مواد اعدادي هندسة كلية هندسة جامعة السويس
في البداية هنتكلم عن المواد ونبذه مختصرة عن كل مادة عندك وبعدين اقسام هندسة السويس
- فيزيا
مقسومة علي ترمين الترم الاول (فيزيا 1 )
فيزيا الحرارية هتدرس فيها الحرارة وكمية الحرارة والقانون الاول للديناميكا الحرارية والنظرية الحركية للغازات
الترم التاني هتدرس (فيزيا 2 )
هتدرس فيها فيزيا كهربية ومغناطيسية ، بصراحة المادة دي تعتبر من المواد التقيلة ف الترم التاني بتحتاج مجهود شوية ف المزاكرة بس إن شاء الله مع حضور المحاضرات والسكاشن الدنيا هتضبط اهم حاجة الحل الكتير والتركيز علي اسئلة الكتاب امتحان الفيزيا بيبقي McQ بس اصعب شوية لان لازم التركيز علي الي بيتقال ف المحاضرات
(فيزيا 1) من (150) وكذلك (فيزيا 2 ) برضوا
حضور معمل الفيزيا مهم وعليه درجات وحل الامتحانات السابقة (الميدترم 20) (المعمل 20) (أعمال السنة 20) (الفاينل 90).
- الميكانيكا
مقسومة إلي (الاستاتيكا والديناميكا )
هتاخد الترم الاول (استاتيكا)
مادة أغلبها حاجات عارفنها قبل كدة سواء انت خريج ثانوي عام او المدارس الفنية عدت عليك قبل كدا هتدرس فيها تحليل القوة الاتزان والتراس ومركز الثقل
هتاخد الترم التانى (الديناميكا ) هتاخد قوانين نيوتن والحركة ، المادة سهلة بس اهم حاجة فيها الحل الكتير وحضور المحاضرات والتطبيق في السكاشن والامتحانات السابقة (الاستاتيكا من 100) و (الديناميكا برضو من 100)
(ميدترم من 20) (اعمال السنة من 20)
(الفاينل 60)
- الرسم الهندسي
مادة جديدة عليك كطالب ثانوية عامة اما لو انت خريج مدارس فنية ف هتكون عارف اغلب الحجات وغالبا هتواجه صعوبات في الاول علشان تفهم الدنيا بس نصيحة مني ابدا شوف فيديوهات للمادة من اليوتيوب سواء كنت ثانوي عام علشان تتعلم اكتر او مدارس فنية علشان تزيد من معلوماتك احسن مكان علي اليتويوب هتستفيد منة (هو قناة الباشمهندس مصطفي خميس ) هتفيدك جدا وهتحتاجها كتير لان هتحضر بعد كده السكاشن وهتعرف انك استفدت
(حضور السكاشن مهم جداجدا وعليه درجات ) المادة 100، ( ميدترم20) ،(اعمال السنة 20) الفاينل (60)
- رياضة
مقسومة إلي (رياضة 1 ورياضة2)
هتدرس في الترم الاول رياضة 1 هتاخد فيها تفاضل وتكامل غالبا معظم الحاجات هتبقا عدت عليك قبل كدا الاشتقاق بأنواعه +اجزاء جديدة ،والتكامل نفس الكلام الجزئي والضمني وحاجات جديدة ،
الترم التاني هتدرس رياضة 2
هتاخد جبر وتحليلية واجزاء جديدة في التفاضل المادة دي مش سهلة ولا صعبة بس محتاجة تركيز وحل الشيتات والتركيز مع المعيدين والي بيتقال ف السكاشن اهم حاجة تحضر المحاضرات والسكاشن.
(رياضة 1 من 150) ( وكذلك رياضة 2) ، ( ميدترم 20) ,( اعمال سنة 40) ،( فاينل 90)
- الإنتاج
مادة جديدة عليك لو ثانوية عامة لذيدة جدا لو مدارس فنية ، هتواجه صعوبات في الاول لان كل الكلام اللي هتسمعه هيبقى اول مرة تسمعه اهم حاجة تحضر المحاضرات وتحاول تفهم منها علي قد م تقدر وتبحث كتير عن المصطلحات الي ممكن تكون اول مرة تسمعها .(المادة من 100) (اعمال سنة 40) و (فاينل60)
-تاريخ هندسي
مادة سهلة جدا هتتكلم عن تاريخ الهندسة وكل اقسام الهندسة وهتساعدك شوية انك تعرف معلومات عن الاقسام وأشهر واهم المهندسين ف كل مجال ،لذيدة جدا واهم حاجة (كلها عربي مفيش انجليزي ) ، المادة من (50 )
-الكيميا
هتدرس فيها حاجات زي الغازات والتفاعلات وصناعة الاسمنت اغلبها اجزاء من منهج الثانوية ،اهم حاجة تحضر كل محاضرات حضور المعمل مهم جداجدا عليه درجات وهيفيدك في امتحان العملي اهم حاجة الامتحانات السابقة McQ (المادة من 100) ، (الميدترم 20) (اعمال السنة + امتحان المعمل 30) ،( الفاينل من 50).
اقسام هندسة كلية هندسة جامعة السويس
بالنسبة لاقسام هندسة السويس
- قسم ميكانيكا عام وده بتخصص من بعد اعدادي بعد كدة القسم بينقسم لاتنين (ميكانيكا انتاج ) و ( ميكانيكا باور ).
- قسم مدني عام
وبنسبة كبيرة هيتم افتتاح مجموعة تانية من الاقسام داخل الكلية