القائمة الرئيسية

الصفحات

ازاى بنختار الـ ‏PLC ‎المناسب للتطبيق أو المشروع بتاعنا ‏

اختيار الـ PLC المناسب للمشروع بيكون بناء على عدة عوامل ....
1 - فهم متطلبات منظومة التحكم والتطبيق اللى هيتم التحكم فيه من الـ PLC 
2- حجم الـInputs/Outputs المطلوبة
3- أنواع الـ Inputs/outputs دى 
4- حجم الذاكرة المطلوبة للـ PLC 
5 - سرعة الـ CPU الخاصة بيه
6 - المتطلبات الكهربية للمشروع 
7 - ايه الـ Communications اللى هتتعمل 
8 - الـHuman interface المطلوب
9- المتطلبات الفيزيائية .
10- متطلبات خاصة بنوع معين من شركات الـ PLC

ايه بقى معنى كل جزء من دول ..

1 - فهم متطلبات منظومة التحكم والتطبيق اللى هيتم التحكم فيه من الـ PLC :
نقطة البداية لأى مشروع اللى هو عباره عن حل لمشكلة معينة او عمل لعمليه معينة هو فهم العملية دى وتحليلها لعمليات تانية صغيرة .
أى برنامج مهما كان كبير هو عبارة عن مجموعة برامج أو عمليات صغيرة محطوطة جنب بعض ولما بتترابط كلها سوا بينشأ عندى البرنامج الكبير ده...
علشان كده قبل ما بنبدأ فى تنفيذ أى مشروع اوتوميشن بنعمل معاينة للمشروع ده واللى عن طريقها بنخلى الراجل الـ Operator يحكيلنا هو السيستم ده أو المكنه دى شغاله ازاى ؟
فمثلا ممكن يقولنا ان المكنة دى فيها فيها Position control  احنا هنطلع من الكلمة دى ان احنا واحنا بنختار الـ PLC لازم نجيب نوع الخرج بتاعه ترانزستور مادام هيبقى عندى سيرفو علشان الـ Position control على سبيل المثال .

2- حجم الـInputs/Outputs المطلوبة :
بعد ما بنعرف طريقة عمل السيستم بتاعنا الخطوة التانية بتكون ان احنا نعمل حصر بعدد المداخل والمخارج بتاعت السيستم .
المداخل بتكون أى switch أو Sensor والمخارج هى أى Actuator موجود وده بيفيدنا علشان نجيب PLC عدد الـ I/O بتاعه مناسب للسيستم ..مش كبير أوى ويبقى تكلفة على الفاضى ولا قليل ومينفعش يشتغل .

3- أنواع الـ Inputs/outputs دى :
طبعا احنا عارفين ان أى PLC فيه كروت ديجيتال وكروت انالوج وكروت حرارة فأثناء واحنا بنعمل حصر للمداخل والمخارج لازم بنحدد نوع كل دخل وكل خرج علشان نبقى عارفين هنجيب كام كارت من كل نوع .

4- حجم الذاكرة المطلوبة للـ PLC :
الحقيقة ان موضوع الذاكرة ده مش فى كل الأوقات بنلجأ ليه علشان فى معظم التطبيقات الصغيرة والمتوسطة بنكون متأكدين ان الذاكرة هتكفى المتغيرات اللى هتعامل معاها فى السيستم بتاعى ...بس اللى المفروض يتعمل واللى لازم يتعمل فى التطبيقات الكبيرة انى لازم اعرف انا هتعامل مع كام Memory word لمتغيرات هاخدها عندى اخزنها واتعامل معاها وهدخلها فى عمليات اد ايه وكل عمليه هتحتاج كام memory word أو كام Data register وهستخدم كام تايمر وكام كاونتر وكام دخل وكام خرج علشان ابقى عارف هل الـ PLC بتاعى هيشيل ده ولا لا ...
ممكن الـ PLC يقولك انا اخرى مثلا 1024 Input /output وانت هتحتاج أكتر وهتجيب كروت وتركبها بس  مش هيتعرف عليها لأنه جاب آخره على سبيل المثال .

5 - سرعة الـ CPU الخاصة بيه : 
 سرعة الـ CPU برضو اللى هى الـ Scan cycle  من الحاجات اللى مبنركزش عليها اوى واحنا بنختار الـ PLC بس اللى المفروض يحصل برضو اننا ندرس السيستم كويس ونشوف سرعة تنفيذ الأوامر فيه ايه وسرعة الميكانيزم بتاعنا اد ايه ....يعنى ممكن انت عايزنى أول ما اشوف سينسور ادى خرج فى جزء من الميللى ثانية والجزأ ده هيفرق معاك فى العمليه بس الـ Scan cycle بتاعتى جزء تانى اكبر منه فعلى ما يدى الخرج هيكون الـ Operation باظت منك .

6 - المتطلبات الكهربية للمشروع  :
مره كنا بنعمل مشروع نظام حمايه لونش علشان لو شال اكتر من الحمولة بتاعته ندى انذار وكده علشان ميحصلش مشكلة ونسينا حاجة مهمة جدا ان الونش ده بيتحرك وبيمشى فلو جيبت للـ PLC  دخل 220 من فيشه فى الموقع ولا حاجة مش هتفضل مادد سلك وتطول فيه علشان والونش بيتحرك السلك يتحرك معاه ...وكان الصح ان احنا نجيب الـ PLC الدخل بتاعه 24 فولت ونغذيه من البطاريه بتاعت الونش نفسه ...
فانت لازم تراعى الحاجات الكهربية دى وانت بتعمل المشروع بتاعك يعنى هل هتحتاج 220 ولا لا وهل متوفرين عندك ولا لا ؟ 
طيب هلعندك 24 للدخل بتاعك ولا لا
طيب هل الحساسات بتطلع 24 فولت ولا 12 ومش هتنفع معاك علشان الـ PLC عايز 24 للدخل ؟ 
وهكذا 

7 - ايه الـ Communications اللى هتتعمل :
فى بعض التطبيقات بيبقى عندك Network مش مجردPLC شغال فبتشوف هل انت هتعمل الشبكة دى Eithernet ولا واى فاى ولا GPRS ولا كابلات ولا ايه بالظبط وتختار الـ PLC اللى يدعم الكلام ده وكمان تشوف الأجهزة اللى فى الشبكة بتتكلم مع بعض ببروتوكول ايه وتجيب PLC يكون بيدعم البروتوكول ده.

8 - الـHuman interface المطلوب : 
تشوف انت هتحتاج لوحة مفاتيح عادية ولا شاشة ولا سكادا وتختار على اساسها الـ PLC يعنى مثلا انت فى الباند اللى فوق عملت Serial communication وهتحتاج لوحة مفاتيح عادية مش HMI يبقى انت تجيب PLC فيه بورت واحده سيريال توفيرا للفلوس ...طيب هتحتاج HMI يبقى لازم الـ PLC يكون فيه 2 بورت سيريال علشان تعمل الاتنين Communication .

9- المتطلبات الفيزيائية :
تشوف الـ PLC ده هتحطه فى بيئة عامله ازاى هل هيكون جنب مياه ولا فى مصنع غزل جنب غبار ولا فى محطة مياه وسط غاز كلور وعلى اساسه تختار الـ PLC بدرجة حمايه IP مناسبه .

10- ممكن عميل يطلب منك حاجة فى المشروع نوع معين من أنواع الـ PLC اللى بيدعمها ... يعنى مثلا لو قالك عايزين البروجيكت ده يتبرمج Object oriented أو بالـ C++ ساعتها اختيارك هيروح لـ PLC معين زى Beckhoof أو Bachmann مثلا.

لو انا نسيت عنصر مقولتوش ياريت تقولو عليه فى التعليقات واتمنى أكون ضيفت ليكم أى شيئ بالمعلومات المتواضعه دى .
#علمً_يُنتفعُ_بهِ
كتب بواسطة م/ احمد صالح

تعليقات