ما هي كلية هندسة شبرا جامعة بنها (مواد اعدادي هندسة والاقسام ) shoubra faculty of engineering benha university

كلية هندسة شبرا جامعة بنها ، قبل ما نتكلم عن المحتوي العلمي للكليه احب اقول لحضرتك لو عاوز تترتب علي الدفعه وتمشي كويس جدا في الكليه لازم تحافظ علي الاربع حجات دول.

1. لازم تكون علاقتك كويسه مع ربنا بمعني مهما كان في ضغط عليك في المحاضرات والمذاكرة فمتنساش فرض ربنا عليك
2. رضا والدك ووالدتك ودعواتهم مهمه جداً.
3. الاجتهاد دي سلاحك اللي هتفرق بيه عن اي حد.
4. وتكون نفسيتك تمام مهما حصل معاك 

مواد اعدادي كلية هندسة شبرا جامعة بنها

نتكلم بقا ع المحتوي العلمي للكليه.. 

الترم الاول : 6 مواد لكل ماده دكتورين علي الاقل دكتور قبل الميدتيرم ودكتور بعد الميدتيرم.. 

١- رياضه 1

الماده من 150 درجه.. 50 ميدترم وأعمال سنه +100فينال.. الماده تنقسم الي جزئين التفاضل والجبر وهي تقريبا فيها 90% من اللي انت درسته في الثانوي والزياده حجات بسيطه جدا.. جزء التفاضل بيشرحو د/ رضا عبدالقادر أو د/ خالد النجار وهنا اهم حاجه حضور المحاضرات والتركيز.. وجزء الجبر بيشرحو د/خالد النجار و د/محمد عيد أو د/ عبدالغني بدير  وهنا اهم حاجه الكتاب ثم المحاضرات واهم حاجه في الماده المذاكره اول بأول والحل باستمرار.

٢- فيزياء 1

 الماده من 175 درجه.. 30 ميدترم.. 30 معمل.. 115 فاينال.. الدكاترة د/احمد عبدالله ود/ عمرو حسين بيشرح جزء الكهربيه وهنا أهم حاجه التركيز في المحاضره وحل امتحانات كتير علشان امتحانات دكتور احمد مش بتيجي سهله.. و د/احمد سمير و د/سعيد عبدالله ود/ احمد خالد بيشرحو جزء خواص الماده بيتكلم عن الصلابه والليونه والمرونه للمعادن وكده وهنا اهم حاجه المحاضرات.

٣-الكيمياء

ودي ماده مش جديده عليك بس الجديد انها بالانجلش فحاول انك ماتفوتش محاضره واسأل عن اي حاجه انت مش عارفها.. الماده من 150.. 30 ميدترم.. 30 معمل.. 90 فينال.. الدكاتره.. د/منال جزء الكهربيه (electro) د/محمد مجدي جزء الغازات (gases).. والدكاترة دول معاك لحد الميدتيرم بس وهنا اهم حاجه المحاضرات والتركيز واكتب كل حاجه في المحاضره.. وبعد الميدتيرم هيدخل د/شهيره جزء الثيرمو (thermo).. و د/هناء في جزء (solution).. علي حسب الترتيب الابجدى بيكون معاك دكتورين لو من النصف الاول من الدفعه بيكون د\هناء و د\شهيره والعكس صحيح وهنا اهم حاجه الكتاب وتعلم علي كل حاجه تقولها الدكتوره... 

٤- لغة

دي ماده بسيطه جدا بتتكلم عن الصوتيات وجزء تاني بسيط من الجرامر.. بيشرحها د/احمد عبد الرحمن ود/ احمد بدير.. والماده من 50 درجه.. 15 ميدتيرم وأعمال سنه + 35 فاينال والامتحان بيجي سهل بس تكون حليت كام امتحان قبل كده وبيكون بنظام mcq .. 

٥- الميكانيكا

بتنقسم لجزئين  الجزء الاول استاتيكا (statics) معاك في الترم الاول والجزء الثاني ديناميكا (dynamics) معاك في الترم الثاني.. الماده من 200درجه.. 30 ميدترم اول+10 تسليم شيتات..30 ميدترم تاني +10 تسليم شيتات.. والفينال من 120 والفاينال اخر السنه الجزئين مع بعض.. الدكاتره في حوالي 7 او8 بيدخلو طوال السنه.. المهم انك تحضر المحاضرات وتحل كتير عليها باستمرار... 

٦- رسم هندسي

 الماده من 225 ودي اكبر ماده عليها درجات..وهتاخد اشكال هندسيه بسيطه.. 30 ميدتيرم اول ... 20 تسلم اللوح ترم اول.. 30 ميدتيرم تاني ... 20 تسليم اللوح ترم ثاني... والفينال من 125 ودي اخر السنه.

بالنسبة للترم الاول الفاينال بيكون رياضه 1 وفيزياء 1 ولغة وكيمياء 

وبالنسبة للميكانيكا ( statics) والرسم دول بتمتحنهم اخر السنه بعد ماتكمل دراسة باقي أجزاء الماده في الترم الثاني 

نخش بقا علي الترم التاني..

1. رياضه 2

تكامل وهندسه فراغيه.. الدرجات زي الترم الاول من 150 درجه.. 50 ميدترم وأعمال سنه +100فينال... والدكاترة جزء التكامل د/رضا عبدالقادر و د/ابراهيم صقر .. ود/محمد عيد و د/صديق صقر في الهندسه الفراغيه.. وهنا اهم حاجه الحضور علشان بيبقا في درجات والتركيز والحل باستمرار.. 

٢. فيزيا 2

الماده من 150 درجه.. 30 ميترم.. 30 معمل.. 90 فينال.. الدكاتره.. عندنا د/احمد عبدالله.. و د/ ناصر فرع الحرارية و د/احمد سمير فرع المغناطيسيه و د/أحمد خالد فرع الضوء ..

٣- تاريخ هندسي

ودي الماده الوحيده اللي بالعربيه عندنا.. الماده دي من 50 درجه..10 ميدترم.. و40 فاينال.. الماده بسيطه و بتتكلم عن معلومات عامه عن المجال الهندسي وامتحاناتها mcq.. 

٤- الانتاج

الماده من 125 درجه.. 20 ميدترم.. 30 ورش.. 75 فاينال وبيكون mcq.. والماده دي مهمه جدا ولازم تهتم بيها كويس جداااا من الاول علشان تستريح في الاخر والورش لازم تحضرها لان فيها حضور وغياب ومهم الحضور للفائده.. 

٥- حاسب الي

الماده من 75 درجه.. 25 درجه ميدترم والمعمل.. 50 فاينال.. الامتحان بيجي سهل بس تكون حليت امتحانات سابقه قبل كده ودايما بيجي mcq.. 

٦- ميكانيكا

 الجزء الثاني من الماده  (الديناميكا).. هي ممكن تكون اصعب شويه من الاستاتيكا اللي درستها ترم اول وامتحنت عليها ميدترم بس الماده جميله جداا بس المهم انك تحل كتير جداً علي كل جزء ونفس اعمال السنه زى الاستاتيكا 30 ميدترم تاني +10 تسليم شيتات.. وزي ما قولت بتمتحنها مع الاستاتيكا اخر السنه والفاينال 120 درجه..

٧- الرسم الهندسي

هتكمل ع الترم الاول وهتبدا بقاا تدخل في الاسقاط والاستنتاج والاستيل والتهشير.. وهنا اهم حاجه انك ترسم بايدك كتير وتتعود علي الرسم.. الخلاصه..

هندسه مش سهله.. بس لو انت مشيت الطريق صح هتعيش افضل ايام حياتك..

اقسام كلية هندسة شبرا جامعة بنها

1. كهربا باور 
2. كهربا اتصالات 
3. ميكانيكا باور 
4. ميكانيكا التصميم والانتاج 
5. مدني  
6. مساحه 
7. عمارة.

ويوجد للكلية فرعين واحد في محطة الخلفاوى ويضم اول 4 اقسام بجانب اعدادى والاخر في روض الفرج وهو الفرع الرئيسي ويضم اخر 3 اقسام --- 

ويوجد 5 اقسام كريديت (نظام الساعات المعتمده) 

1. برنامج هندسه الاتصالات والاليكترونيات والحاسبات 
2. برنامج الهندسه الصناعيه 
3. برنامج هندسه الطاقه والطاقه المستدامه 
4. برنامج الهندسه الكهربيه والتحكم 
5. برنامج هندسه البناء والتشييد

اصحي كده للنصيحه المهمه جداً دي ولازم ناخد بالنا منها كويس اوي ، هندسه شبرا نزلت قرار تشعيب جديد السنه اللي فاتت وهو ان كل قسم ليه مادتين او ماده لازم تبقي جايب تقدير جيد فيهم + انك تبقي جايب مجموع القسم

ودي شروط الاقسام والمواد اللي المفروض تجيب فيهم جيد 

1. قسم اتصالات وكهربا باور  : جيد فيزيا +جيد رياضه 
2. قسم ميكانيكا باور :جيد فيزيا +جيد رياضه 
3. قسم مدني :جيد ميكانيكا 
4. قسم عماره: جيد رسم 
5. قسم انتاج ومساحه من غير شروط بس لازم تبقي جايب  مجموع القسم

خليك فايق وذاكر كويس عشان متحطش نفسك ف موقف انك تخش قسم غصب عنك 

وحاول تذاكر المواد بالتساوي متهملش مواد والتركيز والمذاكرة باستمرار اول بأول مهم جدا ليكم وان شاء الله ربنا يوفقكم ويكرمكم بكل اللي فيه الخير

محاضرات اعدادي هندسة شبرا جامعة بنها

وده لينك درايف خاص بهندسة شبرا وعليه كل الداتا الخاصه باعدادي هندسة شبرا اخر 3 سنوات

https://drive.google.com/drive/mobile/folders/1i1qey3fP8Ux2plI_9wzIdcvMVJQ5Z_De/18oARChHFiqk_vZBjKy0opYPntS74qsfl?sort=13&direction=a

تعديل المقال