١ ايه الفرق بين مهندس كيميا وخريج علوم كيميا ؟
باختصار كده احنا بنهتم بالصناعات الكيميائيه وتطبيقات الكيميا ف الصناعه يعني ايه ؟! يعني احنا مثلا عارفين ان A+B=C
احنا بقي م مهندسين كيميائين دورنا نعمل ايه بقي عشان نطلع C ده ف المصنع بكميات كبيره ف وقت قليل بجوده عاليه واقل تكلفه يعني تظبط الضغط ودرجة الحراره ف آل reactor عشان يطلع وتبقي عارف ان في هنا مثلا برج تقطير وبعديه مبرد وبعديه مضخه بتدخله ع مفاعل تاني وانت اللي بتصمم الاجهزه دي وتتحكم ف طولها وسمكها وكلام كبير كده عشان نطلع C هتعرفوه بعدين
بتاع علوم بقي بيدرس كيميا بحته اغلب شغلهم ف المعامل يحط كذه ع كذه عشان يطلع كذه ف المعمل ملوش دعوه بالمصنع ولا ليه دعوه بالكميه ولا يتحكم ف جوده وتكلفه والكلام ده فيه فرق كبير بينا وكل واحد ليه شغله
٢ بندرس ايه في هندسة كيميائية ؟!
ف اولي تقريبا كل الاقسام عندنا بيدرسوا نفس المواد بتختلف ف مادتين تبع القسم ومش هتستفيدوا من اولي اي حاجه ف اي قسم مجرد سنه عاوز تجيب فيها تقدير عشان ينفعك بعد كده وده سهل تجيبه ف كيميا
الناس اللي مبتحبش آل math .. بندرسه ف اولي وتانيه بس ومفيش تكامل كتير هي اساسيات بس وهبل يعني افرحوا
الفيزيا تيرم واحد ف اولي وخلصت واسهل من اعدادي ...
مفيش رسم وجو المساطر ده غير اول تيرم بس وهترمي المسطره ومش هيبقي عليه درجات كتير
٣ هحتاج كورسات قبل ما ادخل ؟
مفيش كورسات هتحتاجها ف اولي وحاولوا تفرحوا ف الاجازه لان الشغل الجد هيبدأ .. هتحتاج كورس excel و hysys ودول هتحتاجهم من اول تانيه ان شاء الله
٤ مهندس كيميا بيشتغل فين و ليه شغل كتير ولا لأ ولو انتي بنت ادخل ع ولا لأ ؟!
- احنا بنشتغل ف اي مصنع
- وشركه ليها علاقه بالكيميا من اول اكياس البلاستيك لحد الطاقه النوويه
- بنشتغل ف مصانع الاسمنت والاسمده والبتروكيماويات وتكرير البترول فلوس بقي وعز وكده ..
- والادويه وتحلية المياه
- وممكن تشتغل ف آل safty
- ومجالات تانيه كتير لو عدتها مش هنخلص ..
- لو انتي بنت ده تقريبا انسب قسم ليكي بعد عماره والبنات المتميزه بس بتشتغل لو داخله تقضيها متدخليش عشان صحاب المصانع عنصريين وبيحبوا الشباب عشلن بيستحملوا السهر والسفر والضغط وكده لو متميزه كل ده فاكس هيطلبوكي
ياعم انجز هشتغل اما اتخرج ؟!
نصيحه من اخ اكبر محدش عارف الدنيا هيجرا فيها ايه والسوق هيبقي عامل ازاي بعد ما تتخرج بس الشغل موجود ومطلوبين واحد صاحبي عايش ف السعوديه بيقولي اعلي راتب مهندسين الكيميا هناك ... خش القسم اللي بتحبه والشغل ده حاجه بتاعت ربنا بس لو انت متميز كل الشركات هتجري وراك
٥ ايه اللي بيميز القسم وليه الناس مبتحبش تدخل كيميا وعندكم هوس انه قسم الساقطين او الشايلين مواد !؟
خليني بس اقولكم ان دفعتنا معظمهم امتياز وجيد جدا وجيد ف اعدادي وداخلين بمزاجنا .. عندنا ف القاهره الناس مبتبقاش عارفه القسم كويس وتقولك طب مانا كنت دخلت علوم ومقرأوش الفرق اللي فوق قبل كده عندنا بيبقي قليل عشان كله بيجري ع مدني عشان يسافر الخليج .. القسم عندنا عدده قليل ف مصر يعني مفيش غير عندنا واسكندريه والمنيا واصحاب الشركات عارفين يعني ايه هندسة القاهره
سهل تبقي معيد ف كيميا ان شاء الله .. عندنا كلنا اسره واحده وكلنا عارفين بعض اللي ف اولي عارف اللي ف رابعه والدكاتره بتوع كيميا زي ابهاتنا والمعيدين اخواتنا وهتلاقيهم اقرب ليك من صحابك وممكن ينزلوا معاكم يتفرجوا ع ماتشات ع القهوه حاجه فل يعني .. محدش بيسيب التاني وكلنا اهل يعني انا مثلا فاهم كتير ف الكيميا كنت بشرح كل المواد اللي ليها علاقه بالكيميا وعاملكم فيديوهات ومظبطكم وفي ملخصات ودنيا حلوه واللي بيعرف حاجه بيقولها للتاني مفيش جو الخباثه وعاوز اطلع الاول ده كلنا ماشين بمبدأ خير الناس انفعهم للناس
كيميا اعدادي ملهاش علاقه بالقسم لو جبت درجه وحشه فيها ادخل بردو
٦ الشركات اللي بنجري عليها اما نتخرج من هندسة كيميائية
- Cocacola
- p&g
- nestle
- pepsico
- حلوان للاسمده
- مصانع الانتاج الحربي وغيرها كتير