1- استغل شبكة علاقاتك ونميها:
اكتر من 55% من فرص الشغل بتيجى عن طريق العلاقات والمعارف (ودى غير الواسطة), بمعنى انك تسأل الناس اللى تعرفهم وبيشتغلوا فى نفس المجال عن فرص الشغل اللى سمعوا انها متاحة قدامهم. عشان كده لازم تتعرف على ناس اكتر فى مجالك وتحاول تكون مفيد ليهم.
2- فصل ال CV بتاعتك:
كل وظيفة وليها متطلبات مختلفة عن التانية حتى لو فى نفس المجال، وعشان كده حاول توضح وتظهر اكتر المؤهلات اللى محتاجها كل وظيفة.
3- قدم على فرص كتير:
كل اعلان وظيفة بيتفتح بيقدم عليه متوسط الف شخص (حاول تكون من اول ١٠٠ CV) وفرص ان ال CV بتاعك يتفتح بتبقى اقل، وعشان كده لازم تقدم على فرص شغل كتير قبل ما تيأس ان مفيش شغل، فرص كتير يعنى (50-100) مثلا.
4- اشتغل على نفسك بأستمرار:
السوق فى ناس كتير فى نفس مجالك، بعضهم عنده خبرة او مؤهلات افضل منك وده بيصعب عليك المنافسة، وعشان كده لازم تطور نفسك بأستمرار.
#Keep_Learning
5- ساعد غيرك:
مش كل الناس ممكن تتفق على ده بس عن تجربة كل ما تساعد الناس فى نفس الهدف اللى بتسعى ليه، ابواب الفرص هتتفتحلك اكتر، بمعنى لو بتدور على شغل ساعد الناس اللى بتدور معاك، لو اتعلمت حاجة جديدة فى المجال علمها لزمايلك او للناس اللى لسة بتبتدى فى المجال، وهتلاقى فعلا رزقك بيضاعف، شخصيا معظم فرص الشغل اللى جاتلى فى حياتى كانت عن طريق ناس علمتهم حاجة او ساعدتهم بمعلومة زمان.
+ أمر مهم من وجهة نظري المتواضعة ومن خلال خبرتي المتواضعة في سوق العمل = اشتغل علشان تعطي مش علشان تاخد لكن ( بشروط ) => بمعنى انك متخليش الراتب او العائد عقبة في طريقك؛ اشتغل واعطي كل اللي تقدر عليه ف المؤسسة او الشركة اللي حضرتك فيها، مهما كان عائد ليك، لأن ف البداية العائد مش فلوس، العائد خبرات وعلاقات ودروس كتييرة يوميا بتتعلم منها، و دي الأمور اللي علشان هاتسامح في موضوع الفلوس ده، لو الأمور دي مش موجودة يبقى احنا كده ف المكان اللي مش مناسب لينا؛ بالتالي نبحث عن فرص أفضل وأكتر. = التعلُّم المستمر والتطوير والخبرات اللي حضرتك بتاخدهم في أي مؤسسة لو حضرتك لسه جديد في السوق ليهم ضريبة، قد تكون العائد المنخفض نسبيًا واللي ممكن حضرتك تكون معترض عليه؛ لكن صدقني عن تجربة لو المكان مناسب ماتشغلش بالك بالعائد ، وجيب اخرك ف الشغل و شوف بعد كده ربنا هايرضيك ازاي. إن الله يحب إذا عمل أحدكم عملًا أن يتقنه
اضافة بسيطه : اعمل تقييم حقيقي لمهاراتك ولنفسك في المجال بتاعك سواء كنت هتعمل ده لوحدك أو مع حد خبرة أعلي منك عشان يساعدك تقدم علي الوظيفة المناسبة ليك جدا وده هيزود فرصة ان السي في بتاعك يتشاف
واخر نقطه دي بتتكرر معايا كتير وانا علي يقين تام ان الخير بياخد لفه ويرجع لصاحبه حتي لو مش بنفس الصوره اللي قدمها، وخلى عندك يقين من جواك ان ديه كلها اسباب وان الامر بيد ربنا ومتعتمدش على الاسباب
أقرأ ايضا: