القائمة الرئيسية

الصفحات

أقسام هندسة القاهرة بالتفصيل ازاى اعرف انا عايز قسم ايه او ان ده مكانى فعلا؟

أقسام هندسة القاهرة بالتفصيل ازاى اعرف انا عايز قسم ايه او ان ده مكانى فعلا؟

كتبت - Amatullah Ali

ازاى اعرف انا عايز قسم ايه او ان ده مكانى فعلا؟ Micro engineer life

من خلال تجربتي بيكون ده اول سؤال بييجي ف بالك اول ما تجيلك هندسة القاهره ف الترشيح او مع اول محاضره ف الكليه، اولا خلينا متفقين ان ما دام ربنا رزقك بالكليه دي يبقى ده مكانك اكيد ف ما تستسلمش لمجرد انك لاقيت شوية معوقات من الطبيعي تكون موجوده في اي كليه ، ثانيا انا هبدأ معاك من الصفر من اعدادي لحد الاقسام و مجالاتها


مواد اعدادى هندسة القاهرة

الدراسه ف هندسة عموما بتكون خمس سنين كل سنه بمجموع 1500 درجة ، منهم سنه اسمها "اعدادى" ، و دي بتكون اول سنه في الكليه ،  في السنه دي بتدرس مواد كتير و على اساس حبك للمواد دي بتقدر تحدد انت عايز ايه  و المواد اللى بتدرس عندنا هي:

1-   جبر و تفاضل                                                                                2- تكامل و هندسة تحليليه

دول من المواد المهمه جدا و اللي بتكون ب 150 درجة و حرفيا لو دخلت اي قسم هتحتاجها ، نصيحتى فيهم هي انك تحل ب إيدك امتحانات كتير جدا و تحاول تظبط  وقت لنفسك و تقول هخلص فيه و إياك تبص على الحل بتاع المسأله الا لما تكون فكرت فيها 20 دقيقة على الاقل

3-   فيزياء كهربيه و مغناطيسيه

المادة دي ب 150 و مضمونها عن الكهرباء و الشحنات و المجال المغناطيسي ، هي مادة تقيله و لكن لذيذة و هتحس بمتعه و انت بتدرسها و يهمنى تكون فاهمها جدا خاصة لو انت ناوي من الاول على قسم من الاقسام الكهربيه (  اللى هما اتصالات ، كهربا ، طبيه )

4-   الحراره و الخواص الميكانيكيه للمادة

دي مادة ب 150 و بتتكلم عن الموائع و اللزوجه و حاجات من الجميل انك تعرفها و هي مش صعبه خالص بس محتاجه حل كتير

5-   استاتيكا                                                                                              6- ديناميكا

دول من المواد اللي لازم تحل فيهم بإيدك كتير جدا جدا و تجمع افكار كويسه و تكون فاهم اوى عشان امتحاناتهم بيهمها السرعه و الحل الصح و كل مادة منهم ب 100 درجة

7-   مقرر انسانى

دي مادة ب 100 درجة، و هي بسيطة بتتكلم عن البيئه و التلوث و ممتعه جدا بس محتاجه فهم لان امتحاناتها بتعتمد على كدة

8-   الكيمياء العامة للمهندسين

بتتكلم عن الكيميا الهندسية يعني كيميا المصانع اكتر و المخلفات الصناعيه و طرق التعامل معاها و هي ب 100 درجة ، و ما تقلقش مادة جميله

9-   رسم هندسي

ب 150 درجة و دي جواها تلات اجزاء، جزء رسم مدنى ، جزء معماري و جزء ميكانيكى ، و دي من المعروف انها مادة تقدير ، يهمنى فيها انك تدرب نفسك على التخيل اكتر و بس

10-                   اساسيات هندسة التصنيع

هي اه ب 100 درجة بس من اكتر المواد اللي عليها جدل واسع عندنا ، هتلاقي ناس بتحبها و ناس نفسها تعدي منها صافي، بتتكلم عن السباكة و الخراطة و اللحام و لكن بتوسع، حاول تحل فيها كتير و تكون فاهم و هتلاقي نتيجة كويسه

11-                   مقدمة للبرمجة

هنا بتدرس لغه برمجه اسمها C++ مش بشكل واسع بس بتديك خلفية كويسه عنها و دي ب 100 درجة، اهم حاجه الفهم و الحل الكتير

12-                   تطبيقات هندسية

دي مادة لذيذة ب 150 و فيها بتعمل مشروع انت و التيم بتاعك و بيساعدك فيها المعيد المسئول عن التيم ده و في العادة دي مادة تقدير و هتلاقي نفسك فرحان بنفسك جدا فيها

Ø    كده يبقى اتكلمنا عن ال 12 مادة بتوع اعدادى ، ال 12 دول بيتقسموا 6 ترم اول و 6 ترم تانى ، دي شوية نصايح مهم تقراها

1-   المواد كلها انجلش ف ما تحبطش و اشتغل على نفسك فيه و هتلاقي الف كورس اونلاين

2-   الصحاب اهم حاجه ف السنه دي ف ركز كويس جدا انك تختار الصاحب اللي يقومك و يشدك مش اللي يحبطك

3-   حاول  تجيب تقدير كويس عشان تكون مرتاح في اختيار القسم بعدين

4-   ما تحاولش تضايق اي دكتور مهما كان و متحبطش من اي درجة قليله في الميد تيرم لانه المعروف ان التعويض بيكون في الفاينال و دي حقيقة على فكره

5-   اجازة اعدادى هي الاجازه الوحيده اللى هتكون اروق واحده لان ف الاقسام بيبقى لازم تنزل تدريبات، و ان كنت بتسعى لكورسات بعد اعدادى ف ممكن ICDL و MATLAB و زود مهارتك ف ال C++

6-   اخر حاجه هي اهم حاجه، ما تبخلش ابدا انك تساعد غيرك ب أى معلومه و حط في اعتبارك ان اللي بتعمله النهاردة بكرا هتلاقيه، ما تفكرش ان حد ممكن ياخد مكانك ابدا، و لو مصر تفكر يبقى فكر كل يوم في انا ضيفت ايه جديد للبشريه النهارده

كده كلامنا عن اعدادى خلص، ندخل على اللي بعده

بعد اعدادى بتكون كونت خلفية كويسه عن المواد و بتقدر تقيم انت منجذب ل ايه اكتر ، في اختيار الاقسام انت بتكون معتمد على حاجتين اول حاجه منهم هي انت شايف نفسك فين بعدين، لانك هتقضي عمرك كله بتشتغل شغلانة القسم اللى انت اخترته، تانى حاجه بص على المواد و شوف محتواها ده انت هتحبه و هتعرف تجيب فيه تقدير و لا لأ، و ما تسمعش لحد بيقول المواد كده كده هتعدي ف ما تركزش في مدى قدرتك فيها او حبك ليها، لان مع الاسف المواد قادره تكرهك في القسم عادي جدا


 أقسام هندسة القاهرة

في القاهره عندنا الاقسام دي (الاقسام مترتبة من اعلى قسم لأقل قسم تبعا لتنسيق اعدادى 2021) :

1-   هندسة الحاسبات (1332 درجه)

عشان تفكر فيه لازم تكون بتحب التكامل و مادة الحاسبات ف اعدادى، تقريبا دول اقرب حاجه، القسم في مشاريع كتير جدا و بيكون محتاج  Self-learning، عدد الطلبه بيكون ف حدود ال 70 ، اقرب حاجه اوضح بيها مجالات شغله هي تصميم و تنفيذ الانظمة و ازاى تطور منها عن طريق البرمجه، الفرق بينه و بين كليه حاسبات و معلومات هوانهم شغلهم بيكون تنفيذ اكتر انما تطوير او حل مشاكل ف  مش تبعهم ، من اهم الكورسات اللي هتتاخد ف القسم ده هي لغات البرمجه دي :

C++ & java & web development & data structure & vdhl

2-   هندسة الالكترونيات و الاتصالات الكهربيه (1259 درجه)

اتصالات من اكتر الاقسام اللى بتكون مضغوطه طول السنه من كتر المشاريع و المذاكره الكتير اللي بتكون عليهم، ف نصيحة ما تفكرش فيها الا و انت متأكد انك مش هتهزر، عشان تفكر ف القسم ده لازم لازم لازم تكون بتحب تكامل اعداداى و مادة ال C++ ، خريج اتصالات بيكون قادر سشتغل ف اربع مجالات

  •  Electronics
  •  Networks
  •  Communication
  •  Control
  •  Programming


المجالات دي يقدر مهندس اتصالات يشتغل فيهم كلهم، و لكن بيحدد مجال واحد و يدوس فيه ، الالكترونكس بيكون مجال تصنيع الالكترونيات و لكن ده ف مصر مش متوفر لان مفيش تصنيع، شغل الكنترول بيكون عباره عن embedded system يعني تحكم ف الحاجه من خلال كتابه كود و بيكون في شركات كبيره زي value مثلا، أما ال communication ف ده في شركات زي اتصالات و فودافون و غيرهم ، بيكون متعلق بالسجنالز اللي بتتبعت و بتوصل، شغل ال networks بيحتاج شغل على نفسك كتير اوي و كورسات كتير ، أما ال programming ف واضح من اسمها أنها برمجه

و من الكورسات اللي ممكن تتاخد هنا

Microprocessor, ICDL, C++, MATLAB, C, java, Microcontroller, Network, Vhdl

3-   الهندسة الحيوية الطبية و المنظومات (1187 درجة)

بالنسبه لقسم طبيه ف ده بياخد ف حدود ال ٧٠ واحد، و بيدرس لغات برمجه و مواد من كليه طب ، المواد دي بتساعدك تبقى خارج فاهم انت بتشتغل ف ايه ، الشغل هنا يا إما سوفت وير ف شركات ، يإما صيانه الاجهزه الطبيه ( في تصنيع طبعا بس ف مصر مقتصر ع الصيانه ) ، و لو عايز سوفت وير م الاول يبقى اشتغل على نفسك فيه ، المواد اللي محتاجها من اعدادي هي البرمجه و الرياضه و الفيزياء و دي بعض الكورسات اللي ممكن تتاخد ف القسم :

Multisuim , C++ ,C ,C# , data structure

4-   هندسة القوى و الألات الكهربية (1181 درجة)

نيجي بقا لقسم كهربا، عشان تدخل القسم ده محتاج تكون بتحب الكهربيه و المغناطيسية و الرياضه اكيد ، و لازم تكون قادر تشتغل تحت ضغط

 مواد القسم بتعتمد اعتماد كلي ع الفهم و لكن مواد الفهم لازم معاها اوبشن حفظ، عشان تقدر تجيب تقدير ف القسم ده يبقى عليك و على حل امتحانات كتير و اهم حاجه متعتمدش انك فاهم و تركن المواد لأنك لو مطبقتش هيبقى و لا كأنك عملت حاجه

الشغل بيكون ف اي مجال م السته دول

 Power electronics
  • و دي شبه الكترونكس اتصالات بس اتصالات جهد منخفض احنا هنا بنتعامل مع جهد عالي جدا غير أن شغلها ف مصر قليل و ده لان مفيش تصنيع بيكون صيانه بس

 Machine
  • صيانة مكن ف مصانع

 Control
  • ده بقا اهم تخصص فيهم ، بتقدر من خلال اكواد تتحكم في المكن بتاعك و تربط كذا سيستم ف بعض ( شبه اتصالات ف الحته دي و لكن زي ما قلت باور جهد عالي )

 High voltage
 Power system
  • و الاتنين دول بيكون شغلهم ف محطات توليد الكهرباء و التعامل مع الترانسفورمر و غيره

 Utilization
  • و هنا بيجيلك مهندس المدني بعد ما يكون شاف اللي مهندس المعماري طالبه و يقولك ظبطلى الاضاءه هنا و قولي اسيب مكان فين ل ايه و دي شغلها متوافر جدا لان المكاتب الاستشارية مفيش اكتر منها

الكورسات اللي ممكن تتاخد هي :

MATLAB & Simulink, microcontroller, classic control & PLC, AutoCAD electrical, word & excel

5-   هندسة الطيران و الفضاء (1086 درجة)

قسم طيران من اكتر الاقسام التقيله ف هندسه و الرياضه بتاعته تقيله ، عشان كده محتاج تكون بتموت ف الرياضه و الرسم و الانتاج و اكيد الديناميكا، القسم هو القسم الوحيد ف مصر اللي بيشمل الطيران و الفضاء، و منه بتقدر تشتغل شغل ميكانيكا عادي ، غير أنه اعداده قليله ف فرص الشغل كويسه ، و مجالات الشغل هي

    Aerodynamics

    و ده فيه بتصنع الصواريخ و الاقمار الصناعيه على سبيل المثال  

    Structure

 هنا بتبدأ تعمل الطياره و كل الاجزاء بتاعتها         

    Propulsion & engines

و ده فيه بيتم صيانه المحركات و اكيد مش محتاج اقولك أن ده اكتر تخصص مطلوب لان مفيش عندنا ف مصر تصنيع

    Control & stability

ده بتتحكم ف اجزاء الطياره شبه كنترول كهربا كده

6-   الهندسة الميكانيكية (1069 درجة)

قسم ميكانيكا من أهم الاقسام و امتعها، عشان تدخله محتاج تكون بتحب الإنتاج و الرسم الميكانيكي و الرياضه و الميكانيكا ، لو بتحبهم يبقى هتبدع ف القسم ده ، ميكانيكا ليها تخصصين واحد انتاج و التاني باور ، انتاج هو انتاج هو شبه إنتاج اعدادي بس على كبير، أما باور ف بيكون اقرب لشغل التبريد و التكييف او كنترول

القسم بيقدر يشتغل ف مجالات كتيره زي :

PETROL field, QUALITY CONTROL, PLUMPING, FIRE FIGHTING, MAINTENANCE, CARS Manufacturing

من اهم الكورسات اللي هتتاخد ف القسم

AutoCAD, MATLAB, Solid works

7-   الهندسه المعماريه (1058 درجة)

عمارة من اكتر الاقسام اللي لما بتتخرج بتلاقي محاكاة للي كانوا بيدرسوه ف الكليه ، شغلهم بيكون عباره عن تصميم شركه مثلا او عماره ، بعدها بيدي التصميم ده لمهندس المدني عشان يطبقه على أرض الواقع و لمهندس كهربا عشان يعمل شبكة الكهرباء ، عشان تدخل القسم ده ف انت محتاج بس يكون عندك طولة بال و صبر و شوية تخيل ، و تكون حابب فعلا المجال ده ، لو مش حابه و داخل و خلاص يبقى بتعذب نفسك حرفيا

و بالنسبة للكورسات هنا ف كلها برامج لأن عمارة شغلهم ف الآخر بيكون على برامج ، و البرامج هي :

AutoCAD, 3D max, sketch up , Photoshop

8-   الهندسة الكيميائيه (944 درجة)

عشان تدخل كيميا ف انت محتاج تكون بتعشق الكيميا بكل انواعها حرفيا ، شغل كيميا بيكون ف اي مصنع بتروكيماويات ، مجال البترول ، مصانع الاسمده و الاسمنت و الدواء و الاغذيه و معالجه المياه ، شغل كيميا متوافر و لكن عشان تزود فرصتك ف انت محتاج تكون مميز ف القسم ف حاول تدي على قد ما تقدر ، في شوية كورسات مهمه و هي :

ICDL, excel for chemical engineers, ASPEN HYSYS (Steady state &Dynamic) , MATLAB


9-   الهندسه المدنية (886 درجة)

تخصصات مدني بتنقسم الي تلات تخصصات

    ري و هيدروليكا

 و دي هتلاقي شغلها ف توصيل المياه من النيل لمحطات المعالجه و من ثم للبيوت و من البيوت لشركات الصرف و هكذا بقا لو عايز اعمل تانك ف اي مدينه او ادخلها مياة

    الاشغال العامه

و دي شغلها ف الطرق، سكك الحديد ، أو مهندس المساحه اللي بيعمل خريطه لحتة الأرض ، و كمان يشوف نوع التربه هتنفع و لا لأ

    الهندسه الانشائيه

بتكون مسئول عن المباني بشكل عام و الخرسانه و التشطيب ، شغلها بيكون ف مواقع ع الأغلب و في شغل مكاتب

مدني من الاقسام اللي بتتخرج تشتغل على طول و لكن بمرتبات قليله نظرا لأن في كذا مكان بيطلع مهندس مدني ده غير المعاهد طبعا ، عشان تدخل القسم ده محتاج تكون بتحب التكامل و الميكانيكا و الرسم ، و يكون عندك قدره تسلم شيتات كتير ، و لكن التقدير ف القسم مش صعب، من أهم الكورسات :

AUTOCAD, SAP, EXEL, TEKLA, STAD, MATLAB


10-                   هندسة البترول (832 درجة)

11-                   هندسة الفلزات (734 درجة)

12-                   هندسة المناجم (524 درجة)

الاقسام دي مرتبطه بطرق الحفر عشان البترول و ايه بيحصل بعد الحفر ، كلهم related ببعض جدا ،عشان تدخل اي حاجه منهم محتاج تكون حابب المجال و ناوي تجيب تقدير لانه عشان تشتغل ف حاجه منهم ع الأغلب بتكون محتاج واسطه، ف تقديرك المفروض يعوض ده ، الدراسه ف اي واحد فيهم مش صعبه خالص و سهل تجيب تقدير عادي

 

كده يبقى احنا غطينا كل الاقسام الحمدلله، نصيحه مني ، ادخل القسم اللي بتحبه و مالكش دعوه بصاحبك داخل ايه ، و اوعى تستخسر مجموعك و تدخل قسم مش عاوزه عشان كده بترمي نفسك باقي حياتك ف حته هتستهلكك نفسيا ، لو مجالكش القسم اللي انت عايزه عادي دي مش نهاية الدنيا ، جرب تفكر في ايجابيات القسم اللي جالك و اوعى تستسلم بسرعه ، و حط ف اعتبارك أن الدرجات عمرها ما هتكون مقياس الاهم تكون فاهم و تتخرج مهندس بجد، و اخيرا متنساش تصلي استخاره قبل كل ده


مقالات ذات صلة

تعليقات