طبعا كل اللي بيبقا داخل هندسة حلوان بيبقا زعلان و متضايق بسبب إنه مجموعه فرق معاه حاجات بسيطة و ملحقش هندسة القاهرة أو عين شمس وكمان الزعل بيزيد لما بيجرب المشوار و يشوف الصحراا
بس في الحقيقة إن الكلية غير كداا خالص هي كلية جميلة جدا و نظام التعليم و الدكاترة فيها كويسين جدا
...
الكلية طبعا منقسمة إلى فرعين فرع موجود في حلوان و فرع في المطرية كل سنة بيبقا فرع المطرية بياخد في التنسيق أقل من حلوان بنص درجة أو درجة وداا طبعا بيجعل معظم الطلبة تفتكر ان حلوان افضل من المطرية و الحقيقة غير كداا ان الاختلاف الوحيد بين الفرعين هو الاقساام فقط
اقسام هندسه حلوان :
١/ قسم الهندسة الطبية : و هو قسم جميل جداا هناك و مش بياخد اكثر من ٣٥ طالب و دا بيخليه تنسيقه عالي شوية في حدود جيد جدا مرتفع
٢/ قسم كهرباا باور : و طبعا القسم دا في حلوان ثقيل و عريق جداا والقسم دا بتمتاز بيه الجامعه و يعتبر افضل كهربا باور في مصر
٣ / قسم الاتصالات و حاسبات: القسم عندنا الصراحة صعب جداا و ثقيل و الدكاترة بتاعته معقدين شوية و دا مخلي ماشاء ﷲ سمعته سبقاه
بس السنادى انفصلوا عن بعض يعني حاسبات لوحدها و اتصالات لوحدها وبياخدوا من مجموع عالي
ودي حاجة جميلة جداا لان في ناس عايزة تدخل حاسبات مثلا ف كدة هتكون من بعد إعدادى بس خلى بالك أنه اخد 50 شخص فقط يعني هيكون مجموعه عالي
٤/ قسم ميكانيكاا :
القسم هناك كويس جدا وبنتخصص من سنه ثانية في
تلات اقسام
١- ميكانيكا انتاج
٢- ميكانيكا صناعية
٣- ميكاترونيكس
وطبعا حلوان بتتميز بان قسم ميكاترونيكس فيها مش كريديت عام بس هو بيحتاج تنسيق برده مش قليل عشان معظم اللي بيدخل ميكانيكاا بيبقا عاوزه
ثانيا فرع المطرية :
فرع المطرية هو كمكان الصراحة انضف شوية من حلوان كشكل و شجر و الكلام دا كله
وفي ٥ اقسام
١/قسم ميكانيكا باور : وهو يعتبر أفضل قسم في المطرية لانه قوي جداا هناك و دكاترته كويسين جدا
٢/ قسم مدني : و طبعا مدني المطرية بيتميز إنه مفيهوش تخصصات معينه يعني الخريج بيقدر يشتغل أي حاجة و مش مرتبط بحاجه معينه عكس عين شمس
٣/قسم عماره
٤/ قسم هندسه السيارات والجرارات : ودا قسم بتمتاز بيه الجامعة لانه مش موجود الا في ٤ جامعات في مصر بس من ضمنهم المطرية و طبعا طلاب سيارات عندنا ما شاء ﷲ عليهم
٥/ قسم التصميم الميكانيكي : و دا قريب جدا من ميكانيكا انتاج و كام شعبة جوا قسم ميكانيكا باور بنتخصص فيها من سنة تالتة و السنة دي انفصل و بقا قسم لوحده و القسم معتمد علي الرسم الميكانيكي
يااريت اكون قدرت افيدكم ع قد ما اقدر و نصيحة اخيره ياريت تحدد القسم اللي انت عاوزه من الاول وبناء عليه ادخل اعدادي في المطريه او حلوان هو اه سهل انك تحول بعد اعدادي
بس خلى بالك أن حلوان السنادى مردتش تقبل حد من المطرية شايل مواد عكس م المطرية قبلت عادي
بس العيب ان لايحه المطريه مختلفه عن حلوان ف لو حد هيحول من المطريه ل حلوان هيشيل مادتين السنه دي كانوا ( لغة و برمجه )
واللي هيحول من حلوان للمطرية بيشيل مادتين اتوكاد و طاقة
+ التنسيق بيبقا مختلف يعني مثلا لو قسم كهرباا بياخد في حلوان من ٦٠% ف لو حد من المطريه عاوز يخش القسم لازم يكون جايب ٦٦%
والعكس مدني مثلا بيقبل في المطريه من ٥٥% ف لو حد من حلوان عاوز يخش لازم يكون جايب ٦٥%
ندخل بقا ع المواد
مواد اعدادي كلية هندسة جامعة حلوان
هكلمكم عن المواد الترم الاول في حلوان و مفتاح كل مادة
#الميكانيكا (استاتيكا+ديناميكا)
المادة دى من امتع المواد حقيقة و مش صعبة لسبب ان الاستاتيكا علم بيكمل بعض يعنى بيكمل ثانوى بمعنى انك هتدرس الاول تحليل قوى و بعدين العزوم بس فى 3 D مش 2D زى ما متعودين في ثانوى و بعدين بتكملوا احتكاك و حاجة اسمها تحليل منشآت بمعنى انك بتدرس القوى اللى بتاثر ع اى نقطة ف المنشا +الديناميكا
تذاكرها من الكتاب و محاضرات الدكتورة والامتحانات السابقة وأتك على الكتاب#
المادة من 150 درجة ( 50 اعمال سنة عملى + ميدتيرم ) 100 فاينل
#الكيميا
طبعا عرفتوا انها 3ّ اجزاء غير عضوية و فيزيائية و عضوية إللى تاخدوا ف المحاضرة ذكروه علطول و الكتاب وركز على المحاضرات جداا
مع العلم ان جزء الغير عضوية شبه بتاع ثانوى جدا بيتكلم عن الاوربيتال و التوزيع و الحاجات دى
درجات المادة
الماده من 150 ( 30اعمال السنه +30 عملي +90 امتحان فاينل )
#الحاسبات
احب اقولكم انها هتكون مشكلة كبيرة بالنسبة لكم لو معملتوش ال٣ حاجات دول متفوتوش محاضرة متفوتوش سيكشن اعمل برامج كتير بايدك
هى بتتكون من سوفت و هارد
جزء الهارد جميل جدا و سهل بس السوفت c++ برمجة يعنى ففيها شغل كويس و نصيحة متحفظوش برامج لازم يبقى عندك خبرة تكتب برنامج و هتكتسبها مع الوقت لو عملت إللى قولتلكم عليه
درجات المادة
المادة من 150 ( 30 اعمال سنه +30 عملي +90 امتحان فاينل )
#رياضه 1 بتنقسم ل ( تكامل _تفاضل) صعبة شوية الاتنين مع بعض بس من الاخر كدة متتكلش فيهم على كلام الدكاترة نهائي امتحانات سابقة و دوس فيهم جامد جداا وعندك اليوتيوب مليان د. عماد عبدالحفيظ بيشرح تقريبا نفس المنهج
اكتب مع الدكتور في المحاضرات والأهم هنا السكاشن اوعى اوعى تفوتك سكشن عندنا شوية معيدين عظمة
المادة من 150 ( 50 اعمال سنه +100 امتحان فاينل )
#فيزيا1 بتنقسم ل (حرارية _ خواص مادة)
في فرع الحرارية هتدرس التريمومتر والآلات الحرارية والتمدد وبعد كدة هتدخل علي الديناميكا الحرارية والقوانين بتاعتها
اما في خواص المادة ف هتدرس سلوك المادة من مرونة ولدونة والصوت والحركة في الفضاء وحاجات تانية يعني
درجات المادة
الماده من 150 ( 30 اعمال سنه +30 عملي + 90 امتحان فاينل ) امتحاناتها mcqالمادة تتذاكر من محاضرات الدكاترة الإعاقة فيها اللغة بس
بالنسبة للمعامل عايز اقولكم ان معمل الكيميا احلى حاجة ف الاسبوع بتجرب بايدك و بتعمل التجارب بنفسك حاجة جميلة يعنى
و معمل الفيزيا بيبقى عندك 4 تجارب ف الترم بتعمل كل مرة تجربة و بتنفذها انت و التيم مع بعض بس في الامتحان هتعملها لوحدك طبعا
المادة الترم الأول عليها اعمال سنه 60 درجة وبتمتحنها الترم التاني
الترم الاول كده كله عليه 750 درجة
الترم التاني بقا عباره عن :
#الرياضه 2 بتنقسم ل ( هندسة تحليلية _ جبر ) اسهل كتير من الترم الاول
>الجبر جميل جدا جدا
>التحليلية بقا الي حد ما محتاجه فهم كويس جدا مع حل كويس بعد المذاكره الدنيا هتبقا تمام هو فيه ٦ ابواب بابين او تلاته بس الي محتاجين مذاكره بفهم بس كدا
درجات المادة
الماده من 100 ( 30 اعمال السنه + 70 امتحان فاينل )
#الانتاج
بص هيا ماده كبيره شويه احنا عندنا هنا ف حلوان بندرسها بالانجلش علي عكس باقي الكليات ف دا كان عامل لينا ازمه لان فيها مصطلحات كتير جدا غريبه فاللي تمشي عليه هو إنك هتكتب المحاضره ورا الدكتور وهتروح تذاكرها وبعدين الماده دي ليها ورش تقريبا بيبقوا ٨ ورش متقسمين علي الترم كله ف انت طبعا اجباري انك لازم تحضر كل الورش عشان تعرف المكن والأدوات و الحاجات الجديده دي وتفضل في دماغك وعشان كمان تاخد درجة الورشه هتيجي ف الآخر هتلاقي معاك ٨ ورش و٨ محاضرات هتذاكرهم كويس جدا وبس كدا فله
درجات المادة
الماده من 200 ( 40 اعمال سنه +40 عملي الورش +120 امتحان فاينل ) بيديها 2 دكاترة اهتم بالمحاضرات والكتاب وفي الاخر لازم تحل امتحانات
#حقوق_إنسان
مادة من 50 درجه الدكتور شيت وانتا بتذاكره الشيت يبقا كدا انت ضمنت المادة والدكتور هيقولك علي6 اسٱله مهمين هيجولك ف الميدتيرم و الفاينل سهلة يعني
#اللغة
ماده برضوا من 50 (10 اعمال سنه +40 امتحان فاينل ) معتمده علي حفظ كلمات كتير وفي شوية مصطلحات جديده وهتحفظهم وخلاص الكتاب وراه شيت يتذاكر
#فيزيا 2منقسمه ل( ضوئية _ كهربية )
>الضوئية هتلاقيها سهله جدا ف مذاكرتها وحتي لو مذاكرتهاش طول الترم تقدر تلمها ف نص يوم او يوم ع الاكثر
>الكهربيه فيها قوانين كتير جدا ومحتاجه شوية فهم بسيط مع تطبيق علي القوانين (و اللي ناوي علي كهربا باور يركز فيها شويه )
درجات المادة
المادة من 150 ( 30 اعمال السنه +30 عملي +90 امتحان فاينل )
#الرسم
طبعا وللأسف الشديد حاجة وحشة جدا انك هتخدها ترم واحد المادة كبيرة جداا المفروض تكون على السنة كلها ف هتكون مضغوط فيها جدا جدا بس اطمنك انك مش هتاخد وصفية وده جميل جدا
محتاج اني اكدلكوا عليه ف الاهتمام وحضور السيكشن و المحاضرة الرسم من 200 يعني يا ينزلك الارض يا يرفعك السما
لازم تتمرن كتير جدااا جداا خصوصا بتوع ثانوي متكسلش ومتزهقش منها
درجات المادة
الماده من 200 ( 80 اعمال سنه وده على السكاشن و اللوح + 120 امتحان فاينل )
درجات الترم التاني 750
السنه كلها من 1500
ف النهاية اهتموا بالحضور والمذاكره اول باول وبتمنى ليكو التوفيق
ونساعد بعض منبخلش على بعض بحاجة
حلوان حلوه بناسها #