كلية هندسة جامعة سوهاج ، هنتكلم ف البدايه عن المواد هناخد 6 مواد كل ترم ( 750 درجة للترم الواحد) وان شاء الله كلوا سهل بالمذاكرة ودكاترة كلهم في غاية الاحترام والحضور مهم جدا عشان نفهم ايه اللي بيركز عليه كل دكتور
الترم الاول
1- فيزياء (150 درجة )
ليها كتابين حرارية وخواص مادة الاتنين في نفس الامتحان بيديها دكتور احمد يوسف امتحانه سهل بس عايزك تفهم الماده فهم وليس حفظ والدكتور بيراعي ربنا وبيشرح بضمير وفي غايه الاحترام وهو من احسن الدكاترة اللي هتتعرف عليها في الكليه
2- لغة ( 50 درجة )
دكتور أحمد قاسم (العميد) وكان الامتحان سهل وأغلبه من الكتاب ، ومهم جدا تجيب امتحانات سابقه لانها بتكرر بالنص يعني 90%من الامتحان بيكون متكرر من امتحان السنه اللي قبلها
3- رياضة (150 درجة )
هيديها دكتورين بس في نفس الامتحان جبر هيديه دكتور وجيه والامتحان بيكون على حسب حضورك وفهمك في المحاضرات وركز جدا جدا جدا علي اسئله المحاضرات و الكتاب بتاعه لانها بتيجي بالنص منهم & والتفاضل دكتور احمد ابو المجد دكتور امتحانه من مسائل المحاضرات بيركزها عليها جدا و بيجيب كام مسالة للناس اللي بتفهم
4- ميكانيكا ( 150 درجة )
بيديها دكتورين بس في نفس الامتحان استاتيكا بيديها دكتور حسين وده شرحه كويس جدا وبيركز علي الكتاب بتاعه قوي قوي
وديناميكا دكتور ابو النور وده بيركز علي اثبات القوانين اكتر من المسائل يعني اي اثبات تاخده تفهمه كويس قوي لانه بيجيبه في الميد او الفاينل امتحانهم متوسط ويكاد الدكتورين يكونوا بنفس الدماغ وبيركزوا علي اسئلة الكتاب قوي
5- انتاج ( 125 درجة )
الانتاج نفسه صعب فتلاقي نفسك مش فاهم ده شي طبيعي بيديه دكتور شريف أدهم ركز علي كل كلمة بيقولها في المحاضرة لان الامتحان بيكون من اللي بيقوله وبيكون بنسبه كبيرة من امتحانات السنين السابقه او بنفس المستوي فمهم جدا تروح مكتبه الكليه وتجيب امتحانات السنوات السابقه 2018 و2019و 2020 اي امتحان قبل دول مش هيفيدك لان الدكتور اتغير
الامتحان بيكون طويل وصعب شويتين تلاته اربعه ولازم المعلومة تكون حاضرة في مخك عشان مفيش وقت للتفكير وركز ثم ركز ثم ركز علي الرسومات لان كل سؤال لازم يقولك وضح مع الرسم والرسم بيكون عليه نص الدرجه
6- رسم هندسى (125 درجة )
حاول ترسم من أي مكان متتقيدش بالكتاب دور بنفسك وارسم واغلط عادي أهم حاجه تعود إيدك على الرسم بيديه دكتور شريف أدهم الامتحان بيكون مسالة ساهلة ومسألة متوسطة ومسالة صعبة عشان توضح المتميز ومش بتكون بدرجة كبيرة
بص الترم الاول في هندسه ساهل والتقدير فيه مضمون بس انت تحاول تعزل نفسك عن الناس المحبطه واول ماتدخل المدرج هتلاقي يفطه في وشك مكتوب فيها الانتاج ولا بيتحفظ ولا بيتفهم ملكش دعوه بيها وزي ماقولتلك سر الانتاج في امتحانات السنين السابقه
الترم التاني
1- فيزياء (150 درجة)
منقسمة الي كهربية وضوئية بس في نفس الامتحان بتديها الدكتوره ساره امتحانها بيجي ساهل جدا جدا وعايز اللي بيفهم فيزياء مش اللي بيحفظها والتقدير في الماده دي مضمون و نسبه كبيره جدا عندنا جابت امتياز وجيد جدا في الماده دي وتقريبا مفيش حد خالص شالها او جاب مقبول غير اللي كان غايب في الامتحان او اللي ساب الورقه فاضيه
2- كيمياء (125 درجة )
مقسومة الي كيمياء عامه ودي بيدها دكتور رافت الخطيب وده امتحانه سهل الي حدا ما ، ومضتيعش وقت في حل مسائل الكتاب بتاعه لانها كتيره جدا جدا ومش بيركز عليها قوي في الامتحان وزي ما قولتلك الامتحانات السابقه مرجعك الوحيد السنه كلها
وعضوية بتديها دكتورة اسماء اعرف هي بتركز علي ايه في المحاضرة وحاول تطبع السلايدات اللي بتشرح منها لان الامتحان بيكون منها وحاول تجيب امتحانات السنين السابقه لانها بتكررها
3- تاريخ العلوم الهندسية ( 50 درجة )
مادة ساهلة و امتحانها بيجي معظمه من الامتحانات السابقة واسالة الكتاب بيدها دكتور احمد قاسم عميد الكلية
4- رسم هندسى (125 درجة )
بصراحه رسم الترم التاني اصعب بمراحل من الترم الاول فمضيعش وقت وحاول ترسم علي كد ماتقدر سوا من الكتاب او من بره
5- رياضة ( 150 درجة )
وبتنقسم الي هندسة تحليلة وديه بيدها دكتور وجيه وزي ماقولتلك فوق الدكتور وجيه بيركز قوي علي اسئله المحاضرات والكتاب
وتكامل بيديه دكتور احمد ابو المجد وذي ما قولت نركز علي مسال المحاضرات اللي بيقولها واكتب وراه كل حاجة
6- برمجة ( 150 درجة )
بيديها دكتور احمد قاسم والدكتور محمد الزهاد بس احنا السنه اللي فاتت مشرحلناش غير الدكتور احمد قاسم و المعيد احمد عبد الستار الماده بصراحه تقيله شويه فركز قوي في الشرح وخصوصا شرح المعيد احمد عبد الستار وهو مشكورا عامل علي اليوتيوب 5 حلقات فيهم المنهج كامل والرابط بتاعهم اهو
ولو تقدر تاخدلك كورس قبل الامتحان خد علشان علشان تقوي نفسك في الماده دي (مش اجباري طبعا) ولازم يكون معاك امتحانات السنين السابقه في البرمجه لان الامتحان بيكون بنفس المستوي
نصائح عامه لطلاب اعدادي هندسة الفيوم
بالنسبه للإنتاج لازم تذاكر أول بأول وما تهملش ودا برضوا بيتطبق على باقى المواد والرسم لازم تعود نفسك انك تخلص الرسمه في وقت معين علشان في ناس كتير بتيجي في الامتحان ومش بتقدر تخلص الرسمه علشان اغلب الدكاتره بتلعب على عامل الوقت
اخر حاجه الناس اللى داخله هندسه من معهد هتلاقى الدنيا تقيله عليك في البدايه بس بعدين هتتعود بس اهم حاجه انك تهتم وهتجيب تقدير وترتب على الدفعه كمان
والدراسه عموما بتكون عربي وانجليزي هتدرس (رياضه1و2 وميكانيكا وانتاج وتاريخ علوم هندسيه )دول بالعربي والباقي انجليزي
زي ما قولتلك تتشقلب وتجمع الامتحانات السابقه في كل المواد من اول شهر علشان تساعدك في الميد والفاينل ومتتعبش في اخر السنه
بص حاول تصحاب المعيدين وتتقرب منهم وتاخد ارقامهم علشان لو في حاجه واقفه معاك ترجعلهم وانا هرشحلك كام معيد اول ماتدخل الكليه تحاول تتقرب منهم ولو قدرت تحضر السكاشن بتاعتهم يبقا حلو قوي
- رياضه 1و2 المعيد حارث
- ميكانيكا المعيد هيثم
- رسم الدكتور محمد خليل
- انتاج المعيد مصطفي محمود
ملحوظة: ممكن الدكاترة تتغير بس تغيير في أضيق الحدود
اقسام كلية هندسة جامعة سوهاج
من ناحيه الأقسام والتخصص بهندسة سوهاج عندك 3 أقسام
- مدنى
- كهرباء بتنقسم باور واتصالات
- عماره
وفى أغلب الأوقات بيكون تنسيق مدنى من جيد وكهرباء وعماره من مقبول بس شرط عماره انك تكون جايب تقدير في رسم اعدادى وتعدى اختبار القبول ، والسنه اللي فاتت مكانش في اختبار قبول وعموما انت لو عايز تدخل عمارة هتدخلها الشرط الاساسي انك تكون جايب مجموها وعموما انت لو معدي الجيد هتقدر تدخل اي قسم في الكليه