القائمة الرئيسية

الصفحات

نصائح لطلاب اعدادي هندسة لاختيار التخصص الجامعي المناسب

|Tips for preparatory engineering students to choose the appropriate university maj


من 4 سنين دخلت إمتحان قدرات قسم عمارة علشان أساعد صاحبي لأني برسم كويس، ومكنتش عايز القسم.
النتيجة طلعت، ولقيت نفسي ناجح وهو سقط للأسف!

بعد ظهور تنسيق الأقسام كان جايلي "كيمياء. ميكانيكا سيارات. ميكانيكا إنتاج. قسم الميكاترونيات بمصاريف"
ومجموعي محصلش ال 3 أقسام اللي كنت مرتبهم "مدني. ميكانيكا باور. كهرباء".

لظروف ما مدخلتش الامتحانات لمدة 3 سنين متتالية، ولسه في السنة الأولى في قسم العمارة. بالنسبة لصاحبي السنة دي أخر سنة ليه. وما شاء الله هيتعيّن معيد!

الفكرة إني اقتنعت جداً جداً بأكتر قسم كنت رافضه وشايله من حساباتي ولقيت ميولي للفن والتصميم كبير جداً، وإن القسم من ناحية الابداع والشغل في نظري أفضل قسم.

صاحبي نفس الأمر اقتنع تماماً إنه ملوش في مجال العمارة وبطل يندب حظه وداس على نفسه. ما شاء الله من سنتين سافر للهند مع فريق من قسم "ميكاترونكس" في مسابقة روبوت عالمية وشرفونا وفازوا بالمركز الأول؛ وأي طالب في هندسة المنيا عارف التيم ده كويس.

اللي عايز أوصله من البوست في نقطة الحيرة في دخول القسم بعد السنة الاعدادية:
شوف ميولك رايحة لأي مجال وشوف نفسك موهوب في إيه؟ وحط ألف خط تحت "موهوب في إيه" بعيداً عن فرص الشغل للمجال نفسه.

إعرف عن المحتوى اللي القسم بيدرسه كويس جداً قبل ما تدخله. إعرف عن كيفية تدريس المحتوى وطبيعة الدراسة والشغل اللي هتقدمه جوه القسم.
شوف نفسك وانت شغال وبتدرس المحتوى الخاص بالقسم. شوف نفسك بعد التخرج وانت شغال في المجال ده.
اتخيل نفسك في كل الفترات الزمنية أثناء الدراسة وبعدها.

إرسم لنفسك خط سير بعد ما تقرر تدخل أي قسم وخد عهد على نفسك متحيدش عنه لأي سبب.
خلّي عندك ثقة في ربك، واتوكل عليه؛ ثم أمن بنفسك وبقدراتك؛ وسيبك من أي إحباط ممكن يجيلك من دكتور أو معيد أو طالب زيك أو أي شخص.
لازم تخلي عندك طموح شخصي وتتنفس الابداع وتؤمن بنفسك إن ربنا هيكرمك وتقدر تضيف جديد لمجالك.
إياك تكون نسخة من أي شخص مهما كنت مبهور بيه. إياك تعيش زي الألة مجرد تحفظ أو تسعى وراء تقديرات ومجموع أو إنك تتعين معيد.

متكتمش معلومة واعرف إن العلم رزق. كل معلومة ممكن تضيفها وتوهبها لزميلك أو لأي حد بنية خالصة لله صدقني ربنا هيزيدك ويزودك علم.
تجرد لربك تماماً في دراستك وتعبك ومتتعبش علشان يتشاور عليك أو تتفشخر بنفسك. صدقني هتلاقي طريقك سالك وهيكرمك من وسع لأن فضل الله عظيم جداً.
ومتنساش إنك لازم تتعب فهيأ نفسك للتعب. هيأ دماغك للوسع والاستزادة. يعني مرّن دماغك زي ما بتمرن عضلات جسمك في الجيم.
صدقني غير كدا هتكون مهندس نمطي هيعيش بدون ما يترك بصمة أو يضيف جديد.


تعليقات