قسم الهندسه الطبيه ، في البدايه كدا احب اوضح ان القسم موجود ف المنيا و القاهره و حلوان وبنها بس .. و موجود ف المنصورة بس بنظام كريدت و موجود ف جامعات خاصه كتير زي الشروق والعاشر
نبدأ نتكلم عن القسم بقي من حيث المعني ، اللي بيسمع هندسه طبيه بيستغرب وبيقول ايه العك دا !!
الهندسه الطبيه هو مجال خاص بأنو يقفل الفجوة اللي مابين الهندسه و الطب .. بمعني انك بتستخدم كل التكنولوجيا و التطورات الهندسيه ف حل كل المشاكل الطبيه ودا بأختصار..
الهندسيه الطبيه مجالها واسع وشامل حاجات كتيره جدا و فيها كذا تراك ممكن الواحد يتخصص فيه و يشتغل فيه .. بمعني انك بعد م تتخرج ممكن تشتغل ف الحاجات دي ..
1- clinical engineer
ودا المهندس اللي شغال ف المستشفي وبيبقي مسئول اداريا عن كل اجهزة المستشفي من حيث الصيانه الدوريه و التوكيلات و شراء الأجهزة الجديده و وضع المواصفات وهكذا.
2- Biomedical engineer
ودا المهندس اللي بيشتغل ف شركه صيانه اجهزة طبيه و استيراد وتصدير .. دا بيشتغل ف الصيانه ف البدايه بيكون مؤهل انو يعمل صيانه لنوع معين من الأجهزة و لازم يكون كويس جدا ف الالكترونكس و واخد كورسات صيانه كتير ... و ممكن يشتغل مهندس مبيعات و دا بيبقي مسئول عن عمليه بيع الاجهزة للمستشفيات .. هو اللي بيعرض الجهاز ع المستشفي ب المواصفات و بالسعر .. و هو اللي بيسلم الجهاز وهو اللي بيعمل كورس تدريبي للممرضسن و الدكاترة علشان يعلمهم ازاي يستخدمو الجهاز و ازاى ينضفوه ولو حصل مشكله ف جزء معين ازاى يتصرفو و هكذا..
3- Programming engineer
ودا المهندس اللي بيبقي ماسك ف تراك البرمجه و بيبقي مفتوح قدامو اكتر من مجال .. انو يشتغل ف الأجهزة او يشتغل ف شركات تانيه طبقا لامكانياتو و الكورسات اللي معاه .
4- R&D
ودا اللي بيشتغل ف مجال البحث العلمي و التطوير .. الشخص دا بيكون دارس كويس نوع معين من الأجهزة و بييدأ يشتغل عليها و يحاول يضيف ليها جزء بيحيث يطورها و يخليها اكتر سهوله و رفاهيه .. ومعظم شغلو بيكون بحث علمي و نشر رسائل وابحاث.
5- Academic field
وهنا بيقي ممكن تشتغل ف المجال الأكاديمي ف اي جامعه خاصه و دا لان القسم مطلوب جدا و الاعداد فيه قليله ف لينا الفرصه اننا نتعين ف اكتر من جامعه خاصه و نعمل فيها ماجيستير ونشتغل فيها .. بس يكون تقديرك العام عالي و مرتب ع دفعتك.
من حيث الدراسه بقي ف عندنا ف المنيا بندرس جزء طبي و جزء هندسي .. الجزء الطبي بندرس ( بيولوجي - هيستولوجي - فيسيولوجي - اناتومي - كيميا حيوي - فيزيا حيوي ) ..ودا الهدف منو نعرف جسم الانسان ونفهم انواع العضلات و العضم بحيث لو حبينا نطور جزء معين من جهاز او طرف صناعي نبقي فاهمين جسم الانسان ماشي ازاى وقابل الحاجه دي ولا لا و نصمم ع اساسو
الجزء الهندسي ودا بندرس فيه عادى رياضه و فيزيا و الكترونكس ١ و الكترونكس ٢ و برمجه .. بندرس image processing & pattern recognition .. بندرس مادة اسمها Radiology ودى بنعرف فيها معظم اجهزة الاشعه بالتفصيل من جوا و كيفيه شغلها و فكره عملها .. بتدرس كنترول بردو و تحكم