كلية هندسة جامعة الاسكندرية
الأول قبل اى كلام متقراش البوست ده إلا وأنت فاهم نظام الساعات المعتمدة وأحسنلك اقراه عامة علشان هتتبهدل لو مقرتهوش 😂😂
https://www.facebook.com/groups/265694917485442/posts/843144829740445/?__cft__[0]=AZU8br6IJoMb7pKWy-JcFbxzSDgBrArYHEtUJXdyXYWvjDeJStaGVm1QjR9nnZS6pmvV2rVo6FoVBncmg4779GbnARjNyhpl1XyAhYzNIewbCNEiVyNae6bu8mUy6HWEzs1lbTmp2Hd5Z3lUz7klvhRr&__tn__=%2CO%2CP-R
البوست ملخص لنظام الساعات المعتمدة وفى لينك لايحة الكلية افتحها وكمل فيها قراية بعد كدا ابقى ارجع كمل البوست ده
البوست ده هخليه الترم الأول بس بالتفصيل وهكتب بوست تانى أكمل فيه الترم التانى علشان عدد الكلمات فى البوست وكدا ميعديش الحدود
البرامج العامة الموجودة فى الكلية :
1 - قسم الهندسة المعمارية
2 - قسم الهندسة المدنية
3 - قسم الهندسة الميكانيكية
4 - قسم هندسة الاتصالات والالكترونيات
5 - قسم هندسة القوى والالات الكهربية
6 - قسم الهندسة الكيميائية
7 - قسم هندسة الغزل والنسيج
8 - قسم الهندسة البحرية وعمارة السفن
9 - قسم هندسة الانتاج
10 - قسم الهندسة النووية والاشعاعية
11 - قسم هندسة الحاسب والنظم
البرامج المتخصصة الموجودة فى الكلية :
1 - قسم الغاز والبتروكيماويات
2 - قسم هندسة وعلوم المواد
3 - قسم الهندسة الكهروميكانيكية ( حاجة تانى غير قسم الميكاترونيكس )
4 - قسم العمارة والتشييد
5 - قسم الحاسبات والاتصالات
6 - قسم منصات البترول البحرية وهندسة الشواطئ
7 - قسم الهندسة الصناعية والنظم
8 - قسم الهندسة الطبية والحيوية
9 - قسم الهندسة المدنية والبيئية
ملحوظات :
مفيش قسم ميكاترونيكس عام او خاص القسم الموجود مختلف عن الميكاترونيكس
مفيش قسم طيران او ميكانيكا سيارات
اى تفاصيل تانى عن الاقسام هتلاقيها فى لايحة الكلية
نبدأ الكلام عن اعدادى هندسة
الترم الأول
التسجيل هيتم تلقائى لمواد الترم الاول فمش محتاج تشغل بالك بالنقطة دى
المواد هى
Math 1 ( 3 CH )
Physics 1 ( 3 CH )
Mechanics 1 ( 3 CH )
Drawing 1 ( 3 CH )
Principles of Manufacturing ( 2 CH )
Computer & Programming ( 2 CH )
English ( 1 CH ) ( HUM )
يعنى الترم 17 ساعة معتمدة
نبدأ نتكلم عن مادة مادة
Math 1 ( 2 Parts ) :
PART 1 :
1 - Function
2 - Trigonometric Functions
3 - Inverse Functions
4 - Inverse Trigonometric Functions
5 - Exponential & Logarithmic Functions
6 - Hyperbolic & Inverse Hyperbolic Functions
7 - Differentiation Rules
8 - Implicit & Parametric Differentiation
9 - Tylor & Maclurin Functions
PART 2 :
1 - Conic Sections
2 - Matrices
دى العناوين اللى هتدرسوها فى المادة
المادة دى أسهل مادة هتشوفها فى الكلية
المادة قيمتها 3 ساعات معتمدة
الجزء الأول
أول عنوان ده بيبدأ من الصفر يعنى ايه Function ( دالة )
وده واخدينه قبل كدا فى ثانوية بس تتعود بالانجليزى وهتبقى تمام
طبعاً أنتو دفعة التابلت المفروض فاهمين كويس بعكس دفعات قبل كدا كان عادى يدخل الكلية واحد مش فاهم يعنى ايه دالة اصلاً
تانى عنوان دى الدوال المثلثية ودى انتو عارفينها طبعاً هتتعودو بالانجليزى عليها وخلاص كدا
تالت ورابع عنوان موضوع جديد عن الدوال العكسية للدوال اللى انتو عارفينها
خامس عنوان الدوال الاسية واللوغاريتمية وانتو عارفينهم كويس
سادس عنوان نوع جديد من الـ Functions هتعرفوه اسمه الـ Hyperbolic ونصيحة يعنى بما إنه نوع جديد اعرفه زى ما هو باسمه ومتفكرش تترجم وهتلاقى الدنيا ماشية عادى اسم النوع ده ايه Hyperbolic بس كدا متشغلش بالك بالمعنى بالعربى مش هتستفيد حاجة محدش بيدرسها عربى اصلاً
سابع وتامن عنوان انتو عارفينهم فعلا اللى قواعد التفاضل العادية والتفاضل البارامترى والضمنى
تاسع عنوان ده موضوع جديد هتاخدوه
الجزء التانى
اول عنوان دى شوية أشكال معينة هتدرسوها وسهلة متقلقوش
تانى عنوان دى المصفوفات هتلاقو نفسكم عارفين حاجات كتير فيها
شفتو قد ايه المادة سهلة انتو عارفين اكتر من نصها فعلاً
المادة دى أسهل مادة تجيب فيها A بسهولة
نظام الامتحان لحد دلوقتى من بدأية نظام الساعات المعتمدة MCQ
مهم تدرب على امتحانات MCQ قديمة علشان تتعود على السرعة بس
ممكن السرعة تبقى هى مشكلتك الوحيدة فى المادة ودى حاول تدرب زى ما قلت علشان تتعود
دكاترة المادة كويسين جداً من أحسن دكاترة الكلية دكتورة ميرفت ميخائيل ودكتور اسلام عبد المقصود
دكتورة ميرفت على قناتها على اليوتيوب فى شرح كامل للمادة
وكانت بتنزل Notes مكتوبة بخط الايد فيها محتوى المحاضرة
دكتور اسلام عبد المقصود كان له شرح على اليوتيوب برضه بس حصلت مشكلة فى قناته واتمسحت للاسف
فى دكاترة تانى فى المادة بس دول أبرز الدكاترة فى المادة يعنى
Physics 1 :
1 - Units & Dimensions
2 - Heat & Temperature
3 - Heat Transfer
4 - The First Law of Thermodynamics
5 - Rotational Motion
6 - Viscosity
7 - Elasticity
دى العناوين اللى هتدرسوها فى المادة
أول 4 عناوين بيتاخدو كل سنة
لكن أخر 3 عناوين كل سنة بيحصل نظام مختلف ممكن يتاخد واحد منهم بس وممكن يتاخد 2 وممكن يتاخدو هم الـ 3 كل سنة بيبقى وضع شكل
المادة قيمتها 3 ساعات معتمدة
الدكاترة البارزة فى الشرح دكتور يحيى منير ودكتور محمد كشك ودكتور محمد صلاح
وفى دكتورين تانيين فى المادة دكتور جمال الدلال ودكتورة ميسا أمين
دكتورة ميسا أمين بتعمل سلايدز كويسة كمحتوى للمادة
دكتور يحيى منير بيعتمد إنك تكتب وراه
دكتور محمد كشك فى حالة لو الدراسة كلية بس تكتب وراه وفى حالة الاونلاين بينزل المحاضرة مكتوبة
دكتور جمال الدلال بيعتمد إنك تكتب وراه
المادة دى محتاجة تركيز شوية ومتفوتش حاجة وتحل أول بأول الشيتات ومهم جداً تحل امتحانات قديمة
المادة دى بس فيها حاجتين مش حلوين
المادة فيها معمل بس مش زى ما انت متوقع للاسف يعنى مش هيبقى عملى اللى انت بتتمناه هيبقى شغل روتين للأسف ممكن تعمل تجربة لموضوع مخدتهوش او من الشابترز اللى فى الاخر اللى ممكن متتاخدش اصلاً كل كام سكشن بيعملو تجربة غير التانيين
فاللى هيحصل إنك هتشوف فيديوهات للمعمل بجودة 240 او 144 هتعانى وانت بتشوفها يعنى وتروح تعمل زى ما شفت فى المعمل تحط النتايج والرسومات وتاخد درجة المعمل
للأسف هى كدا
وامتحان العملى بيبقى زى كدا بس تكون حافظ اللى هتكتبه مش زى المعمل بتاخد معاك كتاب المعمل
تانى مشكلة الشفوى
ودى ملهاش اى علاقة بمستواك نهائى
الموضوع من الاخر هو الدكتور اللى هيسألك وأنت وحظك لو دكتور طيب ممكن تغلط بالعبيط ويديك 10 من 10 ولو دكتور رخم ممكن يسألك كومة أسئلة وتغلط فى واحد بس يحطلك 0
فللأسف هنا العنصر البشرى مؤذى
فأنت فعلياً معاك 80 درجة دول اضمنهم بتوع الميدتيرم والفاينال وتحاول تجيب اللى تجيبه فى الـ 20 الباقية لانه صدقنى الموضوع مش حكاية مجهودك للأسف
فمبدئياً كدا تقدر تجيب B بمجهود متوسط لكن الاعلى من كدا الموضوع فيه نوع من الحظ إنه يسألك دكتور كويس وميحصلش تلكيك فى العملى
فى دفعات ممكن يحصل ويتلغى فيها الشفوى والعملى ممكن يبقى امتحان صغير نظرى زى ما حصل مع دفعة 25 وسعتها ده فى مصلحتك إنك تضمن التقدير
الامتحان من زمان فى المادة MCQ من قبل نظام الساعات المعتمدة حتى فمهم برضه تدرب على السرعة فى الحل
Mechanics 1 :
1 - Concurrent Forces
2 - Equilibrium of a particle
3 - Non Concurrent Forces
4 - Equilibrium of Rigid Body
5 - Trusses
6 - Frames
7 - Friction
دى العناوين اللى هتدرسوها فى المادة
المادة دى سهل جداً تجيب فيها A
المادة قيمتها 3 ساعات معتمدة
العناوين الاربعة الأولى هتلاقيهم قريبين جداً من اللى خدته فى ثانوى فى الاستاتيكا فهتلاقى الدنيا جميلة معاك متقلقش
العنوان الخامس اضافة صغيرة بس وهتلاقى الدنيا جميلة
العنوان السادس يعتبر دمج بين كام حاجة من العناوين الاولانية
العنوان السابع الاحتكاك انت خدت فكرة عنه فى ثانوى وهتكمل بس شوية كمان وهتبقى تمام
واخد بالك إن معظم المادة معاك اصلاً فعلشان كدا مش صعبة
المادة امتحانها MCQ من قبل نظام الساعات المعتمدة من زمان فمهم تدرب نفسك على السرعة فى الحل
المادة اعمال السنة بتاعتها بتبقى متقسمة بين الميدتيرم والفاينال وكويزات وممكن يبقى فى 5 حضور سكشن بس حسب الظروف ممكن لا وتضم لدرجات الكويزات
يعنى الـ 100 درجة فى جيبك يعتبر زى Math 1
الدكاترة الصراحة بدون ذكر أسماء هتلاقى الموضوع مرهق شوية إنك تفهم منهم وفى منهم محدش بيحضرله غير 2 3 فى المدرج
فبنصح بقناة Kim Kam على يوتيوب بيشرح فيها دكتور من هندسة الزقازيق وشرحه كويس جداً
لكن لو دكتور فاروق البارقى او دكتور فؤاد ادو المادة فانصح بحضور محاضراتهم بشدة هتلاقى شرح ممتاز جداً ووافى
Drawing 1 ( 2 Parts ) :
PART 1 :
1 - Geometrical Constructions ( العمليات الهندسية )
2 - Theory of Projection ( نظرية الاسقاط )
3 - The Missing View ( المسقط الثالث أو المسقط المفقود )
4 - The Isometric Part 1
PART 2 :
Projection
دى العناوين اللى هتدرسوها فى المادة
المادة مش سهل قوى تجيب فيها A محتاج شوية مجهود
الجزء الأول وده الأهم واللى عليه تلتين الدرجات فى كل حاجة
الرسم الهندسى
الجزء ده مش هتحفظ فيه حاجة خالص كله رسم
مش هتفرق اللغة قوى يعنى لانه مفيش حاجة بتتكتب تعرف بس تقرا رأس السؤال وخلاص
الجزء الأول
اول عنوان العمليات الهندسية شوية خطوات كدا بتنفذها بتعمل بيها أشكال معينة بدقة
تانى عنوان وده بداية سلسلة مع بعضها نفس الموضوع وهو باختصار كدا ازاى تعبر عن اجسام 3D على ورقة 2D بدقة
فالعنوان التانى ده معناه انك هتشوف شكل مجسم وهترسم اللى بتشوفه منه من 3 اتجاهات اسمهم المساقط
تالت عنوان ده معتمد على التخيل وهو المسقط التالت او المفقود هيجيلك السؤال مسقطين بس وانت من خلال المسقطين تتخيل الشكل وتروح راسم المسقط التالت ما هو خلى بالك مسقطين بس للشكل المجسم كافيين جدا انك تتخيله
رابع عنوان ده يجيلك مسقطين ومطلوب منك بقى ترسم المجسم اللى اتخيلته
بس هتاخد جزء منه بس ازاى ترسم حاجات مسطحة من غير دواير وكدا والباقى هتكمله فى Drawing 2 فى الترم التانى إن شاء الله
الجزء التانى
اسمه الاسقاط الهندسى
فى كليتنا حالياً متقلقوش خالص منه لانه ماسكه دكتور اسمه يحيى حلمى والدكتور حاطط منهج كويس وبسيط هتحفظ فيه كام حاجة بس وهتلاقى الدنيا مرتاحة فيه وهترسم بسهولة الأسئلة بتاعته وهتلاقيها عامة موضوعات بسيطة متقلقش خالص منه
محاضرات الرسم الصراحة مختلفة عن اى محاضرة مش هى دى اللى تخليك فل فى المادة مجرد بس عناوين وتشوف الدكتور بيرسم لو مش عايز تحضرها وتشوف فيديوهات من اليوتيوب زى بشمهندس مصطفى خميس من رأيى احسن وتوفر وقتك للتدريب ده بالنسبة للجزء الأول
لكن الجزء التانى مهم تحضر
المهم فى المادة دى التدريب كويس جداً
المادة متقسمة ميد وفاينال وسكاشن
السكاشن مهمة متفوتش سكشن
السكاشن دى اللى هيحصل إنك تروح ترسم والمعيد يقيمك
معلش يعنى استحمل كام حاجة كدا زى إن فى معيدين هيقرفوك ممكن يكون رسمتك فل قوى ويدوك 8 اهو مزاجهم كدا
وفى كام معيد طيب ممكن يديك 10 وعندك كومة أخطاء
فحاول تستحمل الموضوع ده
والمادة دى اكتر مادة هتبلع وقت معاك هينزل على صفحة الرسم الشيت اللى هيترسم فى السكشن وانت تدرب عليه فى البيت قبل ما تروح علشان تروح تنجز هناك من حيث الوقت والأداء وتاخد درجة حلوة
فأهم حاجة التدريب وإنك تتخيل
نصيحة مهمة جداً إنك تتخيل
فكك من جو إن بداية من المسقط التالت تلاقى طرق بدون تخيل وكدا الطرق مش مضمونة وغير كدا هتخليك تشيل Drawing 2 لانه كله معتمد على التخيل جامد لو عديت من Drawing 1 بيها مش هتعدى من 2
والتخيل هو الصح اصلاً هو غرض المادة إنك تتخيل
فكدا المهم فى المادة دى التدريب كويس وتحضر السكاشن وترسم كام امتحان قديم وهتدخل الامتحان هتأدى كويس إن شاء الله
Computer & Programming :
1 - Introduction to Computer
2 - Program Development
3 - Programming with Python
4 - Number Systems
5 - Logic Circuits
6 - Hardware Devices
7 - Computer Networks
دى العناوين اللى هتدرسوها فى المادة
المادة مش سهل قوى تجيب فيها A محتاج شوية مجهود
المادة أغلبها هيبقى جديد عليك بس متقلقش
دكتور محمد سعد أحسن شرح فى دكاترة المادة هيخليلك المادة تافهة جداً بالنسبة لك
فى شرح كامل له على اليوتيوب
المادة بتتقسم بين ميد وفاينال وكويزات
المادة دى مهم جداً جداً تحل أسئلة امتحانات على مدار السنة مش قبل الامتحانات بس
لو عملت كدا هتحل بسهولة جداً
لو معملتش كدا تقديرك هيقل شوية بس هتحل برضه لو مذاكر بس الأفضلية للى حل امتحانات برضه علشان وقت الامتحان ويكون شاف أفكار أسئلة قبل كدا ويحلها أسرع منك
المادة امتحانها MCQ من قبل نظام الساعات المعتمدة
الكويزات ممكن تبقى اونلاين وخلى بالك سعتها لان بتبقى يدوبك ربع ساعة فتتأكد إن النت كويس عندك وتعمل احتياطاتك لو النت قطع
Principles of Manufacturing :
1 - Materials
2 - Machining
3 - Casting
4 - Forming
5 - Welding
6 - Engineering metrology & Calibration & Quality
7 - Production & Operations Planning & Management
8 - Industrial Costs
دى العناوين اللى هتدرسوها فى المادة
المادة دى سهل تجيب فيها A
المادة أغلبها حفظ
المادة متقسمة ميد وفاينال وعملى
العملى بتروح تتفرج بس على التجارب لأن أغلبها خطر يعنى فمش بتعمل حاجة بايدك الا لما تدخل قسم ميكانيكا انتاج لكن اعدادى مش مسمحولك تعمل حاجة منهم بايدك فبتبقى حضور بس وفى كتاب عملى بتملاه وتحله وتسلمه اخر الترم
درجات العملى مضمونة جداً جداً
الميد والفاينال برضه مضمونين جداً جداً
أهم حاجة تكون حافظ كويس وحالل امتحانات فاتت بيتكرر منها نسبة حلوة + اللى أنت حافظ هتقفل الامتحان بكل سهولة
المادة بيديها كذا دكتور كل دكتور بيدى جزء فى اللى شرحه كويس وفى اللى شرحه مش كويس بس كدا كدا أنت فى الاخر هتحفظ كويس هتحل كويس الفهم قليل فى المادة دى
ونصيحة صح متشغلش بالك بمعنى ولا كلمة من العناوين دى انت هتاخد محتوى الشابتر هتفهم انه هو ده الـ casting لكن لو ترجمت هتلاقى اسماء عجيبة بتطلعلك 😂😂
المادة امتحانها MCQ من قبل نظام الساعات المعتمدة
ملحوظة : المادة دى اسمها انتاج فى باقى الكليات
English :
علشان نكون متفقين بس فى فئة مواد كدا فى الكلية زى الانجليزى ومواد تانى محطوطة كمالة عدد من الاخر يعنى
المواد اللى زى دى بتمشى فوضى وحسب كل ترم مين يديها
المادة كانت فى الترم التانى لاول دفعتين ساعات معتمدة وبقت الترم الاول لتالت دفعة فى الساعات المعتمدة اللى قبلكم على طول يعنى
على دفعتى كان بيديها دكتورة كانت بتدى عناوين وحاجات قليلة اسماء عدة وحاجات كدا وكنت سألت الدفعات قبلى نظام المادة ازاى قالو انه بتكمل زى كدا وبيبقى الامتحان ما بين انجليزى عام والكلمات اللى فى الشرح
( سألت علشان دفعتى كانت بحث )
لو mcq فالتصحيح بيبقى حلو
لو ريتين فالتصحيح مش بيبقى حلو وفى ناس بتتظلم
فانتو وحظكم فى اى مادة من الفئة دى يعنى مش دى بس
ممكن تدخلو تلاقو دكتور او دكتورة تانى ونظام تانى خالص فيها
فالمهم تحاولو تتكيفو على النظام اللى هتلاقوه وتطلعو باقل خساير من المواد اللى زى دى لان المقياس فيها بيبقى خربان مش دليل على مجهودك قوى
ودى نصايح من طالب من دفعة 25 برضه ممكن تفيدكم
الاسئلة بتيجي قطعه او اتنين المهم انك تقرا القطعه كويس وتجاوب الاختيارات زي ثانوي بالضبط
وهيديك مثلا بعض المصطلحات ف المحاضره زي مثلا الشاكوش hammer اي وظيفته وحاجات زي كدا بتبقا سهله بس حاول تعرفهم علشان يبقا الموضوع سهل
ودا بيبقا من سلايدز الدكتوره والشرح ومتعتمدش كتير على ورق الكورسات لانه بيبقا مليان كلام ممكن يكون مش عليك
الترم التانى هقول ملخص سريع ولو عايزين يتعمل بوست مفصل بعدين او لما تدخلو الكلية وتخلصو الترم الاول تشوفو
الترم التانى فى مواد
Math 2 ( 3 CH )
Physics 2 ( 3 CH )
Mechanics 2 ( 3 CH )
Drawing 2 ( 3 CH )
Engineering Chemistry ( 3 CH )
Engineering History ( 2 CH ) ( HUM )
Human Rights ( حقوق الانسان ) ( 0 CH ) ( HUM )
أول 4 مواد هتلاقو نفس نظام رقم 1 منهم من حيث تقسيمة اعمال السنة وكدا والدكاترة
الكيميا كل سنة وليها حالة شكل دفعة 23 كانو واخدين منهج عملاق دفعة 24 تقلص شوية دفعة 25 تقلص جداً بقى 7 شابترز بس فأنتو وحظكم هتاخدو كام شابتر وعن ايه وبيديها كذا دكتور كل دكتور بيدى جزء فمتقدرش تقارن مين أحسن فى شرح جزء معين لانه هو واحد بس اللى هيشرح الجزء لكل المجموعات
الدرجات بتتوزع على ميدتيرم وفاينال وعملى
التاريخ الهندسى مادة انسانية وزى ما اتفقنا من لحظات إن المواد دى فوضى غالباً
بيبقى كذا دكتور بيقرو سلايدز كدا والمفروض يعنى كمادة إنك تحفظها والامتحان فى الاخر فى اللى بيكرر وفى اللى بيحط جديد بس بيبقى فى تكرار كتير قوى بشكل ملحوظ يعنى لدرجة دفعة 25 فى الميد جاب امتحان قديم الدكتور ونسى يغير التاريخ فوق فكان هو هو فاهتمو جامد بالامتحانات القديمة بس كدا مفيش تفاصيل تانى ممكن تتقال فى المادة دى
مادة حقوق الانسان مادة انسانية برضه بس دى مش بتدخل المجموع مطلوب تنجح بس فيها بس بيبقى فى كتاب pdf كدا المفروض إنك تحفظه وكدا بس زى ما اتفقنا كدا الموضوع بيبقى فوضى فى المواد دى فمفيش حاجة ثابتة
شوية لينكات مفيدة
دى داتا اعدادى للكلية من أول دفعة 20 لحد دفعة 25 اللى قبلكم على طول
https://drive.google.com/drive/folders/1FBJ5OeWox__FOZWV-EKZsRVVC-NiM84G?usp=sharing
دى قناة عليها معظم فيديوهات المواد اللى نزلت فى فترة كورونا وطبعاً لو قريت اللايحة هتفهم إنه ممكن مواد تفتح فى غير ترمها فده الكلام يعنى إنه كان فى ناس بتاخد المادة فى غير ترمها فكان فى لمواد الترم الاول اونلاين برضه
https://www.youtube.com/channel/UCA35eTfRqK2E9jXgAurD3_Q
ودى قناة تانى عليها فيديوهات الاونلاين لدفعة 25 ومجمعة معاها فيديوهات من القناة اللى فاتت حسب اللى فضل واتلغى وكدا من المواد
https://www.youtube.com/c/hmo852
ده لينك موقع تبع مكتبة الكلية عليه امتحانات من 2008
http://alexenglibraries.blogspot.com/
هو أغلب الامتحانات هتلقوها متجمعة فى داتا 24 و 25 بس يفيدك لبعدين لما تدخلو أقسام
وده برضه OneDrive تبع المكتبة بيحطو عليه امتحانات
https://alexuuni-my.sharepoint.com/personal/alex_eng_libraries_alexu_edu_eg/_layouts/15/onedrive.aspx?id=%2Fpersonal%2Falex%5Feng%5Flibraries%5Falexu%5Fedu%5Feg%2FDocuments
وده لينك لفولدر مجمع فيه لينكات داتا الاقسام لدفعتين 23 و 24 اللى هم أول دفعتين ساعات معتمدة فنفس نظام المواد ومحتواها يعنى هيبقى متشابه مع باقى الدفعة الجديدة وفى معاهم لينكات لدفعات اقدم فى بعض الاقسام
https://drive.google.com/drive/folders/1y5R9r6-Uty6HUdZ0wTFGBiePwHsr1haG?usp=sharing