ما هي كلية هندسة جامعة طنطا (مواد اعدادي هندسة والاقسام ) Faculty of Engineering Tanta University

ما هي كلية هندسة جامعة طنطا (مواد اعدادي هندسة والاقسام ) Faculty of Engineering Tanta University

كلية هندسة جامعة طنطا ، بالنسبة للنظام ف الكلية الدراسه صعبة بس مش بدرجة الصعوبة الى ف هندسة المنصورة او عين شمس او اسكندرية ومعظم كليات الهندسة التانيه لذلك بتلاقى معظم الناس بتقول عليها انها سهله يعنى لو حد داخل هيقضيها وفاكر انه هينجح وكدا يبقا بيدَخل نفسه ف طريق الدبلرة لانه مفيش هندسة كدا ف الدنيا

-الدكاترة ف طنطا حاجه جميلة والمعيدين متواضعين جداا ف اى وقت محتاح تسال دكتور او معيد عن اى حاجه معروف مكتبهم فين مش بيتاخروا عن اى طالب ف حاجه والمعيدين بيشرحوا كويس جداا بطريقة تستوعبها علطول وفيه منهم بيديك حرية الاختيار الى هو لو مش فاهم منى احضر مع معيد تانى وسجل غيابك

أقسام كلية الهندسة جامعة طنطا

الكلية عبارة عن اربع اقسام عام بالاضافه الى اربعه اقسام كريدت
الاقسام_ العامه
  • قسم الهندسة المدنيه القسم بيتعملوا تنسيق داخلى بعد الفرقة التانيه وبيتفرع لقسمين
    • قسم هندسة الانشاءات
    • قسم هندسة الرى والهيدروليكا
  • قسم الهندسة الكهربية وده بيتعمل فيه تنسيق داخلى بعد الفرقة الاولى وبيتفرع ل ٣ اقسام
    • قسم القوى والالات الكهربية
    • قسم هندسة الحاسبات والتحكم الالى
    • قسم الاتصالات والالكترونيات
  • قسم الهندسة المعمارية
  • قسم الهندسة الميكانيكية والقسم بيتعملوا تنسيق داخلى بعد الفرقة الاولى وبيتفرع لقسمين
    • قسم هندسة القوى الميكانيكية
    • قسم هندسة الانتاج والتصميم الميكانيكى
اقسام الساعات المعتمدة (الكريديت) ودى بمصروفات سنوية حوالى 20 الف فى السنه
  • برنامج هندسة الطاقة المتجددة
  • برنامج العمارة البيئية
  • برنامج الميكاترونكس : والدراسه فيه بتكون مزيج من الهندسة الميكانيكية والهندسة الكهربية وهندسة التحكم وقسم الروبوتات
  • برنامج هندسة التشييد : مميزات القسم عن مدنى العام انه بيكون على دراية اكتر باعمال المعمار والرسم عن مدنى العام

مواد اعدادي كلية هندسة جامعة طنطا 


ما هي كلية هندسة جامعة طنطا (مواد اعدادي هندسة والاقسام ) Faculty of Engineering Tanta University

هندرس فى اعدادى هندسة 13 مادة ، 6 مواد ترم اول ،7 ترم تانى

الترم الاول

رياضة
المادة من 150 درجه 50 ميدتيرم وحضور وكويزات و100 فاينال
المادة بتتقسم لجزئين جزء جبر وجزء تفاضل وكل جزء ليه دكتور خاص بيه دكاترة الرياضه كويسين جداا هتلاقى شوية صعوبة ف الفهم لان الدكاترة دماغها عالية شوية بس هيكرموك ف الاخر متقلقش منها بس احضر محاضرات وسكاشن واهتم بيهم جداا الدراسة بالانجليزى

فيزيا
المادة من 150 درجه ،50 كلهم على الميدتيرم لانك بتاخد اتنين ميدتيرم ف الفيزيا و 100 فاينال ، بتدرس جزئين فيزيا كهربية وخواص مادة كل جزء فيه فرعين
المادة تقيله شوية والدكاترة بتوع المادة تقال شوية محتاجه تركيز كبير وفهم اكتر لان الامتحان مش بييجى لا من المحاضرة ولا
السكشن محتاح تكون فاهم اكتر واهتم بالفيزيا كتير
المادة اربع فروع بيدرسها اربع دكاترة جزئين قبل الميد تيرم وجزئىن بعد الميدتيرم
المادة بيدرسها اربع دكاترة الدراسة بالعربى

كيميا
من اسهل المواد الى هترحب بيك ف اعدادى هندسة مادة لذيذة والدكاترة بتوعها كويسين جداا اهتم بالمحاضرة اولا ثم السكشن
المادة 14 شابتر بيدرسها 3 دكاترة
المادة من 125 درجه ،75 فاينال 50 ميدتيرم ومعمل وحضور
الامتحان بتاعها عبارة عن mcq ودى حاجه انا شيفاها كويسة بتقدر تجيب تقدير عالى ف المادة متقلقوش منها الدراسة بالانجليزى

حاسب
سميناها مادة الامتياز مادة بسيطه وسهله جداا بتتذاكر ليله الامتحان من 100 درجة 60 فاينال 40 معمل وحضور
الامتحان بتاعها mcq بيدرسها دكتورين الدراسة بالانجليزى

ميكانيكا
دى مادة بسيطة جداا يعتبر منهج ثانوية عامه بيتكرر الدراسة بالعربى من المواد الى هتحتاح تذاكرها مرة كل اسبوع مش هتبذل مجهود فيها لانها معلومات سابقة ، المادة من 200 درجة 140 فاينال 30 ميد اول و30 ميد تانى وملهاش فاينال ترم اول امتحانها النهائى بيكون ف اخر السنه بس بتتدرس ترمين ترم استاتيكا وترم ديناميكا ركزوا عليها عشان دة مادة التقدير

رسم هندسى
المادة من. 250 درجه 150 فاينال 50 ميد اول 50 ميد تانى ، ملهاش فاينال ترم اول برده امتحانها النهائى ف الترم التانى الرسم هياخد وقت كبير جدااا منك ف الاسبوع لانك هتحضر محاضرة وهتحضر سكشن وهتحل واجب ف البيت متتاخرش بفرحتك بالرسم لان فيه مواد تانيه اهم ادى كل مادة حقها ومتخليش كل مذاكرة الاسبوع رسم بس

الرسم سهل جداا لو تابعت باستمرار الرخم جداا الى هتقابله وهتكره الكلية بالى فيها الوصفيه دى ثلث منهج الرسم ده اصعب جزء ف الرسم ونصيحة كنت اتمنى حد يقولها ليا لو فيه وقت تتابع رسم دلوقتى قبل دخول الدراسة تابع لان الدراسة لما تبدا مش هيكون فيه وقت خالص

واهتموا بالرسم دكاترة الرسم صعبين شوية ومحتاح تكون مركز

مواد الترم التانى

طبعا الميكانيكا والرسم مكملين معانا ومنهج الترم الاول كله لسه معانا

فيزياء
بتكون برضو 150 درجه 100 فاينال 50 اتنين ميد تيرم بندرس ف الترم ده مغناطسية وحرارية وكل جزء بيكون ليه دكتورين الامتحان ف الترم ده بيكون mcq غالبا بيكون ابسط شوية من الترم الاول وناس كتير بتعوض فيزيا ف الترم ده عشان التوتال يكون مجموع كويس فيزيا نركز

رياضة
بنكمل الترم ده هندسة تحليلة وتكامل كل جزء ليه دكتور وطبعا 150 درجة للمادة 50 ميد وكويزات و100 فاينال الترم ده بيكون اتقل حاجه بسيطه من الترم الاول التفاضل اسهل من التكامل فنهتم اننا نجيب تقدير ترم اول عشان يعوض ترم تانى

هندسة الانتاج
المادة دى تقيلة شوية على الثانوية العامه محتاجة تركيز شديد اهتم بالرسومات جداا ف المادة اوعى تحفظ الانتاج فهم وليس حفظ المادة من 100 درجه 60 فاينال 20 ورشة 20 شفوى الدراسة بالعربى

تاريخ هندسى
مادة الامتياز مادة بسيطه وبتتذاكر ليلة الامتحان امتحانها mcq من 50 درجة وغالبا كلهم بيكونوا على الفاينال الدراسة بالعربى

اللغه
المادة دى السهل الممتنع ركز فيها جااااامد واحضر المحاضرات عشان فيها غياب واهتم بشرح الدكتور لانه بيجيبه ف الامتحان ركز على المادة جامد عشان دكاترتها تقيله شوية ، المادة من 50 درجة 10 ميد 40 فاينال

حقوق الانسان
دى مادة متعرفش عنها حاجه طول الترم وف الاخر فيه دكتور بيدخل يقول سؤالين بتذاكرهم وبييجوا ف الامتحان يعنى مادة نجاح ورسوب مش عليها درجات بس مادة رسوب

ودول مجموعة ملحوظات اهم من البوست نفسه ( نصائح لطلاب اعدادي هندسة طنطا )
  1. الانجليزى مش عقبة
  2. حاول تستغل الفترة الى باقية ف انك تتعلم حاجه مفيدة رسم مثلا او انك تقوى نفسك ف الانحليزى
  3. الجدع الى يفوق ويفهم النظام بسرعه
  4. بلاش غرور بمجموع الثانوية او المعهد وحس انك مقصر مهما ذاكرت عشان لو ريحت هتتعب جامد
  5.  اليوتيوب هو اهم وسيلة مساعدة ليك ة
  6. الانجليزى مش عقبة
  7.  المحاضرة الى مش بتفهم منها متضعيش وقتها ع الفاضى حاول تحضر مكانها سكشن تستفاد منه
  8. الميد تيرم مهم مهم جداا عشان درجاته بتسند معاك فى الفاينال والى بيجيب 6 من 30 ده حد مكانش بيذاكر اصلا والى بيقولك غير كداا بيحبطك
  9.  الانجليزى مش عقبة
بالتوفيق ان شاء الله وربنا يكرمنا جميعا



حجم الخط
+
16
-
تباعد السطور
+
2
-