أخر الاخبار

ما هي كلية هندسة شبين الكوم جامعة المنوفيه (مواد اعدادي هندسة والاقسام )

ما هي كلية هندسة جامعة المنوفيه (مواد اعدادي هندسة والاقسام )

مواد اعدادي هندسة شبين الكوم جامعة المنوفية

مواد الترم الاول بهندسة شبين هي

فيزيا 1 أ
  • دي من ٢٥٠ درجه ومقسومه ع الترمين كل ترم ١٢٥ درجه
  • بيبقي منهم ٥٠ درجه أعمال سنه ف كل ترم ٣٠ للميد و٢٠ للمعامل بقا والشفوي والماده كان ليها ٣ دكاتره
  • الجزء الأول د سيد فرج كله اثباتات

رياضه 1 أ
  • دي تفاضل وجبر معظمها ٣ ثانوي واو تقريبا كلها يعني وبالذات التفاضل
  • دي كان علي أيامنا كان بيدينا تفاضل د اسلام الدسوقي بس اللي بيديها دلوقتي د.رزق والجبر د.سارة
  • والماده من ٣٠٠ مقسومه بردو ترمين ١٥٠ ترم اول و١٥٠ ترم تاني منهم ٥٠ بردو أعمال سنه الدكاترة بتوزعهم بقا علي أعمال السنه ف الترم

انتاج
  • دي ماده مقسومه جزئين تشكيل وتشغيل
  • عباره بقا عن ماكينات وورش حاجات كمان كدا
  • الماده دي من ١٠٠ منهم ٦٠ فاينال وأربعين أعمال سنه الدكتور بيوزعهم بمزاجه بردو
  • الماده دي بيدخل فيها حوالي ٤ دكاتره
  • الماده دي هيا والكيميا بيبقي مجموعتين مثلا الترم الاول إنتاج ومجموعتين كيميا وبتبدل ف الترم التاني
  • وتقريبا الطلبه كلها بتصتصعبها حبتين بسبب كم المعلومات اللي فيها .. فعلشان كدة يفضل انك تذاكرها أول بأول علشان ما تتراكمش عليك

تاريخ هندسي
  • الماده دي من ٧٥ درجه : ٢٥ أعمال سنه و٥٠ فاينال
  • ودي بقا بتدرس فيها حاجه زي نبذه عن كل قسم وشويه حاجات كمان كدا
  • بيدرسها د عماد عامر وكيل الكليه سابقا

الجوده

  • دي ماده سهله كدا مش بتنضاف للمجموع دي من ٢٠ درجه كلهم فاينال تقريبا

رسم هندسي
  • دا بتبدء ف الترم الاول ترسم الايزومتريك والمساقط بتاعته
  • وف اخر الترم بتبدء تستنتج المسقط التالت لوحدك وبتكمل عليهم ف الترم التاني وتاخد بقا القطاعات والتهشير والاستيل وبتختم بالوصفية والكلام دا
الماده من ٣٠٠ منهم :-
  •  ١٢٠ أعمال سنه منهم ٢ ميدترم واحد في الترم الأول و واحد في الترم التاني
  • ١٨٠ فاينال وبتمتحنه في آخر السنة

مواد اعدادي هندسة الترم الثاني بهندسة شبين الكوم

رياضه ١ ب
  • دي تكامل وهندسه تحليليه
  • التكامل اللي كنت بتاخده ف ثانوي دا بيساعدك ف الحل بس مش اكتر عشان دا بتوسع حبتين
  • الهندسة التحليليه بيدرسها د مي والتكامل د محمد مجدي وتوزيعه الدرجات نفس الترم الاول بالظبط

فيزيا ١ ب

بيدرسها د سيد فرج دا جزء اثباتات وشويه مسائل كدا ود قاسم ود رجب والجزء دا فيه شويه من ثانوي وبردو نفس توزيع درجات الترم الاول

كيمياء
  • بيدرسها د شهراذاد و د مها ود داليا
  • وبيبقي عندك شويه مسائل كدا هما طوال شويه بس بذاكرهم وبتروح تلاقيهم ف الامتحان زي مسأله الاحتراق ومساله الأسمنت و مسألة معالجة المياه والماده من ١٠٠ منهم ٦٠ فاينل و٢٠ ميد وعشرين معمل وشفوي

حقوق انسان
  • دي من ٢٠ بردو زي الجوده ومش بتنضاف بردو للمجموع

ميكانيكا
تنقسم إلي ثلاثة أقسام : إستاتيكا بيدرسها د بلال
  • ديناميكا بيدرسها د رمزي و د أحمد داود
  • هندسة فراغية بيدرسها د محمد مجدي غير دكتور التكامل دي بتحتاج حل كتير عشان مسائلها كتير وافكارها كتير
  • الاستاتيكا هتدرسها الترم الاول والهندسة الفراغية كذلك وهتمتحن على كل جزء منهم ميد ولكن الفاينل فأخر السنة بتمتحن فيه علي الميكانيكا كلها بيبقي مدة الإمتحان ٣ ساعات
الماده من ٢٠٠ مقسمة كالآتي
  • ٦٠ درجة مقسم على ٤ امتحانات ميدترم
  • ١٤٠ درجة للفاينال كل دكتور ليه ٣٥ درجة

الرسم الهندسي
  • الرسم بقا زي م قولت هتمتحنه ف الترم التاني بس
  • بتمتحن بقا علي كل اللي خدته ترم اول وتاني بتوزيعه الدرجات اللي قولتها قبل كدا

برمجة وحاسب آلي
  • الماده من ٧٥ زي التاريخ الهندسي بتاع الترم الاول
  • بتدرس فيها مقدمة عن الكمبيوتر و البوابات وخرائط التدفق وبتعمل اكواد وشويه حاجات كمان كدا الفاينل بتاعها من ٥٠ واعمال السنه ٢٥ منهم ١٥ ميد و ١٠ معمل والعملي

لغه
  • دي بتاخدها ف الترمين وبتمتحن فيها ف الترم التاني بس
  • امتحانها بيبقي عامل زي امتحان الانجليزي اللي كنت بتمتحنه قبل كدا ف السنين اللي فاتت
  • بتاخد محاضرة كل أسبوعين وخلاص ودي ماده امتياز يعني
  • الماده من ١٠٠ منهم ٨٠ فاينل و٢٠ أعمال سنه

اقسام هندسة شبين الكوم جامعة المنوفية

يوجد بهندسة شبين 5 اقسام عامه و4 اقسام كريدت خاصه بمصاريف

الاقسام العامه بهندسة شبين
  1. هندسه القوى الكهربائية
  2. هندسه القوي الميكانيكيه
  3. هندسه الانتاج
  4. هندسه مدنية
  5. هندسه معمارية

الاقسام الكريدت هندسة شبين الخاصه
  1. هندسة الكهرباء والحاسب
  2. هندسة الميكاترونيات
  3. هندسة الطاقه المتجدده
  4. هندسه البنيه التحتيه والمياه

بس خلاص وتقريبا دي الخلاصه بتاعت السنه كلها وهيا سنه سهله خالص بس للي يذاكرلها من اول يوم او م الآخر كدا لازم تديها اهتمام الثانويه كدا والا هتلاقي نفسك بتضيع

قد يهمك ايضا قراءة الاتي