قسم عمارة من الاقسام الجميلة جداا ببساطة هوا قسم الهندسة ممتزج ب فن وجمال
مفاهيم غلط عن القسم ، بيقولو عليه قسم الفرافير !! بالعكس هوا من اصعب الاقسام اللى ممكن تشوفها ان لم يكن الاصعب بسبب طبيعه القسم اللى مختلفه عن باقى الاقسام هوضحلك كمان شويه ..
المهندس المعمارى هوا الاساس اللى بيصمم كل حاجة من ارض فاضيه الى مدينة كامله او مبنى كامل بكل حاجة فيه وحواليه والمدنى بيصمم انشائيه وينفذ شغل المعمارى .. المعمارى بيصمم ويعمل ( رسومات تصميميه .. رسومات تنفيذيه .. رسومات صحية .. رسومات كهربية .. باختصار)
المعمارى يقدر يتحكم ف البيئه بمعنى انه يقدر يعمل مبنى يوفر ف الطاقه كهربا بقى وتكييف و.. وانه يتحكم ف كمية الاضاءه اللى داخله للمبنى بحيث انه يعمل اضاءه طبيعيه وكميه الهواء ويعمل تهويه طبيعيه ويتحكم ف درجه حرارة المبنى من الداخل لو الجو حر جدا يخليه جوا رطب ويحمي داخل المبنى من حرارة الشمس ولو برد يخليه دافىء طبعا الحجات دى ف حدود ودراسات ....غير الاستدامه انه يخلى المبنى او المدينه مستدامه تعيش لاطول فتره وغير مضر للبيئه من خلال الطاقه وعده اساليب
وغيرها من الحجات اللى ماتعرفهاش عن المعمارى ..
الدراسة في قسم عمارة :
عموما بتاخد مواد عمارة مع ماده او اتنين من مدنى كل ترم لحد سنه 3 ورابعه مفيش حاجة من مدنى..
*تصميم معمارى .. و تنفيذية (انشاء معمارى ) دول اساس القسم معاك كل ترم مشاريع ديزاين ولوح تنفيذية
#سنة_اولى
هتاخد (تصميم معمارى ترم اول وتانى .. انشاء معمارى ترم اول وتانى .. تاريخ ونظريات عمارة ..ظل ومنظور.. تدريب بصرى .. تقارير فنيه.. رياضة) مواد مدنى(مساحه .. استراكشر ..خواص مواد )
#سنة_تانية
هتاخد (تصميم معمارى ترم اول وتانى .. انشاء معمارى ترم اول وتانى ..تطبيقات حاسب ف العمارة ترم اول وتانى ..تاريخ ونظريات عمارة .. تاريخ تخطيط ..تصميم عمرانى .. تحكم بيئى ) مواد مدنى (خرسانه .. ستيل )
#سنه_تالته
هتاخد (تصميم معمارى ترم اول وتانى .. تنفيذية (انشاء معمارى) ترم اول وتانى ..تخطيط ..نظريات وفلسفه العمارة .. العمارة الخضراء والاستدامه .. اسكان وتخطيط .. هندسه صحية .. ادارة مشروعات .. تصميم لاند سكيب ) مواد مدنى (أساسات وميكانيكا تربة )
#سنة_رابعه
هتاخد (تصميم معمارى ترم اول وتانى ..تنفيذية(انشاء معمارى) ترم اول وتانى .. تصميم داخلى .. تخطيط مدن .. مواد اختيارى )
الامتحانات ف عمارة فيه مواد بتبقى 7 او 6 ساعات وياريتهم بيكفوا (اسد يالا فيه ايه ) وفيه مواد 3 ساعات
المواد بتتدرس فيها ايه : تصميم معمارى: مشروع كل ترم دا اساسى بتتعلم فيه الديزاين بكل حاجة فيه.
تنفيذية :لوح وتسليمات هتتعلم رسومات تنفيذية وصحيه وكهربيه
تحكم بيئى واستدامه دول كلمتك عنهم فووق خالص
تاريخ عمارة وتاريخ تخطيط دول مواد نظرى فيهم اسمهم باين عليهم بيشرحوا ايه
تخطيط بتدرس فيه تخطيط المدن والمجاورات والشوارع واى نقطه واى شجره موجوده المدن عموما
تطبيقات حاسب هتتعلم شويه من البرامج اللى بتستخدمها
وغيرها من المواد بقى ..
الحياة في القسم خلال 4 سنين عامله ازاى ..
عمارة تختلف جدا عن اى قسم يعنى مش هتدخل محاضره تسمع كلمتين م الدكتور وممكن تاخد كويز وبعدين تدخل سكشن المعيد يشرح وانت مستمع وف البيت تلاقى قدامك كام شيت تحلهم وخلاص مفيش الكلام دا ف عمارة .. هتلاقى كمية ضغط نفسى وشغل طول الترم من اول يوم مشاريع واسكيز وتسليماااااااات كتيير واسكيز وكويزات وابحاث وبرزنتيشن ولوح كتييييير (خلى بالك من ضهرك يا وحش عمارة عاوزه صحه )
الامتحانات اسهل واريح وقت لعمارة مفيش الا كام ماده نظرى ومدنى ويجى 3 مواد فيهم رسم ومعلومات شويه
يومك هيبقى عامل ازاى .. هتلاقى نفسك شغال ف المشروع دا وشويه ف المشروع دا وعليك بحث هيتسلم عاوز تعمله غير برزنتيشن وعليك لوح هتسلمها وعليك داتا لازم تجمعها عشان تعمل اى حاجة من اللى فوق دول لان مفيش دكتور او معيد بيدى معلومات كامله او مابيعلموكش اى حاجة وهتلاقى نفسك عاوز تظبط نفسك ف البرامج اللى بتستخدمها تعب وضغط كبير بس ممتع جدااا لما تلاقى نتيجه ف الاخر
صاله الرسم هيا حياتك محاضرات سكاشن كله وهتتصاحب ع المعيدين والدكاترة من كتر التعامل والميزة الحلوة ان عمارة اسره مع بعضيها لانك هتتعامل مع كله شغل ابحاث ومشاريع و....
بمعنى هيطلب منك ابحاث عن مواضيعSelf learning عمارة قسم
كبيرة مخدتهاش هبحث عنها وتعملها برزنتشين غير ان الدكاتره والمعيدين مابيقلوش كل حاجة كله انت بتتعلمه بنفسك.. فيه مواد انت بتشرحها من اولها لاخرها بحث عنها كلها وبرزنتيشن وكل مجموعه تشرح جزء من المهنج
البرامج المستخدمة في قسم عمارة :
3ds max .. revit ..autocad ..photoshop
دول اساسى + برامج تانيه
Lumion .. rhino .. grasshopper ..
دا غير برامج simulation
هتتعلم البرامج دى ف الاجازة لوحدك او تروح كورس ولازم تتدرب عليها كتير عشان تظبط فيها طول ما انت ف عمارة
السنة الاولى مانيوال وبعد كدا ديجيتال فيه جامعات تانيه اول 3 سنين مانيويال وبعد كدا ديجيتال
فى اولى عندك مشروع كل ترم
تانيه هتلاقى مشروعين ف الترم
تالته 3 او 4 مشاريع ف الترم
رابعه زى تالته + ان مشروع التخرج بيبدأ من الترم التانى
*****عمارة عايزة صحة وفلووس وتتحمل الضغط النفسى *****
مواد مدنى هيا الاسهل بالنسبه لواحد ف عمارة لان عنده الاصعب واللى بياخد شغل ووقت اكتر
مجال شغل عمارة كتيير ..
- مهندس تصميم معمارى
- مهندس تنفيذى
- مهندس استشارى
- مهندس تخطيط
- مهندس تصميم داخلى (بس مش اوى)
- مهندس لاند سكيب وتصميم عمرانى
وفيه ناس من كتر شغلها وحبها لبرامج الجرافيك اللى بنستخدمها بتتجه للمجال دا وتسيب عمارة بعد التخرج شغل عمارة كتيير.. ف مصر بص على مشاريع المقاولين و ماونتين فيو ومشاريع طلعت مصطفى و اوراسكم و.. برا مصر بص على دول الخليج مش هقول اكتر من كدا بس م الاخر عمارة حلوه جدااا وممتعه كتفكير وكمجال وكشغل
مرفق صور تصميم معمارى .. رسومات تنفيذيه .. تخطيط منطقه من ( مدينتي )