القائمة الرئيسية

الصفحات

تجربتي مع رحلة الاقصر واسوان 2021 التابعة لوزارة الشباب والرياضة


تجربتي مع رحلة الاقصر و اسوان " الفوج السابع " 

كنت حابب اكتب تقييمي للرحلة و خاصة انها اول تجربة تجمعني بالنوع دا من الرحلات الجماعية و كان عندي تخوف من الطلوع لكن تشجيع صديق ليا هو اللي كان السبب في الخطوة دي . 

الساعة حالياً ٩ م و بدأت اكتب البوست من اسوان و كل ما افتكر معلومة او ملاحظة او نصيحة هاكتبها خلال الساعات القادمة في قطار العودة . 

البوست فيه تجربة كاملة و ايه الامور اللي لازم تعرفوها و ايه الامور اللي لازم تتجنبها و ازاي تكون اكبر افادة ليك في الرحلة 
لكن قبل ما ابدأ في السرد و الدوشة احب اشكر وزارة الشباب و الرياضة علي تنظيمها و انها عرفت ازاي تختار ناس بتعرف تتعامل مع " الشباب " بمختلف ثقافتهم و فئاتهم العمرية و اختص بالذكر مستر اسامة و احمد قدري و محمود و كل طاقم الاشراف . 

ايجابيات رحلة الاقصر واسوان التابعة لوزارة الشباب والرياضة

هابدا بالنقاط الإيجابية 

- الرحلة رخيصة جدا مقارنتاً بالتكلفة الطبيعية لها ، الانتقالات ، السكن محترم و " أمان " و ليه خصوصية و نظيف و فيه انتقالات داخلية محترمة ووجبات كويسة . 

- الراحة النفسية و الهدوء و جمال الطبيعة الخلابة و خاصةً باسوان و النوبة و عظمة حضارتنا و بداية البرنامج و خاصة في استقبالك بمعبد الكرنك بالصوت و الضوء ببداية الرحلة " هتتهز من جواك " . 

اما " النوبه " ⁦❤️⁩ مش هاقدر اكتب عنها لان عيونكم هي اللي تقدر تتكلم و تقيم و تعبر بالصمت عن سحرها و جمالها لما تزوروها .. فالصمت في حرم الجمال جمال 

- الجروب اللي كنت فيه بلا استثناء شباب واعي و مدرك و مثقف و زي العسل 😄 و دا دليل علي الاختيار الجيد للمشتركين . 

- قدرنا نلف معظم المعالم و الاثار و الاماكن في الاقصر و اسوان خلال فترة الستة ايام و دا شئ إيجابي لكنه سلبي من جانب اخر و هنقول ليه . 

- كان عندنا حرية التحرك خلال فترة التسوق " الجولة الحرة " اننا نروح اماكن خارج البرنامج المحدد و دا بالاعتماد علي خبرات السابقين او بسؤال اهل البلد أو الاستعانة باصدقاء من محافظتي الرحلة .. و طبعا بتكون فيه امكانية لو فيه حد عاوز يقابل صديق او صديقه له و أصدقائنا فاهمين قصدي 😅 .  

سلبيات رحلة الاقصر واسوان التابعة لوزارة الشباب والرياضة

تعالوا بقي للسلبيات و بدون زعل ⁦✋🏻⁩⁦☺️⁩

- الوقت ضيق جدا في الزيارات و دا لان البرنامج مكثف مثلاً مكان زي النوبة دا لوحدة أي انسان هيحتاج فيه يوم كامل . 

- الانتقال ما بين " الاقصر و اسوان " مرتين خلال ٧٢ ساعة ضيع من البرنامج ١٦ ساعات غير الارهاق البدني في الطريق و لو الامر بايدي يكون الاقصر يومان و اسوان ثلاثة ايام و النوبة يوم كامل . 

- الصحيان بدري الساعة ٧:٣٠ ؟! طبعا امر مش لطيف أن الواحد خارج يستمتع بإجازة و يصحي بدري كدا علشان ننفذ برنامج معين . 

- مكان الاقامة بالاقصر رغم مميزاته اللي ذكرناها الا انه بعيد عن منطقة وسط البلد بمسافة ٢٠ دقيقة و دي بيخليك تفقد متعة الاجازة بالتنزه . 

دي الايجابيات و السلبيات للرحلة بكل صراحة 

نصايح لرحلة الاقصر واسوان التابعة لوزارة الشباب والرياضة

تعالوا بقي للنصائح 

  1.  الاقصر بلد الاكسسوارات و الملابس و التحف و علشان تشتري من هناك استعين بحد ذو خبرة او تكون معاك صديقة او اختك لان لازم تفاصل و الشباب مش خبرة في الموضوع دا و الا " هتتغلب يعني هتتغلب " 
  2. اسوان الجميلة : بلد للعطور و العطارة و فيه اماكن كتير باسوان ما يعرفهاش غير اهل اسوان زي الروف و قعدة شيطان و رغم انها اول زيارة ليا لكن الاستعانه بصديقة من اهل اسوان قدرت انها تعرفني دا .
  3. عاوز تشتري زيوت او كريمات معينة كهداية او ليك " اشتري من جزيرة النباتات هتلاقي هناك انواع مش هتلاقيها غير هناك و اسعارها رخصية . 
  4. خلي معاك كاميرة جودتها عاليه .. و اعمل حسابك في هدوم كتير علشان الصور و خاصة انك هتروح اكتر من مكان خلال اسبوع واحد . 
  5. خلي بالك ان الاقصر و اسوان مكان حر في الشتاء و في الفجر و بالليل ساقعة .. اعمل حسابك في كاب و نظارة شمس و الا الشمس هتحمص وجهك زي حالاتي كدا 😄
  6. خلي معاك فلوس بزيادة و يفضل متكونش كاش لانك هتلاقي نفسك بتصرف بشكل مبالغ فيه و غير مخطط . 

خلاصة رحلات الاقصر واسوان 2021

اطلع و " جرب / جربي " الرحلة هتكون مفيدة و جيدة جدا و ربنا يرزقكم بمشرف زي اللي كان معانا و جروب شباب جميل و روحه حلوة جدا جدا كدا و طلعت منه باصدقاء كتير .
 
اخيراً شكراً ل وزارة الشباب و الرياضة  انها و رغم امكانيات و ظروف الدولة بتقدر تقوم بدورها و توفر للشباب متنفس بأسعار بسيطة و رحلات ترفيهية و تثقيفية رائعة . 

الساعة ١٢:٣٠ ووصلنا سوهاج و انتهي البوست 😅 بإعتذر علي الاطالة و اتمني اكون قدرت افيد حضراتكم من تجربتي و اجمع اللي قدرت افتكره من اسوان لسوهاج  .  

قد يهمك قراءة

تعليقات