اولا : مسطره حرف (تي) وطولها 80 سم علشان الرسم الهندسي والوصفية طبعا وتفضل ان تكون بلاستيك مش خشب علشان الخشب سهل انها تتوسخ وتوسخ اللوحة كمان ، لكن البلاستيك ممكن جدا نمسحها بفوطة النظافة او كده يعني ، واللي ناوي ان شاء الله يدخل عمارة يبقي يشتري المسطرة ال120 سم بالمرة اما عن نوع المسطرة فامش تفرق ، يعني سمير وعلي زي روترنج بس اللي يقدر يشتري روترنج يكون احسن بس بلاش نكلف اهلنا حلاجات مالهاش لزمة يعني الاتنين بيأدوا الغرض في النهاية.
ثانيا : رولة تحفظ فيها لوح الرسم ،ويكون طولها مناسب ليك كاطالب في اعدادي هندسة كمان علي حسب طولك انت هههههه.
ثالثا : جراب بيجمع المسطرة ، والرولة علشان سهولة الحركة بيهم والحفاظ عليهم.
رابعا : مثلثين احدهما ثلاتيني ستيني ، والآخر خمسة واربعين بس لازم يكون طولهم مناسب لطلاب اعدادي هندسة مش من المثلثات الكبيرة اوي دي بتاعت عمارة او تخطيط علشان ناخد بالنا.
خامسا :مثلث ارسطو وده مهم جدا علشان يوفر وقت كبير في الرسم والوصفية خصوصا وفي الفهم (وهو ممكن يغني عن المسطرة والمثلثات) ، كمان هو غالي اااه بس
مهم جدا وياريت نحافظ عليه علشان مش كل يوم بقي نكسر واحد ونشتري غيره.
سادسا : برجل للرسم الهندسي والوصفية تمنه تقريبا 5 او 7 جنيه مش عارف ،بس المهم اننا بلاش فنجره ومانشتريش اطقم براجل روترنج والكلام من ده علشان مش ناحتاجها اصلا وحرام كمان الفلوس اللي بتدفع من غير لزمة دي يعني البرجل العادي اللي بيتباع ف الكلية كويس جدا ومناسب وياريت نخاف علي اهلنا شويه ونراعي ربنا في كل تعاملاتنا ف الكلية وخارجها كمان .
سابعا : بوردة(لوح خشب) للرسم الهندسي والوصفية ، علشان نرسم عليه وطبعا نجيب بردة اعدادي مش عمارة علشان ناخد بالنا واحنا بنشتريها مانجابش حاجة كبيرة ع الفاضي ومش نحتاجها، ولو عندك طربيزة هتكون تمام وكافية
ثامنا :مسطرة منحنيات (شبلونة كرفات) ودي ان شاء الله نحتاجها في الترم التاني ف الوصفية
تاسعا : قلم روترنج 0.5 مللي علشان الرسم والوصفية ، وكمان ممكن المذاكرة واللي مش يقدر علي النوع روترنج ممكن يجيب اي نوع تاني بس مش عارف حيعيش معاه وللا لأ ؟
عاشرا : اسنان للقلم نوعها اتش بي 0.5 مللي ، وكمان ممكن الدكتور يطلب اي نوع تاني ساعتها ممكن نجيبه كمان علي حسب تعليمات الدكتور في المحاضرة.
الحادي عشر : استيكة نظيفه او (استيكة قلم) اسمها كده لتنظيف اللوحة بعد انتهاء الرسم.
الثانية عشر : فوطة تنظيف صغيرة وشكلها ولونها زي الفوطة اللي بتبقي مع سائقي العربيات.
الثالثة عشر : لزق (سوليتيب)علشان نلزق بيه لوح الرسم والوصفية واحنا بنرسم.
واخيرا اسكتش رسم ، كل كلية بيكون فيها اسكتشات خاصه بيها
.
وبالتوفيق ان شاء الله للجميع وربنا ان شاء الله يكرمكم ف اعدادي ويكرمنا معاكم بكل مانتمني من خير ان شاء الله وياريت لو حد شايف اني نسيت حاجة ياريت يفكرنا بيها علشان الافادة تكون للجميع