السلام عليكم جمعه مباركه عليكو جميعا وكل عام وانتم بخير وعام دراسي موفقين فيه باذن الله
ان شاء الله هكلم ف البوست ده عن خطه تمشي بيها ف الكليه والمذاكره وهجمعلك فيه لينكات كتير مهمه فا اعمله Save لانك هترجعله تانى
....اول نقطه ودى مهمه جدا وهو انك تبقى عارف الدنيا ماشيه ازاى ف الكليه قبلك بمعنى انك تشوف اللى قبلك حصله ايه وعمل ايه واتعمل فيه ايه عشان المميزات تعملها والعيوب تتجنبها وده الحمدلله قدرت اسهله عليك لو انت داخل ومتعرفش حد من الكليه قبلك ولا تعرف حاجه عن الكليه اللى انت داخلها وعملتلك بوست لكل كليه بيكلم عنها ويوضحلك فكره عن المرحله اللى انت داخلها ودى حاجه مهمه جدا البوستات دى هسيبلك اللينكات بتاعتهم ف اخر البوست لو مشفتهمش
....تانى نقطه بقا وهى انك يكون معاك داتا السنه اللى فاتت ودى نقطه مهمه جدا عشان هيبقى المرجع بتاعك وهقولها ف نقطه قدام ودى هسيبلكو اللينكات بتاعتها ف البوست تحت دول اللي قدرت اجمعهم فا الدفعات القديمه متشكرين اللي معاه درايف الدفعه بتاعته يحطه ف كومنت وانا هعدل اللبوست واضيفه وجزاك الله كل خير
.... تالت نقطه وهى انك تكون محضر قبل الدراسه بفتره ودى خلاص وقتها فاات ف منكم اللى اكتسبها وكان بيذاكر قبل الدراسه بفتره وف اللى اجل لما الدراسه تبدأ طبعا الفارق بينهم كبير انك تبقى داخل وع درايه بالمنهج او حتى بالمواضيع اللى هتتشرحلك غير لما تبقى داخل وانت ابيض متعرفش حاجه بس ان شاء الله متكونش نقطه سلبيه عادى تقدر تجمع وتذاكر وتمشي صح زى ما هقولك ف البوست
... رابع نقطه بقا ودى عصب البوست وهى الحضور بتاعك والمطلوب منك تعمله قبل ما تحضر واثناء الحضور وبعد الحضور ودى هنقسمها لجزئين جزء خاص بالمحاضرات وجزء خاص بالسكاشن
الجزء الاول خاص بالمحاضرات
بالنسبه للمحاضرات طبعا انت عارف انت رايح محاضره ماده ايه اللى عليك تعمله قبل المحاضره وانت ف البيت يعنى اليوم اللى قبل المحاضره انك تبص ع الجزء اللى هيتشرحلك ف المحاضره وتحاول تفهمه او تعرف بيكلم عن ايه ونظره كده ع الموضوع لو قدرت تدور ع فيديو ع النت يفهمك الدنيا يبقى تمام جدا مقدرتش خلاص اعرف بس هيتشرحلك ايه ف المحاضره وده هتعرفه من الداتا اللى هسبهالك ف البوست ده طيب لو انت ملقتش الداتا اول يوم تروح الكليه تدور ع اى حد كان ف اعدادى السنه اللى فاتت وتاخد منه الورق والمحاضرات اللى كان بيذاكر منها اسأل كتير ملقتش واحد اسأل غيره المهم تجيب الداتا دى واهم حاجه المحاضرات تمام كده النقطه دى .. دى خاصه بالتحضير قبل المحاضره .
طيب خلاص حضرت ورايح المحاضره هتعمل ايه فيها ؟ طبعا الافضل انك تقعد قدام والله مهم جدا عشان يبقى تركيزك كله مع الدكتور عكس ما انت قاعد ورا ف الدوشه و هتقعد تبص يمين وشمال .. بعد كده تكون اخد معاك مجموعه ورق عشان تكتب اللى بيتقال ف المحاضره وانت بتكتب تفتح موبايلك وسجل ريكورد المحاضره .. خلاص كده حضرت وكتبت وسجلت ريكورد ؟ تمام هقولك تعمل بيهم ايه دلوقتى (( لقيت الدكتور اى كلام ومبتفهمش منه وده وارد بنسبه كبيره هتحضر ل دكتور ف مجموعه تانيه ده لو انت ف جامعه و ف كذا دكتور للماده واحضرله وتابع معاه زى ما قولتلك لقيتهم كلهم حضورهم زى عدمه ؟)) ف ناس تقولك متحضرش وانا بقولك احضر وسجل ريكورد وعشان لما تذاكر الماده تعرف هو كان بيكلم عن ايه احسن ما تذاكر ماده وانت مش عارف المطلوب منك من الدكتور اللى هيمتحنك ... تمام كده حضرت (ذاكرت اللى الدكتور هيشرحه ف المحاضره ) وحضرت المحاضره وكتبت المحاضره وسجلتها ريكورد هقولك تعمل بيهم ايه دلوقتى
الجزء التانى الخاص بالسكاشن
السكاشن مكمله للمحاضرات بمعنى ان الدكتور وارد انه يديلك عناوين الدروس ويشرح 75% من الدرس ويسيب الجزء الباقى للمعيد يشرحه ف السكشن وكمان الدكتور بكتيره هيشرحلك مسأله واحده ف المحاضره انما السيكشن المعيد هيشرحلك كل الشيت ويحله معاك فا ده مهم جدا تحضره طيب لقيت المعيد حضوره زى عدمه روح لمعيد تانى احضرله ... الغرض الاهم من حضور السكاشن هقولك عليه قدام
.... خامس نفطه بقا وهى المذاكره انت دلوقتى حضرت المحاضره ومعاك ورقتين كاتبهم فيها ومعاك ريكورد المحاضره هتجيب كراسه كده للماده وتبدأ تبيض فيها المحاضره دى بخط كويس كده وتشرح لنفسك اللى فهمته منها لو ف جزء مش فاهمه او نسيته شغل الريكورد واسمعه .. طيب لو مفهمتهوش اكتبه وحط دايره عليه وهقولك تعمل بيها ايه دلوقتى
خلاص بيضت المحاضره وفهمتها هتقوم جايب الداتا بتاعت السنه اللى فاتت لو معاك ورق كورسات تفتح الجزء بتاع المحاضره وتحل الامثله اللى عليها او تحل امثله الشيت (اياك تكتب المثال ) اطبعه ع ورقه وقصها وحطها ف الاسكتش وحل المثال ف الاسكتش بتاعك تمام لحد كده ؟ طيب مثال وقف معاك ومش عارف تحله هتعمل ايه هتحط عليه دايره ( علمه ) وهقولك تعمل فيه ايه دلوقتى
دى كده المذاكره اليوميه بتاعتك بعد ما حضرت المحاضره
طيب الحجات اللى انت علمت عليها ف المحاضره والامثله اللى حلتها ف الاسكتش بتاعك دى هتعمل فيها ايه ؟ دى بقا ف السكشن هتحضر وتسجل شرح المعيد لما يخلص شرح هيدخل ع حل الامثله اللى انت حلتها ف البيت هنا بقا انت قاعد باشا ف نفسك وفاهم كل كلمه بتتقال وبيثبتلك المعلومات اللى عندك زى الكتاب مبيقول ..طيب الحجات اللى انت علمتها دى هتعمل فيها ايه دى انت مش فاهمها دى لو شرحها وفهمتها خلاص اشطا مشرحهاش او مفهمتهاش بعد السكشن روحله وقوله لو سمحت ده اتقال ف المحاضره ومفهمتهوش هيقعد معاك ويفهمهولك وهيحل معاك المثال اللى انت مش فاهمه وكده انت برنس زمانك حاضر المحاضره ومذاكرها ومبيضها وفاهمها وحالل عليها وحاضر السكشن ومثبتلك المعلومات اللى فيها مش ناقصك حاجه
هتفضل ع كده ف المواد التقيله اللى معاك زى ) رياضه – فيزيا – كيمياء- ميكانيكا – رسم ) الباقي احضر من غير تحضير كل اللى عليك سجل ريكورد واكتب اللى يقوله وخلاص وهقولك تعمل بيهم ايه
النقطه دى مش سهله ف خالص ومحتاجه وقت ( سهله مع اللى كان بيذاكر قبل الكليه مع نفسه ) المهم ف الاول بالنسبه للى مذاكرش قبل الكليه هتبقى رخمه وصعبه عليه بس مع الوقت دماغك هتشتغل وهتلاقي نفسك متمكن وبتقدر وماشي زى الفل اهم حاجه تمشي بنفس النهج حتى لو ف الول تعبت شويه استمر ورك مش هيضيع تعبك
نيجي بقا لنقطه المذاكره الاسبوعيه ودى مهمه وهى انك بتجيب كراسه كل ماده اللى انت كاتب فيه المحاضره ومذاكرها وحالل الامثله وتعيد عليها مش هتاخد منك ساعه بس الفكره انك متنساش اللى انت كتبته
... سادس نقطه وهى الوقت النقطه دى مهمه جدا .. اعدادى محتاجه وقت وتركيز وكمان تكون قادر انك متضيعش الوقت ده مبقولكش ذاكر طول الوقت لا انت لو خصصت 4 ساعات مذاكره كل يوم اضمنلك امتياز يعنى لو جيت نقسمها الاسبوع هتروح الكليه 4 ايام اليوم وليكن 8 ساعات منه للكليه و7 نوم وعندك 3 اكل وصلاه وعندك 2 تتابع فيهم السوشال ميديا او لو بتتفرج ع ماتشاط باقيلك 4 ساعات دول بس للمذاكره ومتفتحش اى حاجه حوليك يعنى متجيش تذاكر والموبايل شغال نت وفاتح فيس وواتس والكلام ده ده انت كده بتضحك ع نفسك المذاكره يبقى انت والمعلومات وبس حاجه خارجيه اتدخلت بينكو يبقى انت كده خرجت بره مود المذاكره فا رجاء حافظ ع الوقت ده
الايام بقا الاجازه دى تستغل فيها كل دقيقه يعني الايام العادية بتذاكر 4 ساعات ’ ايام الاجازه هتذاكر 8 ساعات بتوع الكليه بالاضافه ل 4 اللى بتذاكرهم كل يوم بالاضافه وتحط فيهم المواد التقيله عليك تذاكرهم فيها وتجمع فيهم اللى حصل معاك طول الاسبوع
لو شغال بقا فا دى معنديش ليها حل ربنا يقدرك وتقدر ع الدراسه والشغل بس الكليه محتاجه كل وقتك
.... سابع نقطه ودى نقطه تحفيذيه انت دلوقتى ف المكان المناسب ليك ربنا حطك هنا عشان هنا ده دورك ف الحياه وهو شايفك جدير بالمكانه دى خليك واثق ف نفسك وعندك حلم ليك ومستقبل ليك ولاهلك وافتكر دايما فرحه اهلك بيك لما تقولهم نجحت وجبت تقدير او طلعت من الاوائل .. سيبك من اى واحد يحبطك ويقولك الكليه صعبه ومهما عملت مش هتجيب تقدير وانك لما تتخرج مش هتلاقي شغل والكلام ده كله متسيبش لحد ودانك يلعبلك فيها خلى قدامك تارجت وهو انك تجيب تقدير اه الموضوع مش سهل بس انت هتبقى ف المقدمه وافتكر دايما الجمله دى ( مش كل اللى دخل هندسه مهندس ) العدد كبير اه ودى حاجه بتحبط بس ف الاول والاخر لو انت ملكش غير ربنا ومعندكش واسطه مافيش حاجه هتشغلك لما تتخرج الا مجهوده وكفاءتك مافيش حاجه تانيه غيرها فا اتسغل نفسك واعمل من نفسك مهندس يفرق ع باقى الخريجين ودايما تذكر فرحه اهلك لما تقولهم نجحت دى مهمه جدا
الكليه فيها تقديرات امتياز وجيدجدا وجيد ومقبول وراسب ... ف نهايه السنه هتلاقي طلبه جايبه التقديرات دى مستحيل متتلاقيش حد منهم تمام فاهم قاصدى ايه ؟ ناس بتجيب امتياز عادى مينفعش الدفعه ميكونش فيها طلبه جايبين امتياز فا اللى يقولك غير كده ده واحد فاشل وبيرمي فشله عليك متسمعلوش ومتصحبهوش
... تامن نقطه بقا عشان مطولش عليك وهى انك تهتم بس باعدادى ومتفكرش ف القسم والكلام ده خليه لما تخلص اعدادى وتعرف المواد اللى انت متفوق فيها وحاببها ومن النقطه دى هتسهل عليك شويه ميولك وهيبقى معاك وقت تفكر ف الاقسام براحتتك وتختار مجال
اخر نقطة بخصوص ادوات الرسم الهندسي اللى هتشتريها هنزلكو بوست فيه فيديو هوضحلك فيه كل حاجه فيها
اتمنى اكون قدرت افيدكو واى حد محتاج اى حاجه يسيبها ف كومنت وهجاوبله عليها او يبعتلى ع الخاص مافيش مشكله
ده درايف مجمع ل اعدادى هندسه ف 13 كلية