجبر بيبقا الترم الاول عبارة عن لوجيك يعنى عمليات التقاطع والاتحاد وبعض عمليات المنطق سهلة جدا والرياضة عموما مادة امتياز والمادة من 150 ، 60 أعمال سنة وميد تيرم و90 فاينل
2- فيزيا أ : متقسمة لجزئين وخدتهم الاتنين فى ثانوي
اول جزء وهو الكهربية ، عبارة عن قانون كولوم والشحنات الكهربية وتطبيقات عليهم وتانى جزء مغناطيسة زى اللى درستها فى ثانوى وهى الدينامو والملفات وقانون امبير والفيض وما الى ذلك
المادة من 150 ، 20 ميد تيرم ، 10 كويزات ، 10 عملى ، 10 كويزات معمل ، 10 تجارب وحضور المعمل ، 90 فاينل
3- ميكانيكا أ ( إستاتيكا ) : اول جزء بيتكلم عن حاجة جديدة بالنسبالك فى المسمي وهى trusses ( جمالونات وبتبقا موجودة فى الكباري والطرق ) وهى تطبيقات على العزوم والاتزان ، وهتدرس القوى فى 3d بدل ما كنت بتدرسها 2d فى ثانوي ومركز الثقل ، وموضوع يعتبر جديد عليك وهو عزم القصور الذاتى وهتفهم ايه ده لما تدخل وبيبقا سهل ان شاء الله
المادة من 150 ، 60 ميد تيرم اول وميدتيرم تانى واعمال سنة و90 فاينل
4- كيميا أ : وبتدرس فيها الاحماض والقواعد وحالات المادة من سائل وصلب وغاز واغلبها ثانوية عامة بردو والاجزاءالجديدة مش هتلاقى فيها صعوبة اوي
المادة من 100 ، 20 ميد تيرم ، 20 عملى ، 60 فاينل
5- حاسب أ : بتاخد فيه مقدمة فى الكمبيوتر وتكوين الكمبيوتر واجزاء الكيسة وهكذا وبتبقا سيكشن بس مافيش محاضرة ، المادة من 50
25 ميدتيرم وحضور و25 فاينل وساعات ممكن يلغوا الميد تيرم ويعوضوه بكويزات بيعملوها كل سيكشن
6- لغة أ : بتدرس فيها الصوتيات وبعض مخارج الحروف والنطق الصح للحروف لما تبقا فى كذا موضع وجزء تانى بيبقا عبارة عن قطع فى هيئة دروس معلومات عامة ومادة سهلة بردو من 50 زى الحاسب
25 ميد تيرم واعمال سنة و25 فاينل
7- رسم هندسي أ : وهنا بقا بداية المواد الجديدة ليكم علشان اول مرة تتعاملوا معاها اول ترم بتدرسوا العمليات الهندسة وبعدها الايزومتريك واستنتاج ال3 مساقط واستنتاج الايزو من مسطقين واخر حاجة فى الترم بتدرس استنتاج المسقط التالت من مسقطين
المادة من 75 ، 50 اعمال سنة منهم 15 ميد تيرم و35 حضور سكاشن وتسليم لوح و25 فاينل ، المادة ديه ممكن تنجح فيها من غير ما تحضر الفاينل لو انت حضرت الميد وجبت درجات كويسة فى الهوم والكلاس هتلاقى نفسك معدى درجة النجاح فا بتخش الفانيل تجيب تقدير مش اكتر
8- هندسة الانتاج والورش : من المواد الجديدة بردو وبتنقسهم لجزئين اول جزء بيبقا خاص بالcutting وبيتعامل مع الماكينات زى الخراطة والفرايز وبتاخد في 6 محاضرات وتانى جزء بيبقا عن الnon-cutting زى السباكة واللحام وبتاخد فيه بردو 6 محاضرات وبيبقا العملى بتاعه خاص بالورش بتحضر ورشة كل اسبوع والورشة الواحدة بتاخدها فى 3 اسابيع المادة من 200
50 فاينل و50 اعمال سنة " ملهاش ميدتيرم " و75 ورش متقسمين 25 ترم اول و50 ترم تانى و25 لباقى بيبقا العملى فى اخر السنة خالص ومادة مضمونة بردو فى النجاح بحضورك للورش والمحاضرات
* الترم التانى : " توزيعة الدرجات زى الترم الاول "
1- رياضة ب : بتدرس فيها تكامل وجبر بردو ، التكامل بيبقا فى جزء من ثانوى وهو طرق التكامل اللى خدتها والمساحات والحجوم والجزء الجديد بيبقا فيه طرق تكامل جديدة هتاخدها واخر شابتر المتسلسلات بردو شبه جديد بالنسبالك بس التكامل سهل ودكاترته كويسة جدا ، جبر الترم سهل زى الاول بردو هتاخد فيه المصفوفات وطرق الحل الى خدته فى الثانوى وكام طريقة جديدة وبعدها هتاخد المتجهات والاعداد المركبة بس
2- فيزيا ب : متقسمة لجزئين بردو اول جزء خاص بالموجات وانكسار وحيود الضوء وتانى جزء بيقا ثيرمو بتاخد فيه مقدمة فى الثيرمودينيمك والقانون الاول والتانى للديناميكا الحرارية
3- ميكانيكا ب (ديناميكا ) : بتدرس معادلات الحركة بردو وقانون نيوتن والشغل والطاقة والدفع والتصادم وده كله قديم من ثانوى
4-كيميا ب : بتكلم على اول جزء وبتدرس ثيرمو وكيميا كهربية زى ثانوى وجزء عضوية وخاص بعمليات البلمرة
5-حاسب ب : بتدرس لغة برمجة وهى بايثون ولغة سهلة جدا محتاجة تتابع السكشن وتطبق بس
6- لغة ب : نفس مواضيع الترم الاول وب50 درجة بردو
7- رسم هندسي ب : بتكمل على الاستنتاج وتاخد القطاعات والتهشير وبعدها جزء استيل واخر كام سكشن بتاخد هندسة وصفية
8- التكنولوجيا والمجتمع : ديه بتخش مكان نظري هندسة الانتاج وبتبقا مادة زى حقوق الانسان كده بتديك علاقات بين التكنولوجيا والناس ودورها فى المجتمع وهكذا وسهل النجاح فيها ان شاء الله
نيجى بقا لجزء ليه المادة بتتاخد كل ترم ؟
الجزء ده فى صالحك عامة لان كل مادة خاصة بترمها ، يعنى ايه ؟
يعنى لو لقدر الله الترم الاول حصلك دروب وشيلت مادة ، بتخش الترم التانى لو عوضت فرق الدرجات يبقا كده نجحت فى الترمين ، طيب لو نجحت ترم تانى بس ومقدرتش اعوض فرض الدرجات يبقا انت كده شايلها ترم اول بس بمعنى مثلا جبت فى الفيزيا 60\150
الترم الاول والترم التانى جبت 100\150 كده التوتال 160\300 يبقا انت كده نجحت فى الفيزيا ،
طيب لو جبت الترم التانى 80\150 ، كده انت نجحت ترم تانى وشايلها ترم اول بس وطبق نفس الكلام على اى مادة موجودة فى الترمين ، وده حلو لو حصلك دروب الترم الاول تلحق نفسك وتعوض الترم التانى
اقسام كلية هندسة جامعة بنها
- هندسة كهربية : وبتتشعب منها اتصالات وحاسبات وكهربا باور وهندسة طبية
- هندسة مدنية
- هندسة معمارية
- هندسة ميكانيكة : وبتتشعب منها ميكانيكا باور وميكاترونيكس وميكانيكا انتاج وتصميم
عدد الدفعة مبيعديش ال500 تقريبا وده حلو لان العدد بيبقا قليل فى المحاضرات والسكشن وده هيساعدك فى التركيز والفهم اكتر
واهم نصيحة هقولها ان متسمعوش كلام الناس بتاعت ايه اللى جابك هنا واهرب والكلام ده كله ، الكلية زيها زى اى كلية هتجتهد وتتعب هتلاقى ، هتضيع وقت وتلعب هيجي عليك فى الاخر ، فا انت اجتهد واعمل اللى عليك وهتلاقى نتيجة تعبك ان شاء الله اخر السنة ، وربنا يوفقكم جميعا