أخر الاخبار

20 نصيحة لطلبة الجامعات قبل التخرج

20 نصيحة لطلبة الجامعات قبل التخرج | advice for college students before graduation

1- تاخد IELTS or TOEFL exam ب إسكور من 6 ل 9 بالنسبة للأيلتس أو من 80 وانتا طالع للتوفل الدولى IBT.
2- تجيب جيد جدا أو امتياز فى ال GPA بتاعك سواء كنت فى أى كليه.
3- تاخد امتحان ال GRE للكليات العلمية على حسب تخصصك ايه او USMLE للطب.
4- تعملك ال CV المحترم اللى يأهلك لسوق العمل في مصر علي الاقل أو الحصول على منحه بعد انهاء دراستك وبفضل رقم 2 طبعا .
5- القراءة في مجالك وفي غير مجالك لحد ما يبان لك صحاب ( كالأسد فى انقضاضه على الفريسه ).
6- الكورسات الاونلاين في مجالك او اللى ناوي تعمل فيها shift career أوتكمل دراسات عليا فيها ودلوقتي مفيش اكتر من الاونلاين كورسس بس احنا نتعلم وننظم وقتنا ونصبر على وقت الكورس اللى بيشكلى العائق الأول لكن كل شىء بالصبر سينال.
7- البرمجة ثم البرمجة ثم البرمجة ( عندك لغات برمجه كتير ابدأ و back to basics واشتغل فى أى واحدة أو فى أكتر من واحدة )
8-التدريب في أماكن مختلفة وال Summer internship قدم كتير فيها ( تقريبا اسبوعيا ببعت ايميلات تدريب لمؤسسات مختلفه واللى تيجى .. مش هخسر حاجه ... بس لازم تسأل نفسك سؤال الأول ... هما هيقبلوني ليه ... انا مميز في ايه عن الناس اللي بتقدم دي كلها ؟ ).
9-لو قدرت تشارك في دراسات اتعملت او ابحاث أو فريق بحثى أو مجموعه شغاله على مشروع معين يبقي لوز أوى ويا سلام لو نشرت أو كنت مساعد لدكتور وانتا ساعدته فى ورقة بحثيه ويا حبذا لو مجله علميه ليها impact factor يبقى انتا كدا كسرت حاجز المألوف.
10- الأنشطه التطوعيه يا اخوانا ( رساله - صناع الحياه - أصدقاء مدينه زويل - IEEE - انسايدر - ....... الخ ) دى مفتاح لشقه النجاح وهتخرج منها بكميه مهارات وخبرات لا تتخيلوها وأدين بالفضل لكتير من مهاراتى وخبراتى لأصدقاء pathway.
11- كون شبكه علاقات مختلفه علي قد ما تقدر من الأصدقاء ودكاترتك والمجتمع عموما ( خد من كل بلد صاحب ولا تاخد من كل بلد عدو ) مع التمسك بمبادئك لا لغرض المصلحه فقط .
12- اتخاذ Mentor مدعم ليك لو وقعت أو حسيت انك مش فى مستواك تلاقيه علطول من غير متفكر ويساعدك فى ال facing لصدمة التخرج اللى حتما هتقابلها ( والدك - والدتك - أستاذك - صديقك - ..الخ )
13- تيقن تماما وبأكدلك دا إن الحياه هنا في أوروبا أو في أي دوله بتدرس فيها غير ورديه تماما ومتفكرش انك مجرد ما سافرت يبقي انتا كدا خلاص عملت اللي عليك وتأنتخ ... لا .. فيه رحله جديده هتبدأها ولازم تختمها كويس مع التوازي في الاستعداد للمرحله اللي بعدها .
14 - قرر انك تدرس اللي بتحبه ايا كانت الظروف والعقبات والمقابل اولا ثم ثانيا حب مجالك اوي ومتعلقش اي شماعه الا عليك انتا وبكدا هتشوف النجاح حتي لو كان بعيد شويه بس هتشوفه ولو حققت ( الصبر + الصبر + الصبر ) هتوصل ولو بعد حين.
15 - ابدأ انك تحفظ ولو بعض من القرآن الكريم لاني بعتبر المسلم اللي مش حافظ ولو قصار السور من القرآن انو بجد مقصر في حق نفسه اللي هتتمني ولو حسنه في يوم لا ظل الا ظل الرحمن + القراءه في التاريخ الاسلامي لانه بجد تاريخ مشرف ومليئ بالانجازات المختلفه + احفظ ما تستطيع من الشعر وبالأخص نهج البرده لأحمد شوقي وألفيه بن مالك لمحبي اللغه العربيه وعلومها فوالله لم أجد أعذب مما وجدت في نهج البرده .
16 - حاول تجرب انك تشتغل جنب الدراسه ك part time job في اي مجال ممكن تجيد فيه وميأثرش سلبا علي دراستك .
17 - ابدا يومك في المذاكره ب target صغير اوي مثلا هذاكر الرابطه الأيونيه فقط من انواع الروابط الكيميائيه خلال نص ساعه فقط بس هفهم كل حاجه عنها ومتحطليش خطه مذاكره لليوم كله لانك غالبا مبتحققهاش .
18 - بتاع كلو مبيعملش حاجه .
19- اهم من انك تمشي بسرعه اتاكد الاول انك ماشي في الاتجاه الصحيح.
20- ابدا واعمل حاجه واحده بس وهتلاقيك متحمس وشغال فى النقط التانيه.
#الخلاصة | لو حققت أكبر كم من الحاجات دي مش هتحتاج تعرف اجابه علي اسئله زي لما هتخرج هشتغل ايه ؟ وانا مش شايفلي مستقبل في مصر ليه ؟ وهيا ليه الدراسه عندنا وحشه وبرا حلوه ؟ ....... الخ
لانك ساعتها هتكون اكتر واحد عارف مستقبلك رايح علي فين وهتعمل ايه بالظبط + تيقن تمام اليقين ان اثبات الذات ملهوش نهايه لكن أعمارنا بكل تأكيد لها نهايه فاعمل ليوم آخرتك ...
#خبرات
بالتوفيق للجميع 👌😊
شير بقي و فيد غيرك 👏🔥