حرب التيارات (The War Of Currents) Thomas Edison, Nikola Tesla & George Westinghouse

حرب التيارات (The War Of Currents) Thomas Edison, Nikola Tesla & George Westinghouse

حرب التيارات (The War Of Currents).

في أول مقال حبيت إن أنا أتكلم عن حرب التيارات كبداية، واللي هننتقل منها لكذا مفهوم في اكتر من مقال بعد كدا، ممكن حضرتك تكون عارف ايه هي حرب التيارات بس أنا مش جاي أعرض و أقول الكلام التقليدي اللي الأغلب عارفه و سمعه بالعكس..
أنا هجبهالك من منظور تاني خالص، خلينا في الأول نتفق ان حضرتك ممكن تكون مش مهتم بمجال الهندسة الكهربية او مهتم تسمع حكاوي العلماء زمان والمنافسة اللي كانت بينهم وتسمع لفظ "حرب التيارات " و ممكن ما يخطرش في بالك مين هو Thomas Edison, Nikola Tesla & George Westinghouse
(أديسون و تسلا و جورج).




حرب التيارات

ما هي حرب التيارات؟ ولماذا سميت بهذا الأسم؟

دي كانت يا سيدي حرب فكرية بحتة كانت بين كلا من العالم جورج ويستينجهاوس و بين العالم توماس أديسون، كانت في أواخر القرن الثامن عشر وبداية القرن التاسع عشر، والصراع كان ان أديسون بيشجع التيار المستمر(DC Current) وشغال بيه وبيروج له في انارة البيوت وتشغيل المصانع، وعلي النقيض بقي كان موجود كلاً من جورج و تسلا بيشجعوا التيار المتردد(AC Current)وبيشتغلوا عليه ويطوروا منه علي حساب التيار المستمر وهنعرف الفرق بينهم إن شاء الله في المقال الجاي بإذن الله.
المهم...!


قبل عام 1879م كانت الناس بتعتمد علي طرق الانارة البسيطة والبدائية زي الشموع، و السراج، و الفانوس، وغيرها، و قبل 1879م وتقريبا في عام 1878م ظهرت اول شخصية في الحرب بتاعتنا وهو أديسون واللي أغلبنا اول ما بيسمع اسم أديسون بيفتكر مخترع المصباح الكهربائي، بس الحقيقة إن هو ما اخترعش المصباح الكهربائي(light bulb) بس ومطلعش الناس من عتمة الظلام الي النور بس، و علشان المقال ما يطولش مننا و تزهق منى فلو حابب تعرف اكتر عن أديسون ادخل هنا Thomas Edison
نرجع تانى لموضوعنا



قبل توماس اديسون كان فى محاولات كتير من علماء كتير لاختراع المصباح الكهربائي(light bulb) و هنتعرف على بعضهم..


1- العالم الانجليزي همفري ديفى
اخترع مصباح القوس خلال الفترة (1809:1802) ميلادياً و كان يعمل من خلال توصيل اكوام الفولتية (نموذج اضاءة) بأقطاب الفحم، وسمي بالقوس بسبب شكل الضوء الخارج منه الشبيه للقوس وكان سطوعه شديد علشان كدا لم يتم استخدامه في البيوت وبالتالي يعتبر مش عملي بالشكل الكافي.


2- العالم الإنجليزي وارن دي لارو

في عام 1840م اخترع مصباح كهربي باستخدام الخيوط البلاتينية بدلاً من النحاس لكنه كان غالي جداً فلم يتم استخدامه.


3- العالم الإنجليزي ويليام ستايت
طوّر العالم الإنجليزي ويليام ستايت في عام 1848 م مبدأ عمل مصابيح القوس التقليديّة لزيادة طول عمرها، من خلال تطوير آلية تنظم حركة قضبان الكربون المُعرّضة للتآكل في المصابيح طوال اليوم، لكن لم ينجح تطويره تجاريًّا لتكلفة البطاريات المُستخدمة.


ورغم كل دا مانقدرش ننكر فضل توماس أديسون أو نقلل من جهوده في تطوير المصباح الكهربائي وجعله ينير لفترة أطول وبسعر اقل، وحصل أديسون علي براءة اختراع عام 1880م وبعدها بحوالي سنة أنشأ أديسون شركته للإضاءة و كانت مسئولة عن توزيع الكهرباء في جميع انحاء الولايات المتحدة الامريكية، وكان بيعتمد علي التيار المستمر في انارة البيوت وتشغيل المصانع خلال سنوات قليلة.
الا انه و بعد فتره قصيرة ظهرت شخصيتنا التانية والمنافس التاني في الحرب و هو العالم تسلا من هو تسلا؟


ظهر نظام تسلا مع التعاون مع رجل الاعمال الامريكي والمخترع جورج ويستينجهاوس للتسويق له، لكن تعال كدا اقولك ايه اللي حصل قبل ما تسلا وجورج يبقوا ايد واحدة

....تسلا فى البداية كان شغال في معمل أديسون للبحث والتطوير في نيوارك فى ولاية نيو جيرسي اللي تم انشاءه عام 1874م.
كان تسلا يعتقد انه هناك نظام اكثر كفائة من نظام أديسون وهو التيار المتردد حينما اقترح تسلا الفكرة علي أديسون في بادئ الامر اعجبته وطلب منه العمل عليها ونجاح الفكرة دي هيكون مقابل 50000 دولار، عمل تسلا علي فكرته ما يقارب السنة بواقع 18 ساعة يوميا، وعندما انتهي من العمل علي فكرته عرضها مرة اخري علي أديسون علشان تسلا يأخد المكافأة بس أديسون رفض الفكرة وقال انه كان بيمزح مع تسلا، وكان أديسون من أشهر الرجال في الوقت دأ من عصره، وقال إن دي فكرة غير عملية ومحتاجة نفقه كبيرة من المال، وترك تسلا العمل لدي أديسون واصفا أياه "بإن اديسون رجل اعمال وسياسيا وليس بعالم" حيث انه كان بيستخدم جهود واعمال تسلا بغير الأشارة اليها و هنا بدأت الحرب فعلياً بين جورج وتسلا ضد أديسون.





لكن تعالوا نشوف اهداف تسلا و أديسون وازاي الحرب دارت بينهم..!


تسلا كان مهتم بتوصيل الكهرباء للناس بأقل تكلفة ومميزات اكثر، اما أديسون كان هدفه مادي بحت لأنه مش هيتحمل خسارة الحرب دي علشان شركته كانت المتكفلة بتوزيع الكهرباء.


بدأ تسلا باستعراض نظامه المختلف والمتميز جدا عن نظام اديسون من حيث التكلفة والمسافات اللي الكهرباء بتقطعها وكمان الاسلاك المستخدمة في نظام تسلا أقل سُمكاً من المستخدمة في نظام أديسون، وكمان نظام أديسون كان محتاج مولدات ضخمة الحجم.


استطاع تسلا اقناع المستثمرين ورجال الأعمال بنظامه الجديد (توزيع الكهرباء عن طريق التيار المتردد)، وكان رجل الاعمال جورج ويستينجهاوس مهتما جدا به، وبدأ النظام الجديد ينتشر أكتر و أكتر في أمريكا، وكانت بيوت الناس تضئ بتكلفة اقل من اللي كان بيقدمها أديسون، وكان نظام أديسون لسا موجود، و رغم انتشار نظام تسلا إلا ان أديسون ما أستسلمش فى الدفاع عن نظامه و طريقته ، والتسويق لها حيث كان يشكك بنظام تسلا مدعياً ان التيار المتردد من الممكن قتل اي شخصا خلال سته اشهر بعد تشغيله ، و تحولت الحرب من فكرية لغير أخلاقية من جانب أديسون حيث امر بجمع الكلاب والفيلة و الاحصنة وتعريضها لتيار متردد عالي وقتلها في عرض عام على الملأ .


وبعد فترة وجيزة قام أديسون باختراع الكرسي الكهربائي من اجل تنفيذ حكم الأعدام علي الاشخاص المحكوم عليهم بالإعدام، كل دا علشان يحافظ علي شركته ونظامه ويشكك في نظام تسلا.


وفي عام 1890م اندمجت اكثر من 12 شركة ليشكلوا ثلاث شركات رئيسية وهم (شركة أديسون الكهربائية & وتوماس هيوستن & شركة وستنجهاوس) وبعد ذلك بثلاث سنوات تم اثبات ان نظام تسلا تفوق علي نظام أديسون، حيث قام تسلا بعرض نظامه في معرض الاكسبو العالمي عام 1893م
قامت شركة أديسون بإضافة نظام تسلا الي برامجها من الممكن ان الحرب تكون انتهت عند النقطة دى إلا انها فعليا كانت اكبر من ذلك.

أكيد دلوقتي عرفت لي سميت الحرب بحرب التيارات...!



(John Pierpont Morgan -جي بي مورجان)

رجل الاعمال الامريكي الشهير، واحد اكثر المهيمنين علي البنوك في وقته، وكان رجل يهابه الكل إلا تسلا، وكان التيار المتردد انتشر بشكل كبير و وجد مورجان فرصته للاستثمار وشراء النظام من تسلا، إلا ان تسلا رفض لأنه عارف نوايا مورجان و سعيه لاستغلال الناس مادياً على عكس هدف تسلا و اللى كان إيصال الكهرباء للناس باقل التكاليف بالتالي كانت فكرة تسلا متعارضة تماماً مع صفقة مورجان.
و رفض تسلا لصفقة مورجان فتح عليه باب حرب تانية و دا هنعرفه ان شاء الله في مقال اخر.



حجم الخط
+
16
-
تباعد السطور
+
2
-