#أول_يوم_هندسة
- و انت رايح تشتري الأدوات.. هاتلاقي طقم براجل شكله حلو بـ250 جنيه.. ده بقى ولا ليه أي 60 لازمه.. البرجل أبو 15 جنيه أحسن منه وكله بيقضي الغرض وشغال متمشيش ورا انه ماركة علشان لو ضاع منك هتزعل.
- ماتشتريش المسطرة الـ120 سم عشان ماتمشيش تتكعبل فيها.. هي الـ80 سم زي الفل و هاتقضي الغرض، كلنا بنشتري ال المسطرة ال80 وبتكون علشان مادة الرسم الهندسي يعني لو هتخصص كهربا او اتصالات مش هتحتاجها في حاجة وفيه الي ناوي يتخصص مدني او عمارة بيجيب ال80 وفيه بعد كام سنة من عمارة او مدني بيجيب ال120سم
- بالنسبة لطقم المثلثات.. مش شرط تجيب الروترينج ( هو يعتبر افضل نوع و اغلي نوع هو ونوع سمير ) ممكن تجيب الطقم ابو عشرة جنية وهيعيش معاك عادي - انا كنت جايب طقم مثلثات روترنج وانكسر مني في الشنطة من المواصلات ورجعت اشتريت العادي
- هاتلاقي مثلث لطيف كدة و كيوت اسمه مثلث أرسطو.. ده تشتريه وش بدون تفكير.. و هاتعرف فايدته بعدين ، (مثلث ارسطو ممكن ترسم بيه كل روسمات من غير الحاجة لمسطرة 80 او مثلثات او اي حاجة مساعدة وبينجز.
- ماتاخدش المسطرة الـT معاك أول يوم.. ولا أول أسبوع.. و لا تاخدها أصلاً غير لما يبقى عندك سكشن رسم.
- حاول تتماسك و ماتتصورش سيلفي بالمسطرة أول يوم (علشان الدفعات الكبيره فيه منهم بيتريق وانت اماتكبر هتحس ان الموضوع عادي 9.
- لما تبقى راكب ميكروباص فيه بنات من كلية تانية و معاك المسطرة.. هاتحس إن إنت توم كروز في نفسك.
- طبعاً ع الفيسبوك ماتحطش قبل اسمك Eng عشان مايطلعلكش عيل لزج يقولك هاي إنجي.. ممكن نتعرف.
- ماتزعلش لو حد من الدفعات القديمة اتريق عليك.. دي تشريفه بتتعمل لكل الطلبة المستجدين ، (وفيه منهم بيعمل نفسه روش ويتريق علي الدفعات الاصغر منه او ينزل بوستات عن اعدادي هندسة كبر دماغك ده فضي كل سنة).
- هاتلاقي واحدة ست في شئون الطلبة مكشرة على طول.. تعالى على نفسك و حاول تضرب معاها صحوبيه عشان هاتنفعك قدام ، ( هو افضلك في هندسة تمشي امورك سواء مع شئون طلبة او معيدين او دكاترة حتي لو مش طايقهم).
- لما حد يندهلك و يقولك يا بشمهندس.. ده مش معناه إنه بيحترمك.. هو غالباً مش عارف اسمك.
- ماتستغربش لما تلاقي طلبة أكبر منك في الكلية و سنهم معدي الـ28 سنة، (ده غالبا مش هندسة بس فيه الي بيكون كليات تانية ورجع عاد ثانوية او خد معهد وعدل مجموعه ولحق هندسة وفيه الي بيشيل مواد كل سنة وفيه الي بياجل اخر سنة علشان الجيش وفيه الي عنده مشاريع خاصة فبيطر ياجل اخر سنة.
- كافيتريا الكلية في هندسة ما هي إلا مكان للمذاكرة و نقل الشيتات فقط.. يعني مش مكان تقضي فيه وقت فراغك لأن مش هايكون عندك وقت فراغ أصلاً ، (ولو انت جامعة خاصة او اكاديمية او معهد خاص فاسعار الماكولات او المشروبات هتكون ضعف ما هي موجودة بره علشان تعمل حسابك).
- حاول تحل الشيتات بنفسك.. و عشان هاتحاول و مش هاتقدر.. يبقى حاول تصاحب الناس اللي بتحل شيتات ، علي قدر ما تقدر حل الشيتات بنفسك علشان بيجي منها الميدترم والفاينل والكويزات يعني الشيت الي مش هتحله بنفسك هتلاقي مسائله قدامك في الامتحان ومش هتعرف تحل).
- إسأل على المكتبة اللي بينزل فيها الورق بتاع المعيدين و حل الشيتات.
- ماتفونسش لوح.. و ماتحاولش تعرف يعني إيه فونسة (فونسة يعني تجيب لوح زجاج وتضع فوقه اللوحة المرسومة ثم ورقة شفافه ثم اللوح الي عاوز تعملها يعني هتشف الرسمه علشان تنجز في الوقت بس ده هيضرك في الفاينل ومش هتكون سريع في الرسم ، وعادي لو اللوحة خدت منك 3 او 4 ساعات .
- هاتلاقي معاك في الدفعة شله كدة فاهمين الدنيا و عارفين الدكاترة و المعيدين.. لو سألت حد منهم انت في سنة كام هايقولك في تانية إعدادي.. يعني مدبلر (الناس دي فيه الي هتستفاد منه جدا وهيفيدك وفيه لو اخلاقه مش كويسه ابعد عنه )
- مدبلر بقى يعني عايد السنة.. ربنا يكفيك الشر.( وطلبة كتتير فيهم كانوا متفوقين جدا وفيه الي مر بمشاكل وفيه الي مش عارف نظام الكلية او شال 3 مواد وفيه الي اتعمله محضر غش وفيه الي عمل مشكلة مع معيد او دكتور وفيه الي اصيب باكتئاب من الدراسة فيه مرحلة فشل بيمر بيها اي حد في حياته وهما مروا بيها في الكلية ودي سنة الحياة )
- هاتلاقي مبنى قديم شويه في الكلية واقف قدامه شباب بيشربوا سجاير طول الوقت.. شكلهم يخوف.. ماتروحش عندهم عشان ممكن يتحرشوا بيك.. دول طلبة #ميكانيكا.
- هاتلاقي شويه شباب حلوين لابسين شيك و ريحيتهم حلوة.. بس برضه ماتروحش عندهم.. دول بقى طلبة #عمارة.
- أما بقى الشلة اللي قاعدين على السلالم بينقلوا شيتات.. دول طلبة # هندسة مدني.
- طلبة # هندسة كهرباء هتلاقيهم شعرهم طويل و دقنهم طويله و الدنيا جايه عليهم.. حاول تتعاطف معاهم لأن اللي بيشوفوه في القسم مش شويه.
- #ميكاترونيكس ده بقى قسم مش مفهوم.. ولا هو محصل ميكانيكا ولا كهرباء.
- لو انت بقى ليك في جو الشقاوة و داخل الكلية عشان تقضيها.. يبقى من أولها كدة أنصحك تحول تجارة.. لأن ده شبه مستحيل في الكلية بتاعتنا دي.
- بلاش تعاكس بنات عمارة ، او اي بنت علشان احنا كلنا بنكون اخوات من الي بتعمله الكليه فينا وانت اصلا طالما دخلت هندسة فالبنات او نظرتك وتعاملك معا البنات عبارة عن شوية مشاريع وشييتات وكلنا زمايل.
- لازم تشوفلك عربية فول كويسة تفطر عليها عشان تسد معاك اليوم كله (ههههه علشان اكل الكلية غالي واحنا كمهندسين ابسط طبقات المجتمع وميفرقش عندنا البرستييج.
- خليك عارف إن المحاضرة اللي مش هتحضرها هي المحاضرة الوحيدة اللي الدكتورهياخد فيها الغياب (اه والله بتطلع صدف غريبه او ان المحاضرة دي يجي فيها حاجات في الامتحان ومتعرفش تحلها.
- لازم تبقى عارف إن كلية هندسة فحت و ردم.. يعني من أول يوم لازم تذاكر وسيبك من الي عامل نفسه مبيزكرش والدنيا سهلة وانه بيزاكر يوم الامتحان علشان فيه طلبة كده مبتحبش الخير لغيرها وفاكرين كله زيهم وممكن يتكلم عن طلبة زمايلة باسلوب مش كويس ويكره غيره في الشخص ده ويرجع يصاحبه في الخباسة علشان لو محتاج منه حاجة .
- ماتستغربش لما تلاقي الدكتور في أول محاضرة بيقولك إننا متأخرين في المنهج و مش بعيد يحدد إمتحان الميدتيرم كمان.
- زاكر اول باول عشان الدكاترة هتغفلك زي مانتا اتغفلت ف الملاحظة 29 كدا
- ميدتيرم يعني إمتحان بيتعمل في نص كل ترم.. حاجة كدة عشان تخليك تذاكر.. و غالباً مش هاتذاكر و هاتقول المقوله الشهيرة "هنعوض في الفاينال" ولو جيت في الفاينل واكتئبت وحسيت الدنيا صعبه اعرف انك هتشيل المادة اما لو زاكرت لاخر دقيقه بالرغم انك مكنتش مزاكر قبل كده هتنجح في المادة وده كله توفيق من عند ربنا
- كويز برضه يعني إمتحان على فكرة ، (بس درجته بتكون نص الميدترم او اقل منه).
- غالباً الميدتيرم بيكون بعد 6 أسابيع من بداية الدراسة.
- أغلب المواد في الكلية دراستها بالإنجليزي.. و لو انت كنت مدارس عربي هاتلاقي شوية صعوبة في الأول و بعدين هاتتعود.
- أي طالب بيدخل هندسة في أول سنتين بيتبهدل شوية و بعد كدة بيتعود ع البهدله.
- لو شيلت مادة بلاش تاخدها على صدرك في الأول هاتحس إن كرامتك وجعاك و بعدين هاتتعود.
- الفلوس اللي هاتصرفها على اللوحات و تصوير الورق في الكلية ممكن تشتري بيها عربية، و أغلب الورق اللي هاتصوره مش هاتفتحه أصلاً.
- مافيش راجل بيعيط.
- مادة الرسم الهندسي و مادة الوصفية.. لو فهمتهم هاتبقى مهندس شاطر.
- لو داخل كلية هندسة في مكان بعيد علشان التوزيع الجغرافي زاكر علي قد ما تقدر حتي وانت تعبان وانت مش طايق الدراسة علشان تحول وتكون في هندسة اقرب ليك علشان الغربة كلها مصاريف وبهدلة
- متغشش ابدا في اي امتحان لانك بالغش هتبني حياتك على الحرام - ممكن تجيب تقدير مثلا او تتاخد في مكان محترم بسبب حد غشيت منو و و جبت اعلى منو و حتى لو مجبتش اعلى منو فانت بنيت جزء من حياتك على الحرام - من الاخر عيش بمجهودك و مذاكرتك و ربنا هيعوضك من وسع كبيييييييييييير
- امبسط بكل لحظه فى الكليه لانها من اجمل ايام حياتك عمرك ما هتعرف تعوض الايام دى ومش هتحس بكدا غير بعد متتخرج عموما الدنيا كلها تعب ولازم تعمل الي عليك بس لو بتمر بمرحلة صعبة حزنك عمره ما هينفع حاول تتكيف علي كده وتكون مبسوط واضحك
- هندسة هتغير حياتك وطريقة تفكيرك لحد اخر يوم فى عمرك احترم دماغك واحمد ربنا على نعمة التفكير واستخدم نعمة العقل والتفكير فى الخير دايما
- المهندسين اكثر ناس متواضعه وخصوصا مهندسين كهربا ودي هتحس بيها قدام
- من دلوقتي حاول تشوف كورس تفاضل و استاتيكا او icdl علي اليوتيوب هيفيدوك جدا
لو كليتك بعيد شوف هتسكن ولا مواصلات ولو مشوارك كل يوم ساعه ونصرايح وساعه ونص جاي البيت هيكون افضل من السكن علشان انت لسه مخدتش علي نظام السكن ولو هتسكن اسكن مع ناس محترمه
هتعرف قيمة كلمة مهندس لما تتخرج