هندسة أسيوط صعبه لناس وسهله علي ناس زي اي حاجه في الدنيا لو عاوز ترتاح لازم تكون من الناس الهاديه للي بتاخد الامور ببساطه مش بستهتار وبعدين تبدا تدخل لفي جو الكليه وتتابع المحاضرات والسكاشن والدنيا هتتظبط معاك ان شاء الله .
الترم الاول بهندسة اسيوط عندك
- مواد مكمله معاك للترم التاني : رياضيات و فيزياء و ميكانيكا ورسم هندسي واسقاط وصفي وتكنولوجيا الانتاج
- ومواد منتهيه : برمجه وانجليزي وحقوق انسان
الترم التاني هتكمل المواد الممتده وهتاخد مواد جديدة زي : الكيمياء و تاريخ العلوم الهندسية
مواد اعدادي هندسة اسيوط
الرياضيات
- الدرجات : 50 درجة ( أعمال سنة + درجة شيتات ) 100 درجة امتحان فاينال
- عدد المحاضرات والسكاشن : محاضرتين في الاسبوع كل محاضرة ساعتين والسكاشن سكشن واحد في الاسبوع
- اللغة : العربيه ما عدا الرموز بالانجلش
المادة مكونة من 4 فروع
- جبر وتفاضل – ترم أول
- هندسة تحليلية وتكامل – ترم تاني
المادة بيديها دكاترة من كلية العلوم وغالبا الدكتور محمد عزب جبر
اكيد خدت رياضة وعارف الجبر والتفاضل ، اللي هيكون مختلف معاك بس هيا شوية الرموز بتاعت الكتاب
- ف الجبر هتدرس ( المتسلسلات والكسور الجزيئية والجذور وطرق نيوتن رافسون الخ .. )
- في التفاضل هتدرس ( النهايات والاتصال والدوال والتفاضل بكافة انواعه )
رياضة ترم تاني عبارة هندسة تحايلية و تكامل تقريباً نفس دكاترة الترم الاول او بيدبدلو بين المدرجين بس الميد 40 درجة و 10 شيت و الفاينال 100 الدرجة الكلية 150
المادة بشكل عام مش صعبه بس هي كبيرة شويه ومحتاجه صبر ومزاكرة ، بس عايزة حل كتير خاصةَ " التفاضل " لان التفاضل ماهو الا مهارة
طب ايه نظامها ؟
- بص ، مش عايز اقولك ان الاستفادة القصوى هتاخدها من المحاضرات ...
- لا المحاضرات هتفهمك الدرس بشكل عام
- + وركز ع دي " ان الدكتور ساعات بيرمي كلمه بفكرة كدة يجيبها ف الامتحان ف تركز في كلامه " دا الناس اللي عايزة امتياز
- اذا ملاااااااااااحظة مهمة جداااا ولازم تحطها قدام عينيك مادام بتاخد حاجة من علوم : [[ اي مادة من علوم = امتحانات سابقة = متكررة = درجة عالية وتقدير
- مزاكر ، ومحلتش امتحانات سابقة = احتمال تشيل
الحاسبات والبرمجة
اول حاجة نتكلم معلومات عامة عن المادة :
- قسم المادة : كهربا
- اللغة : الانجليزية
- تقسيم الدرجات : 30 درجة اعمال سنة مقسمة ( امتحان ميدتيرم + كويز + غياب + سكاشن + شيتات ) + 70 درجة امتحان الفاينال ..
- عد المحاضرات والسكاشن : محاضرة اسبوعيا ( ساعتين ) + سكشن اسبوعيا ( ساعتين )
- احنا اتفقنا على الصراحة ومش هنلمع عشان متتصدموش المادة في الواقع هي مشكلة كل دفعة اعداادي هندسة على مر تاريخ هندسة أسيوط
- يمكن مشكلتها ، في أن امتحانتها دائما ما بتبقا جديدة وفيها حبَة ابتكار ، او يمكن الطلبة مش عارفة تتعامل مع المادة وبتعتبرها مادة حفظ ، فيه ناس جابت تقدير فيها وامتياز وافتكر اني من الناس اللي جبت فيها جيد جدا بحضور السكاشن والمذاكرة اول باول.
طيب م نيجي نرتب مشاكل في الأول للطلبة ؟
اولا : اللغة ، بتبقا مشكلتك ف اول كام اسبوع كدة وعشان كدة المادة هتتطلب منك مجهود في الأول انك تفهم هما بيقولو ايه هتمسك القاموس الdictionary في الأول اسبوع اتنين لحد م تتعود على الفهم من غير قاموس
ملاحظة مهمة جدا جدا : احنا في المادة بنعرف مصطلححات مش بنتكلم بـ grammar ، يعني مش شرط الجملة تكون صحيحة لغويا – قد م الجملة تكون صح " كمعلومة " توصلها للمُصحح اعتقد فهمتوني
ثانيا : نظام المادة :
المادة بتتكون من شقين أساسين ..
1- السوفتوير والهاردوير
- يعتبر 70% من الجزء دا حفظ – ( حفظ بفهم ) انا بكرر تحفظ انت وفاااهم لان المادة ممكن يتلعب ف اسئلتها عشان تبين مين الفاهم والحافظ بس
- الجزء دا بيتكلم عن برمجيات الحاسب الآلي وبيتكلم عن أجزاء الحاسب الآلي من RAM و HardDIsk و mother board .. الخ وبيتكلم ازاي تحسب الرام وسعه التخزين وفيه شوية مسائل عليه عامة .. ( جزء الفهم )
- الجزء ده بعتبره سهل في حااااااالة – " اتذاكر اول بأول " لانه جزء دسم يعني وهتحفظ بالانجلش خلي بالك
2- لغة البرمجة C++
- الشق الثاني من المادة هيا لغة برمجة ، وفي الجزء دا هتتعلم لغة من لغات البرمجة الكتيير جدااا وهتتعلم قواعدها وازاي تكتب CODE وازاي تعمل برامج " بسيطة جدا "
- القسم دا هو قسم اللف والدوران واللعب في الامتحاناات
- لان القسم دا مفيهوش غير " حفظ " قواعد اللغة
- واستخدامها وطريقتها وبتاع دا كله فهمم فهم فهم فهم
- بمعنى القسم دا لازم تفهمو مش تحفظو !!
كلمة مهمة جدا هقولهالكم وياريت تفهموها وتخلوها دايما في بالكم :
- " خوفت ؟ قلقت ؟ هتدخل المحاضرة مش هتفهم حاجة ، المحاضرة التانية بردو مش فاهم حاجة ، والله دا طبيعي جدا وكلنا مر علينا كدة ، هتيأس هيحصلك كدة – بس اياك تعيش في حالة اليأس دي كتير ، المادة عايزة حتة تعب شوية ، وبعد كدة هتلعب بيها لعب والله - والتقدير والامتياز لا انت اقل من حد ف حاجة ولا حد احسن منك في حاجة " انت مهندس ^^ -- يعني بتحل المشاكل وآدي اول مشكلة واجهتك هتعرف تحلها وتعديها وبنجاح عالي
ملاحظة مهمة
- ازاكر الماده من فين .... بينزلك مرجع كبير تزاكر منوا ودا حوار المرجع دا بيتلخص في الاخر لعدد صفحات اقل وبيترجم فالدنيا بتكون احلي دا الجزء النظري طيب الجزء التاني بتاع اللغه دا بتزاكروا من ورق الكورسات وبينزلوا مزكرات في المكتبه وتسمعله فيديوهات من اليوتيوب زي مثلا محمد الدسوقي من احسن الناس اللي بتشرح اللغه
- " كترت الملاحظات " : دكاترة المادة متخليهمش يزعلو احضروا ، ومتعملوش مشاكل – دكاترة المادة دي لما بتزعل ، انتو بتزعلو جامد بعدين #افتكروها
- اهتمو بالمحاضرة " مش عشان بتفهمو منها – عشان دكاترة المادة بيدققو ع الحضور ولو لاحظو عدم حضور بيتدايقو " والسكشن دا مهم جداا متغيبش نهائي لانك هتفهم المادة منه وهتتابع معاه وبينزلك شيتات تحلها وتسلمها
الفيزياء
معلومات عامة عن المادة :
- الكلية : علوم
- الدرجات : ( 30 درجة أعمال سنة + 30 درجة امتحان عملي + 90 درجة امتحان فاينال )
- اللغة : العربية ما عدا العملي ف دا بالانجلش علفكرا الامتحان ممكن يجيلك بالانجلش علي حسب الدكتور عادي يعني ..
- عدد المحاضرات والسكاشن : هيبقا محاضرتين في الاسبوع + سكشن مدته ساعتين
المادة بتحتوي 4 فروع هتدرس فرعين منهم في الترم الأول اللي هما [ الحرارية + خواص المادة ]
مشكلة المادة دي فإن دكاترتها بيتغيرو باستمرار يعني على #سنتنا كان الدكتورين كويسين جدا جدا وكانت سنة الامتيازات في الفيزيا
- السنة اللي فاتت في الترم الاول كانو [ د.حسام وحيد و د.غاده عبادي]
- وعايز اقولك ان لو الدكتورين هما اللي هيدرسوكم المادة ف خدها مني انك هتجيب جيد جدا الى امتياز في المادة دي لانهم أفضل دكتورين الصراحة شوفتهم
عموما خدها قاعدة [ تقديرك في المادة بيعتمد بشكل كبير ع دكتور المادة ]
- في فرع الحرارية هتدرس التريمومتر والآلات الحرارية والتمدد وبعد كدة هتدخل ع الديناميكا الحرارية والقوانين بتاعتها ودا الدكتور حسام
- اما في خواص المادة ف هتدرس سلوك المادة من مرونة ولدونة والصوت والحركة في الفضاء ودي الدكتورة غاده وحاجات تانية يعني
فزيا الترم التاني بقا عبارة عن كهربية و مغناطيسية كل دكتور لية فرع و عبارة عن 30 ميد و 30 عملي و 90 فاينال
نييجي بقا للعملي .
- بيبقا سكشن لمدة ساعتين ومكان السكشن هيبقا في #كلية_العلوم_قسم_فيزيا
- هناك هتاخد شوية تجارب على الحرارة منهم تجارب بويل وشارل والتمدد الحراري
- وفي خواص المادة هتاخد شوية تجارب هتعلمك ازاي مثلا تقيس اللزوجة لسائل معين وهكذا ..
- الامتحان بتاع العملي بيبقا شقًين [ هتجيلك تجربة وحدة هتعملها من اللي انت خدتهم في المعمل وتطلع نتايجهم وتسلمه + هتمتحن اونلاين 10 اسئلة على الكمبيوتر ودول بصراحة عشان مكدبش عليك بتيجي بالحظ لان مبيبقاش حد مزاكر نظري التجارب الانجلش ف كتاب العملي لان الامتحان الاونلاين عبارة عن نظري العملي ]
الكتب [ كتب جميلة جدا وهتفهم منها الدرس ومبسطة الموضوع ف لازم تجيبها وتفهم منها على عكس كتب الرياضة اللي اتكلمنا عليها ]
ازاي ازاكر المادة ؟
- بتزاكر المادة من كتاب المادة + سلايدات "شرح على الكمبيوتر بتاع المحاضرة خاصة بالدكتور " + امتحانات سابقة ." لدكتور لمادة اللي بيدرسك "
- " وخلي بالك من الكلمة دي .. متحلش امتحانات لدكتور تاني لان كل دكتور له نظامه.
- اهم حاجه الدكتورة غاده دكتورة بتشرح كويس جدا لكن عصبيه ومبتحبش اي حاجه تعطل المحاضرة زي التليفون وكدا هتكسره لو رن في المحاضرة اما بقي الدكتور حسام ودا احلي دكتور هيديك في اعدادي كلها دكتور رزق من عند ربنا .
تكنولوجيا الانتاج
معلومات عن المادة :
- القسم : ميكانيكا
- الدرجات : 150 درجة
- عدد المحاضرات : محاضرة أسبوعيا لمدة ساعة وحدة + ورش لمدة " ساعتين "
- اللغة : العربية
المادة دكتورمحمود حشمت
المادة حلوة وبسيطة وجميلة جدا ،
بتتكلم عن المواد والسلوك بتاعها في الأول وبعد كدة بيديك طرق تشغيل للادوات دي من #سباكة والمقصود بسباكة هنا هوا تشكيل المعدن في حالته السائلة .. زي لما يقولو #سبيكه_ذهب يعني مش مواسير خالص وشغل شقق
وبعد كدة حدادة وطرد مركزي وغرفة باردة وساخنة وحاجات كدة ليها علاقة بتشكيل المواد وانتاجها وبعد كدة بتدخل في طرق التشغيل الآلية من الخراطة والى اخره
الماده ليها محاضرة ساعة كل اسبوع لازم تحضر او ممكن تشوف المحاضرات علي قناة الدكتور علي اليوتيوب هتلاقي شرح مفصل وفيديوهات توضيحية للعمليات المختلفة.
بعد كدة بنيجي للورش ..
ودا هوا العملي بتاع المادة .. بتجيب البالطو الابيض بتاعك وبنجيبه ابيض عشان منشتريش واحد تاني للكيميا الترم التاني
وبتاخد فيهاه تطبيقات عملية وهتشوف كل حاجة بتحصل انت بتاخدها في النظري في المحاضرة .. عن طريق فنيين " مش معيدين " في الورش دي ..
المادة دي ملهاش امتحان فاينل في الترم الاول
هوا امتحان ميدتيرم + شفوي الترم الأول + عملي + كراسة الانتاج ..
وزي الحاجات اللي قلتها دي ترم تاني
وف اخر السنة هتمتحن الترم الاول والترم التاني مع بعض امتحان فاينل
متتخضش .. المادة بتتلم عادي
بس مشكلتها " الدرجاااااااااااااااااااااااااااااااااااااات " تقدر تلمها وتشوف اسئلة امتحانات سابقة للدكتور وتجيب فيها تقدير كويس بس لازم تركز علي كلام الدكتور ف المحاضرات.
المادة سهله كمزاكرة وهتلمها عادي جدا لان امتحاناتها عبارة عن " رســـم خطوات " يعني يقولك عايز لخطوات بالرسم اللي تخليني اطلع " المنتج " ده.
الميكانيكا
معلومات عن الماده :
- الكليه: علوم
- الدرجات :200 درجه مقسمه لفرعين كل فرع ف ترم
- عدد المحاضرات والسكاشن: محاضره كل اسبوع وسكشن كل اسبوع لمده ساعتين
اولا الماده ملهاش فاينال ترم اول
بمعنى انت هتاخد الترم الاول الفرع الاول ( الاستاتيكا)
وهتمتحن فيه ميدتيرم ب 30 درجه والشيت زي شيتات الرياضه ب 10 درجات
الماده في ترمها الاول هتدرس فبها اتزان الاجسام والجملونات والقوى وتحليلها والاحتكاك وحاجات تانيه..
الماده زيها زي اي ماده لكليه علوم
ف عشان مقعدش اقول نفس الكلام وكده.. طبق طرق المزاكره اللي قولتها عن ماده الرياضيات بالنص..
وزي م قلت هناك هقول هنا
الميكانيكا ترم تاني ديناميكا ليها ميد ب30 درجة و الامتحان الفاينال مع الإستاتيكا
الماده من علوم يعني لاااازم تحل امتحانات سابقه
شدو حيلكم ف الترم الاول وجمعو درجات في الاستاتيكا عشان الديناميكا مش هتحبوها خالص الاستاتيكا بيديها دكتور عادل حنا من علوم
اللغة الانجليزية الفنية
معلومات عن المادة :
- الكلية : آداب
- الدرجة : 50 درجة [ 10 أعمال سنة + 40 فاينال ]
- عدد الساعات : هوا سكشن واحد لمدة ساعتين في المدرج وبس
- دي مادة تقدير
- " شوية مصطلحات على قطع على مواضيع خفيفة مع سكشن خفيف بس المهم متخلوش الدكاترة ياخدو عنكم حاجة وحشة ، ولو خدو ايه يعني .. ودكاترتها كويسين المحاضرة عبارة عن ساعتين الدكتورة بتشرح نص ساعه وبتروح المهم هيا مادة تقدير ف متضيعوهاش " لانها بتتضاف للمجموع
كيمياء
- بيدينا 5 دكاترة كل دكتور فرع و هي 5 فروع فى الغالب بيتغيرو الا دكتور عوّاد هو الي مش بيتغير
- فيها عملي علية20 درجة و الميد علية 20 و الفاينال 60 الدرجة الكلية من
- الماده شديده وعاوزه مزاكرة كويس وحضور والسكاشن عشان بيكون فيه امتحان 100
الرسم الهندسي
المادة دي هتحسسك انك دخلت هندسة وهترسم بقا وتبقي قد الدنيا
- مبدائياً كدا المادة ملهاش محاضرة بتكون سكشن واحد في الاسبوع ٣ ساعات عليها ١٥٠
- ٣٠ اعمال سنة ترم اول و٣٠ اعمال ترم تاني وفاينل ف اخر السنة من٩٠ بلاش تضيعوا ٦٠ اعمال الترمين حضور ولوحات وميدتيرمات مضمونين أكتر من الفاينال
طبعا هتشتري أدواتك هيقولوك عليها اول سكشن وهنزلهالك في البوست كصورة
اهم حاجة الحضور عشان عليه درجات وبلاش تاخير عشان متتطردش وخلي بالك ومتنساش الكتاب ولا الأدوات
طبعا الدكتور هيشرح جزئية معينة وبعدين يحدد رسمتين من الكتاب ترسموهم ف ألسكشن طبعا لازم تعود نفسك ع السرعة ف الرسم وتخليك دقيق ف رسمك ولوحتك نضيفة واسال المعيد فأي حاجة مش فاهمها هيشرحالك وحاول تخلص اللوحة ف ألسكشن عشان تتعود عالسرعة
بعد كل سكشن هيبقا عليك شيت او لوحة هترسمها ف البيت من كراسة الي هتشتريها مع الكتاب ولازم يتسلم ألسكشن الي بعدوا هو و لوحة ألسكشن الي فات لو مكنتش خلصتها ف سكشنها
نصيحة ياريت ترسم الشيت لوحدك ولو وقفت معاك حاجة اسأل المعيد اسأل زمايلك بس لازم ترسمه لوحدك لو عايز تنجح ف الامتحان
نيجي بقا للميدتيرمات ايوة هما كتير
- ٣ ميدتيرم ف الترم يعني بعد كل سكشنين او ثلاثة هتلاقي ف ميدتيرم
- والميدترم الواحد عليه ١٠٠ متخضوش ال٣بيتجمعوا ويتقسموا وبيخدوا معدل حاجات كدا ومع الحضور واللوحات وكلهم يبقوا ٣٠ درجة بقدرة قادر
- الميدتيرم مش بكون صعبة بس لازم تكون سريع لان الامتحان بيبقا ساعتين بس تخلص فيهم الرسمتين
نيجي بقا للفاينال بتمتحنوا مع الإسقاط الوصفي ٤ ساعات ودا اخر السنة خالص
- الرسم بيبقا ٩٠ والإسقاط ٦٠ ف الفاينال
- والمادتين مع بعض ٢٥٠
- وخلي بالك ان الإسقاط هوا الي بينجحك ف الفاينال مش الرسم
الإسقاط الوصفي
مادة مضمونة يعني المفروض تجمع فيها درجات
المادة عبارة عن مسائل ليها معطيات وانت ترسمها بقا هتعرف لما تشوفها في الاول هتتخض بعدين هتراقي نفسك ماشي كويس فيها من السكشن بتاع البشمهندس محمد يوسف دا عسليه بجد
بتكون محاضرة وسكشن ف الاسبوع الواحد
دكتورين بيدوا المادة دكتور يوسف ودكتور الشافعي
بس انت شاطر وهتحضر لدكتور يوسف دا لمصلحتك
بص يا تصور المحاضرة يا اما تكتب وترسم ورا الدكتور المهم يكون معاك مصدر عشان تذاكر منو
ولازم تحضر ألسكشن عشان تفهم و ياريت ترسم وتكتب خطوات ورا المعيد وبياخدوا غياب
ياريت تذاكر المادة اول بأول وتكتب خطوات الرسم عشان بتتنسي
المادة من ١٠٠
٢٠ اعمال ترم اول و٢٠ اعمال ترم تاني و٦٠ فاينال
عندك ٢ ميدتيرم المفروض واحد الترم الاول والتاني الترم التاني بس احنا امتحناهم الاتنين الترم التاني
ودكتور يوسف بيسألكم اصلا عايزين الامتحان امتا وكمان لو كنتوا كويسين بيديكوا جزئيات الامتحان المهم ان دول ٤٠ درجة ببلاش حرام تنقص فيهم
الفاينال بقا بيبقا مع الرسم الهندسي ٤ ساعات
انت هتخلي ساعة اسقاط وبعدين ٣ ساعات رسم
دكتور يوسف ف الغالب بيحدد مسائل تركز عليها للفاينال
طبعا لازم تحل امتحانات قديمة عشان بتتكرر وتخلي بالك الي الجزئيات الي هتدرسوها ف المادة عشان هيا كبيرة ومش بتاخدوها كلها عشان كدا ضروري تحضر المحاضرة
الإسقاط والرسم عليهم ٢٥٠
والإسقاط هوا الي بينجحك ف الفاينال مش الرسم
وفي الرسم ابقا شوف امتحانات قديمة
حقوق الانسان
- من ٥٠ درجة مادة سهلة اهم حاجة تشتري الكتاب عشان علية درجات.
اقسام كلية الهندسة جامعة اسيوط
يوجد بهندسة اسيوط الكثير من الاقسام المهمة في المستقبل وسوق العمل مثل
- مدني
- عمارة
- كهرباء باور
- كهرباء حاسبات
- كهرباء اتصالات
- ميكانيكا باور
- ميكانيكا انتاج
- ميكاترونكس
- تعدين .
الاقسام الكريديت بهندسة اسيوط
- ميكاترونكس
- عمارة داخلي
- تشيد وادارة المشروعات
- طبية احتمال كبير تفتح السنادي
لكن الاقسام الكريديت بتدخل تدرس الخمس سنين كلهم في القسم .
قد يهمك ايضا قراءة الاتي
- تعرف علي كلية الهندسة جامعة الفيوم | اقسام هندسة الفيوم
- كلية الهندسة جامعة المنيا
- هندسة شبين الكوم
- ما هي كلية هندسة الكترونية بمنوف جامعة المنوفية
- مواد واقسام هندسة اسيوط
- اقسام كلية الهندسة جامعة الإسكندرية وتنسيق هندسة الاسكندرية
- أقسام هندسة شبين الكوم ونظام الساعات المعتمدة .
- مهم لكل المقبلين علي دراسة كلية الهندسة ( نصائح اعدادى هندسه)
- تنسيق كليات الهندسة 2020 - بريمو هندسة
- بالتفاصيل ايهما افضل هندسة الشروق ام هندسة العاشر؟
- تحميل امتحانات السنين السابقة جميع فرق كلية هندسة جامعة عين شمس
- اقسام كلية الهندسة جامعة أسيوط وتنسيق 2020
- مواد كلية هندسة جامعة اسيوط بالتفصيل
- مهم لكل المقبلين علي دراسة كلية الهندسة ( نصائح اعدادى هندسه)
- جميع كورسات مواد كلية هندسة في جميع التخصصات
- تنسيق كليات الهندسة 2020
- كليات الهندسة والتمريض المتاحة لطلاب المرحلة الثانية
- مصاريف هندسة الشروق لعام2017 ولعام 2018 ومواد اعدادي هندسة