كلية هندسة جامعة الزقازيق
* نظام الدراسه فالكليه شبيه جدا بالثانويه العامه
في عندك -مواد بتدرسها طول السنه
أ- فيزيا
ب- ميكانيكا
ج- رياضه
د _ رسم هندسي وإسقاط ( وصفيه )
المواد دي بتمتحن عليها ميد ترم اول
ميد ترم تاني
فاينل ( امتحان اخر السنه )
#_مواد منتهيه لكل ترم
*الترم الاول
ا_كيمياء هندسيه
ب_لغه ( انجليزي )
ج_ تاريخ هندسي
د _ حقوق انسان (لا تضاف)
*الترم التاني
ا_ انتاج
ب_برمجه
كل ماده من دول بتمتحن ليها ميد ترم و فاينل
وكل المواد ليها أعمال سنه بتوزيعه معينه واضحه فالصوره تحت
نظام الحضور فالكليه بيكون
4 ايام
يومين محاضرات ( بيدخل الدكتور يشرح جزئيه معينه من الماده )
يومين سكاشن
( بيدخل المعيد يحل تمارين ع الجزء الل شرحه الدكتور فالمحاضره )
ودا كله مترتب ف جدول الكليه بتنزله مع بدايه العام
نبذه بقا عن كل مادة
نبدأ بالمواد الممتده ( هتدرسها الترمين زي م اتفقنا فوق )
1_#الفيزياء
*الترم الاول
بتدرس الموائع والحركه الدائريه ودول اخدت عنهم فكره ف ثانوي وحاجات جديده زي قوي الشد والضغط ( ودول بتمتحن فيهم ميد ترم اول بس مبيدخلوش فالفاينل ) والفيزياء الحراريه
*الترم التاني
كهربيه ومغناطيسيه واغلب الكلام هتلاقي نفسك عارفه لانك اخدت عنه فكره ف ثانوي بس هيكون في توسع حبتين تلاته اربعه ...😂🙂
الفيزيا سهله جدا محتاجه بس انك تفهمها وتحل عليها كتير ♥️
#_2_ الرياضيات
*الترم الاول
بتدرس جبر وتفاضل
* الترم التاني
تكامل وتحليليه
كل فرع من دول اربعه شابتر وكمان هتلاقي منهج ثانوي كله فيهم مع توسعات بسيطه زي م اتفقنا ♥️
طبعا انتو عارفين أن الرياضه محتاجه حل كتير ومراجعه لأنها بتتنسي وهتحتاج تحفظ القوانين عشان تقدر تحل بسرعه
لانك هتدخل امتحان مطلوب منك تحل١٠٠ نقطه mcq ف اربع ساعات علي كل الفرووع
( وانت لو مبتحلش كتير هتفصل بعد ساعه ونص من بدايه الامتحان )
#_3_ الميكانيكا
دي بقا علي الله حكايتك معاها 😂
*الترم الاول بتدرس استاتيكا
الاحتكاك والاتزان ومركز الثقل ودي كلها حاجات ثانوي ( متنساش التوسع ها التوسع 🙂😂)
وكمان حاجه اسمها الفريم والماشين
ويعتبر منهج الاستاتيكا سهل جدا وحرفية تقدر المهم فجيبك طالما قدرت تحل الشيتات الامتحان بيجي منها ♥️
*الترم التاني
الديناميكا
نفس منهج ثانوي بتاع الحركه والشغل والطاقه وكل دا بس ف اكتر من مستوي فراغي
يعني مش ع المحاور(x,y)
بس لا
ف التلت مستويات ( الفراغ )
ودي لازم تحل فيها كل الشيتات وتحل ع قد م تقدر ♥️
معلومه ( الماده دي محتاجه انك تحل ب ايدك اكتر م تسمع شرح لانك هتحس الشرح سهل جدا بس حرفيا ساعات مش هتعرف تحط قلم فالورقه ف اشتغل عالحل اكتر عشان متتسوحش 🙂😂
# الرسم الهندسي والاسقاط
بص عشان تفهم الحكايه بتاعتهم دول مادتين منفصلين عن بعض فالكتب والسكاشن والحضور وأعمال السنه والمعيدين والدكاتره كمان لكن بتمتحنهم فاينل مع بعض ودرجاتهم بتبقي سوا وبيشيلو بعض يعني
* الرسم الهندسي
الرسم سهل جدا ومنهجك كويس خالص بتتعلم ترسم المنحنيات والمماسات وتنقل المقاسات فالترم الاول
وبعدين تشتغل علي الرسم ال3d ( الايزومترك )والقطاعات وهتعرف معني الكلام دا لما تدخل
مش محتاجه منك اي حاجه غير انك تاخد السكشن وتروح ترسم الجزئيه الل اتعلمتها وتخلص اللوحات الل عليك اول ب اول هتضمن الامتياز 👈🏻👉🏻
نيجي بقا لل الاسقاط 😂
كل م تسأل حد فالكليه عن الماده دي هيقولك دي لا بتتفهم ولا بتتحفظ دي بتتشال 😂
والحقيقه انهم بيستهونو بيها ف بيلاقوا الدنيا مستحيله معاها اخر السنه
بس انت لو تابعت منهجك ولخصت كل محاضره ف خطوات تفهمها وحليت مسائل الشيت
حرفيا الامتحان ف جيبك لانه بيجي كوبي بيست من الشيتات
#الكيمياء
كيمياء ثانوي بس علي توسع و مفيش عضوية+ الحرارية هي هي اللي في الفيزياء مع اختلاف لايذكر،وكمان ملهاش كتاب بتجيب ليها مذكرات
وليها امتحان عملي جميل كدا بتاخد ورقه وتروح تجرب الل فيها وتخرج علي كدا 😂♥️
#_الانتاج بقا
الكل بيقول عليه صعب وبيتشال وعاملين عليه حوار
بس دلوقتي بقا mcq يعني أقرأها بتركيز هتدخل تجيب جيد جدا علي الاقل ♥️
اهم حاجه فيها تسليم الشيت والكتاب وحضور الورش ( مبتعملش فيها اي حاجه غير أن الفني بيشرحلك بس استخدام بعض الآلات والأدوات )
وليها امتحان شفوي اخر السنه بيسالك فالل اخدته وشفته فالورش
وبينزل للحاجات دي pdf ف متقلقش منها خالص
المهم متنساش أن المخرطه مش فالدرج😂
#_ البرمجه
حرفيا ماده الامتيازات مفهاش كلام دي
اسهل ماده ف اعدادي هندسه حرفيا 😂♥️ تابع المحاضره والسكاشن وبيعملولكم كويز خفيف كدا عشان اعمال السنه دا غير الميد والفاينل
ومتنساش برنامج الماتلاب
سهل وبسيط ومبتخدش فيه جزيئات كبيره وحاول تطبق عملي عشان تقدر تثبت المعلومات دي ♥️
لانه هتتسال فيه هو و المنهج ف الفاينل
#_حقوق الانسان
ليها pdf ظريف كدا مبيتفتحش 😂 وليها مذكره كدا بتنزل اخر اسبوع فالمنهج بتقرأها ليله الامتحان وخلاص 😂👈🏻👉🏻
#التاريخ الهندسي
بتدرس فيه مقدمه عن الهندسه والأقسام والبدايات بتاعتهم والتطبيقات بتاعت كل الأقسام والتطوير الل حصل فيهم وهكذا
ودي بتتقرا بعد المحاضره مره وعليها ل ليله الامتحان بقا 😂
بالنسبه للامتحانات بتاعت الاسمارت والعملي
بينزل ليهم فيديوهات بتسمعها وتدخل تطبق بتكون حاجات خفيفه كدا وسهله وسهل تجيب فيهم صفار برده 🙂😂
نصيحه لوجه الله متحاولش انك تقلل من الخمس درجات بتوع الكويز أو الحضور أو العملي أو اي مصدر درجات فالكليه عموما
لانك محتاجاها جدا جدا جدا وممكن يقف معاك القسم إلى انت عايزه على واحد او اتنين فالميه
ف بلاش تتهاون مع ااميد او العملي أو حتي الكويزات إلل الدكاتره والمعيدين بيعملوها 🙂♥️
شويه نصائح كدا مهمه عشان متتسوحش برده 😂♥️
المواد الممتده لازم تذاكرها اول ب اول متركنهاش ابدا
انا عارفه أن السفر متعب خصوصا لو انت بعيد عن الكليه ف مش هتقدر تذاكر كل الل اخدته ف نفس اليوم الكليه
ف حاول تكتب ورا الدكتور أو المعيد خطوط عريضه كدا أو الحاجات المهمه اوي فالشرح بحيث تشوفها لما تروح تفتكر المحاضره و فايام الاجازه تقدر تبيضها وتظبط ليك كشكول تذاكر منه الماده ( هينفعك جدا جدا ايام الامتحانات خصوصا مع المواد الممتده )
حاجه كمان حلوه اوووي فكليتنا أن عندك مكاتب كتير جدا تقدر تشتري منها مذكرات وقنوات كتير جدا هتلاقي عليها شرح المناهج كامله عاليوتيوب زي كييم كام مثلا
وكمان هتلاقي كل الداتا مرفوعه ع بوت الكليه وحاجه كدا اخر روقان سعدتك بس انت ذاكر 😂♥️
واخر حاجه متنسوش الامتياز من ٨٥ 😂👈🏻👉🏻♥️
نختم بقا بالاقسام
عندك اقسام عامة زي
مدني - عمارة - ميكانيكا - صناعية - كهربا
اقسام كريدت بفلوس يعني 12 الف فيما فوق
طيران - ميكاترونكس - تشييد
»»»»»»»بالنسبة العملي و الشفوي والاسمارت:
الميكانيكا والفيزياء ترم أول وتاني ليهم اسمارت وشفوي و عملي كلهم في يوم واحد
الكيمياء:ليها عملي بس
البرمجة:اسمارت بس
الانتاج:شفوي بس لأن العملي هو حضورك الورش
العملي بتيجي في آخر الترم تخش سكاشن تمهيدية لحد يوم العملي اللي عليها درجات الشيتات بتتسلم في اليوم دا فحلها أول باول ليك انت برضو
الاسمارت:هو امتحان علي الكمبيوتر تجارب برضوا وكدا في البرمجة اسئلة عادية
الشفوي:بيبقي يوم العملي بتتسئل في التجارب اللي بتعملها في الانتاج بيسئل في المنهج وادوات الورش والمكن...
بينزل فيديوهات فيها التجارب العملي والاسمارت كل اللي عليك تذاكر الفيديوهات كويس وتاخد درجات حلوة ان شاء الله بالتوفيق