أخر الاخبار

ما هي كلية هندسة جامعة كفر الشيخ (مواد اعدادي هندسة والاقسام ) Faculty of Engineering Kafr El-Sheikh University

ما هي كلية هندسة جامعة كفر الشيخ (مواد اعدادي هندسة والاقسام ) Faculty of Engineering Kafr El-Sheikh University

كلية هندسة جامعة كفرالشيخ ، بدايةً كدا ألف مبروك علي النجاح بعد تعب وسهر وكفاح ومذاكرة ربنا مضيعش تعبكم ومراحش في الأرض وقدرتو ترفعوا راس أهلكم ورفعتو من قدر نفسكم الحمدلله الي ربنا كرمكم ولا تنسو فضل الله عليكم

وأهم حاجه تبعد عن الناس بتوع الكليه صعبه والكلام الي مبيقدمش دا وخوض انت التجربه بنفسك انت ظروفك غير أي حد يمكن هو فشل بس انت تقدر

مواد اعدادي كلية هندسة جامعة كفر الشيخ


نتكلم الأول عن المواد إن شاء الله هندرس 10 مواد في إعدادي هندسه كفر الشيخ طوال السنة الدراسية.

1-الرسم والإسقاط الهندسي:
الرسم مادة جميلة وهتحبها لو اشتغلت معاها من الاول واحده واحده وهي فعلا من أفضل المواد الي هتقابلها لا حفظ ولا كلام فاضي غير انك بترسم ، انت هتطلع كل ما عندك من فن وذوق فيها، وبكده بتنمي مهاراتك الإبداعية، المادة بتتكون من ( العمليات الهندسية + استنتاج المسقط الثالث + رسم الايزومتريك + القطاعات + الاستيل ) ، المادة عليها 250 درجة، 50 أعمال سنة ترم اول+50 أعمال سنة ترم ثاني+150 درجة امتحان فاينال واحد ف آخر العام، وبترسم لوحتين في الاسبوع، لوحة ف السكشن قدام المعيد، ولوحة واجب، وطبعا لو انت بترسم بانتظام ومش بتفوت اي لوحة، هيكون تقديرك كويس جدا (مثلاً امتياز) آخر العام هيدخلك ٣ دكاتره طول السنه احضر المحاضرات وهتستفيد منهم بجد واشتغل وشارك وعندك المعيدين ماشاء الله كويسين جدا ولو وقفت معاك حاجه مش هيتأخرو عليك

2-الفيزيا الهندسية:
مادة بتدرسها على مدار الترمين، يعني الترمين بيكملوا بعض في الدرجات، المادة ليها دكتورين، دكتور بيدرس كهربية ومغناطيسية، ودكتور بيدرس خواص مادة وحرارية وضوء. والموضوع سهل ولو بتحضر المحاضرات وبتذاكر أول بأول تجيب فيها تقدير كويس 
الماده عليها 300 درجة (150 ترم اول و 150 ترم ثاني)
ال 150 عبارة عن (60 عملي وشفوي وميدتيرم و 90 درجة امتحان فاينال)
وبردو المعيدين كويسين جدا جدا ودايما هيكونو معاكممش هيتأخرو وافتكرو كلامي 

3-الرياضيات الهندسية:
مادة بتدرسها على مدار الترمين أيضا، المادة هيدخلك فيها 3 دكاترة على مدار العام.
هتدرس جبر وتفاضل في الترم الاول، والترم الثاني هتدرس تكامل وهندسة تحليلية .
ودي من أسهل المواد في الكلية، لأن حضرتك بتبقي جاي من علمي رياضه وبالنسبالك الرياضيات هتكون سهلة لو انت كنت متميز فيها في الثانويه، أما الرجاله بتوع الفني تذاكر أول بأول والدنيا هتمشي كويس وهتجيب تقدير ان شاء الله
المادة عليها 300 درجة (150 ترم اول و 150 ترم ثاني)
ال 150 عبارة عن 40 أعمال سنة و 110 فاينال و المعيدين حلوين جدا 

4-الميكانيكا:
مادة بتدرسها على مدار الترمين، المادة عليها 200 درجة، استاتيكا ترم اول ب 100 درجة، وديناميكا ترم ثاني ب 100 درجة
هيقابلك دكاترة ومعيدين في المادة دي هتحبهم جدا  وبالذات البشمهندس سيف والبشمهندس محمد دياب والبشمهندس مسعد
المادة هيدخلك فيها ٣ دكاتره ، كل دكتور ليه جزء هيشرحه وامتحانتهم حلوة وفيها بونص كتير .. وسهل تجيب فيها تقدير كويس لو بتذاكر أول بأول

5-الكيمياء الهندسية:
مادة ليها دكتور واحد ومادة سهله على اللي يذاكرها ويتابعها اول باول، وصعبة على اللي هيهمل فيها، هتدرسها في الترم الاول بس و الدكتور صعب وبياخد غياب فاهم حاجة تحضر المحاضرات و السكاشن المادة عليها 125 درجة (50 أعمال سنة و 75 فاينال) وأول أسبوع هتعرف الدنيا وهيقولك علي الأدوات الي هتحتاجها

6-الحاسب الآلي:
مادة ليها دكتورين، هتدرسها في الترم الاول بس، ومن السهل تجيب فيها امتياز.
المادة عليها 100 درجة (30 أعمال سنة و 70 فاينال).

7-الإنتاج:
مادة هتدرسها في الترم الثاني، عليها 125 درجة (50 شفوي وحضور ورش و 75 فاينال).
وابقى جهز البدلة وانت رايح امتحان الشفوي في الورش
هيدخلك في المادة دي دكتورين منهم دكتور حسن ابو ريشة هتتعلم منه حاجات كويسة ف حياتك
والدكتور إبراهيم ماهر طبعا هيبسطلك الدنيا وهتفهم منه كويس وحقيقي المقرر هيفيدك في حياتك حتي لو دخلت أي قسم ومتنساش تحضر الورش بالبالطو

8-اللغة:
مادة بسيطة وامتحانها جزء منه بيجي من الشيت، عليها 60 درجة (15 أعمال سنة+45 فاينال) وليها دكتورين وهتدرسها في الترم التاني.

9-التاريخ الهندسي:
مادة نظري عليها 40 درجة (10 أعمال سنة+30 فاينال). بتعرفك عن الهندسه وأقسامها وهتدرسها في الترم الثاني.

10-حقوق إنسان:
مادة مش بتتضاف للمجموع بس عليها نجاح ورسوب طبعا، متشغلش بالك بيها بينزلها ورق آخر السنة بتحفظه وخلاص.
وهتدرسها في الترم الثاني بس.

كل المواد طبعا ليها محاضرات ومعظم المواد ليها سكاشن بتطبق فيها مع المعيد بتاعك على اللي اخدته في المحاضرة. وفي النهاية أحب أقولكم متقلقش من حاجه خالص طول ما انت بتحضر محاضراتك والسكاشن بانتظام هتنجح وهتجيب تقدير كويس كمان إن شاء الله

اقسام كلية الهندسة جامعة كفر الشيخ

ما هي كلية هندسة جامعة كفر الشيخ (مواد اعدادي هندسة والاقسام ) Faculty of Engineering Kafr El-Sheikh University

الاقسام في هندسة كفر الشيخ في عامة وكريدت الاقسام 

العامة :

  • ميكانيكا
  • كهربا
  • مدني
  • عمارة

الاقسام الكريدت :
  • ميكاترونكس

احب اقول ف الاخر أن الكلية سهلة علي اللي يذاكر اول باول المحاضرات ويسأل الدكاترة والبشمهندسين وهما مش بيضيقوا خالص من الاسألة دا هيعرفوا مين بيسأل وهيهتمو بيه وبيسألهم في المحاضرات و بيدوهم درجات حلوة في الشفوي وان شاء الله اللي هيذاكر هيجيب تقدير حلو والمحاضرات بتنزل علطول علي جروب الدفعة .

تاريخ نشأة كلية هندسة جامعة كفر الشيخ


صدر قرار السيد رئيس مجلس الوزراء رقم 1142 بتاريخ 25 / 11/ 1976 بإنشاء كلية الهندسة ضمن كليات جامعة طنطا .

· أعلن في عام 1984 عن طلب أعضاء هيئة تدريس وهيئة معاونة للعمل بالكلية وتم تعيين عدد منهم بالفعل في أقسام الهندسة الكهربية والهندسة الميكانيكية والهندسة المدنية .

· لم تفتح الكلية أبوابها طوال السنوات التالية حتى بداية العام الجامعي 1990/1991 وذلك لعدم وجود مبنى مناسب وعدم توافر الإمكانات المادية لتجهيز ورش ومعامل الكلية

· في أغسطس 1990 قدمت محافظة كفر الشيخ عرضا لافتتاح كلية الهندسة على أرض المحافظة ومن المعروف أنه يوجد فرع لجامعة طنطا بكفر الشيخ كان يضم في ذلك الوقت كلية الزراعة وكلية التربية وكلية الطب البيطري وفرع كلية التجارة

· أهدت المحافظة لجامعة طنطا المبنى السابق لتبدأ بة الدراسة بكلية الهندسة تبرع أهالي كفر الشيخ الكرام بدعم مالي من حصيلة الجهود الذاتية بلغ حوالي 900000 جنية للمساهمة في عمليات تجهيز ورش ومعامل الكلية .

· تبرع المستشار محمود أبو الليل محافظ كفر الشيخ بمساحة فدان به مصنع طوب أسمنتي للكلية .

· عاينت المبنى في شهر سبتمبر 1990 لجنة مشكلة من قبل الأستاذ الدكتور وزير التعليم ضمت كلا من :

الأستاذ الدكتور / إبراهيم فوزي رئيس هيئة الاستثمار الحالي

الأستاذ الدكتور / فاروق إسماعيل نائب رئيس جامعة القاهرة السابق

الأستاذ الدكتور / عبد الرازق عبد الفتاح

· وافقت اللجنة على المبنى ليكون مقرا تبدأ به الدراسة بكلية الهندسة .

· بدأت الدراسة بالكلية في يوم السبت الموافق 27/10/1990 بالفرقة الإعدادية وتم قبول 70 طالبا عن طريق التحويل من كليات الهندسة بالجامعات الأخرى

· بدأ على الفور الاستفادة من الدعم المالي المقدم من أهالي محافظة كفر الشيخ فتمت إجراءات شراء أو تركيب وتشغيل الورش الميكانيكية التي يحتاجها طلاب الفرقة الإعدادية فتم تجهيز الورش الآتية:
  1. ورش الخراطة وتشغيل المعادن.
  2.  ورش الحدادة واللحام
  3.  ورشة النجارة
  4. ورشةالسمكرة.
  5.  ورشة البرادة

· كما تم تجهيز معمل للحاسب الالى لتدريب طلاب الكلية بمختلف سنوات الدراسة وقد صدرت موافقة السيد الوزير على اللائحة الداخلية للكلية بتاريخ 13 / 8 /1997.

· واليوم تم نقل الكلية إلى مقرها الجديد في صرح عظيم تم تصميمه وانشاؤه عن طريق فريق عمل متميز من كلية الهندسة جامعة كفر الشيخ.