قسم الهندسة المدنية : قسم الالف شيت ، قسم مدنى او قسم الشعب زى ما بيقولوا ..
مفاهيم غلط عن قسم مدني
قسم مدنى قسم الشعب بس مش اسهل قسم في الكليه ولا الكلام ده بالعكس من اصعب الاقسام فى الكلية و من اكتر الناس اللى بتتعب دراسياً و عمليا و فعلا القسم محتاج مذاكرة كتير بسبب التسليمات و الشيتات اللى بتطلب منك باستمرار
الدراسة فى قسم مدني
اولا الدراسه في قسم مدني بتتطور من سنه للتانيه يعني
#سنه_اولي
بندرس حاجات بشكل عام كتير ومش كلها تخصص مدني وبتبقي سنه غريبه وبتحس انك مش فاهم بيحصل فيك ايه ولا بتعمل ايه... بتدخل قاعات الرسم ترسم في ترع وقطاعات استيل وطرق وانت مش مستوعب هتعمل بيهم ايه بس عموما هتعرف في السنين الجايه..
اما عن باقي المواد ف هتدرس رياضه و فيزياء وميكانيكا ( زى ما قولنا مواد مش تبع القسم اوي) ومعاهم مساحه وstructure والرسم وماتريال الي نقدر نعتبرهم مواد القسم و مواد محورية كمان ....
#سنه_تانيه بتحس ان سنه اولي كانت لعب عيال بنبدأ ندخل في مواد مدني و بتبقي سنه متعبة وصعبه شويه كفهم للمواد ودراسه مش كتسليمات بمعنى اصح..
و احنا بنعتبر ان سنه تانيه في مدني هى بداية الجد بتبدأ تدرس مواد فى التخصص بشكل كبير (زي الخرسانه وfluids و ري وبتدرس و بيكمل معاك الstructure و المساحه و الماتيريال
#سنه_تالته (اسمها العلمي ليفل الوحش) :D بتبدا الصعوبة تكبر و الموضوع يبقى متعب و تحس فعلا يعنى ايه مدنى.. انت هتبقي في الاسبوع بتسلم اكتر من شيت و لوحة وعليك اكتر من كويز والاسبوع يجر اسبوع والدنيا هتكون متعبة جدا ، انت هتدرس فى سنة تالتة
- هيدروليكا
- وخرسانه
- واستيل
- وري (منشأت ري وكده)
- وSoil
- وstructure (اه الاستراكشر ده زي صاحبك كده في القسم مش هيسيبك التلات سنين دول)
#سنه_رابعه دي سنة المشروع انت خلاص هتبقي اتعودت و هتكون عرفت الدنيا ماشية ازاى و مش هيهمك لو هتسلم فى اليوم 100 تسليمة..
- وهتبقي بتدرس خرسانه
- واستيل
- وري
- وطرق
- وهندسه صحيه (ماده حلوه الصراحه وجديده بس هتحبوها)
- واساسات
- وموانئ و ادارة
- ومواد المشروع (تختلف علي حسب مشروعك)
فروع الهندسة المدنية
١- هندسة الإنشاءات: وتختص بتصميم وتنفيذ المنشآت المعدنية والخرسانية
2-هندسة الطرق : وتختص بتصميم وإنشاء الطرق وهندسة النقل وهندسة المرور.
3- هندسة الموائع: وتختص بدارسة خصائص السوائل وأثرها على المنشئات "مثل أثر الرياح على المباني أو ضغط المياه على السدود وما إلى ذلك".
4- هندسة صحية: وتختص بتصميم وتشغيل أنظمة الصرف الصحي ومحطات المياه.
5- هندسة الري: وتختص بدراسة أساليب التحكم في أنواع الري المختلفة والمنشآت المائية الزراعية.
6- هندسة الادارة والتشييد:وتختص بدراسة الكميات وتنفيذ المنشآت بأقل كلفة ممكنة وأسرع وقت ممكن وإدارة موقع العمل
7- هندسة الموانى والمنشآت البحرية: ويختص بتصميم وتنفيذ الموانى والمنشآت البحرية من أرصفة وحواجز أمواج وكذلك سبل حماية الشواطئ
بس كدة ؟! لا طبعا مدنى فيه مجالات لا حصل لها ولكن وضحنا الاهم فقط
مجالات عمل مهندس مدني بعد التخرج
طب انا اشتغل ايه فى كل فرع من دول ؟ ليك اكتر من وظيفة
1- مهندس تصميم : بتاخد اللوحات من مهندس معمارى و تبدا تصمم المنشأ بجميع تفاصيله علشان نقدر نحقق حلم المعمارى
2-مهندس حصر كميات و شوب دراوينج : بيبقى مطلوب منك تحسب الكميات المطلوبة للمبنى ..يعنى المبنر محتاج خرسانة اد ايه ..محتاج حديد اد ايه و هكذا ...وكمان بيبقى مطلوب منك تعمل لوحات بنسميها shop drawing ديه لوحات بتربط بين مجال التصميم و التنفيذ
3- مهندس تنفيذ : بتستلم لوحات المعمارى و الانشائى ( اللى المصمم عملها ) و كمان لوحات shop drawing وتبدا تنفذ المبنى على ارض الواقع
4- مدير مشروع : مطلوب كنك تبقى عارف كل صغيرة و كبيرة فى الموقع و تقدر تنفذ المبنى فى اسرع وقت و باقل تكلفة و اعلى جودة
افضل الشركات للتصميم .. ECG. Ehalf .دار الهندسة. ديتاك و محرم باخوم .. (الشركات كتير جداً)
و شركات التنفيذ :المقاولون العرب و اوراسكوم .وغيرهم كتير.
و فيه مجالات اكتر من كدة ولكن بردو ذكرنا الاهم
بالنسبة لفرص العمل لازم تبقى متاكد ان قسم مدنى من اكتر الاقسام اللى متاح ليه فرص عمل بسبب كثرة المجالات و الفروع
وفيه ميزة كمان ، مدنى من الاقسام اللى بتسهلك تبدا شغلك الخاص ..يعنى ممكن تشتغل من على النت بس فى التصميم و حصر الكميات ..ممكن تتفق مع ناس زمايلك وتفتح مكتب هندسى
عيوب قسم مدني
كثرة الخريجين ...طبعا كلنا عارفين ان فيه معاهد و كليات خاصة بتخرج مهندسين مدنى و ده بيخلى المرتبات لاسف قليلة و لكن مع اجتهادك و زيادة معلوماتك و مهاراتك هتقدر تفرض على صاحب الشركة يديلك مرتب اعلى
ازاى تكون متفوق في قسم مدني
اهم حاجة تحضر و تعمل الشيتات بنفسك و بايدك و بلاش تنقلها لانك كدة بتدرب نفسك على الامتحان ....النجاح فى القسم سهل باذن الله متقلقش ولكن لازم تحاول تجتهد و تفهم انت بتدرس ايه
لازم تتعلم برامج كتير علشان هتساعدك فى مشروع التخرج و فى الشغل بعد كدة
لازم تنزل تدريب فى الصيف دايما فى مواقع و فى مكاتب
الخلاصة مدنى قسم جميل جدا والله و هو بحر فعلا مش مجال صغير و باجتهادك هتقدر تبقى حاجة كويسة باذن الله