القائمة الرئيسية

الصفحات

شكاوي المواطنين من انقطاع النت المتكرر وتجربتي السيئة مع شركة وي للتليفون الارضي والانترنت وانعدام الخدمة بسنترال عرب الرمل وقويسنا

مشكلة وحلت علي مصر ولا عمرها هتتحل طول ما الخدمه بالشكل ده والاعلانات اهم حاجه وتوفير خدمه للعميل من رابع المستحيلات.

شكاوي المواطنين من انقطاع النت المتكرر وتجربتي السيئة مع شركة وي للتليفون الارضي والانترنت وانعدام الخدمة بسنترال عرب الرمل وقويسنا

وقت كتابة المقال حرارة التليفون قاطعه والنت قاطع ودي ثاني مره الشهر ده غير قلة السرعه وتغيرها المستمر، للاسف تعبنا من مكالمة خدمة العملاء او الذهاب للسنترال ومشاكل وتقطيع في الخدمة طول الوقت ، مفيش شهر بيعدي الا اما النت يقطع مره او اتنين وممكن كمان الحرارة تقطع من لعب الفني في الكابينه.

مشكلة قلة السرعه وانعدام النت بليل


1. كل مستخدمين نت وي (تي داتا سابقا)  بيشتكوا من قلة السرعه بليل وانها مش ثابته يعني الي متعاقد علي سرعه 15 او 5 احيانا بليل بتكون السرعه 1 ميجا او اقل، انا اشتكيت اكثر من مرة من قلة السرعه بتتحل بعد اما اكلم خدمه العملاء احيانا بعد ميقولي هعمل محاوله من عندي والاقي السرعه زادت تاني واحيانا او يقلي اغير الIP في الراوتر ولو مش عارفين يفضلوا يحولوني لبعد والمكالمه توصل لنصف ساعه واقفل الخط وانا ذهقان.

مشكلة اجبار العملاء علي شراء باقة اضافية بعد انتهاء السرعه وعدم وجود سرعه 1م المتفق عليها

2. المشكلة التانيه تكمن لما السرعه تنتهي المفروض العقد بيقول والشركة بتقول ان سرعه 5 يتم تخفيضها ل 1 ميجا وللاسف مفيش حد في مصر اما الباقه تنتهي السرعه بتنزل ل 1 ميجا ، هي اصل مبتكملش نصف ميجا وموبيل واحد متعرفش تفتح من عليه وتكلم خدمة العملاء ، شويه يقولوا ما هي سرعه 1 ميجا كده وشويه يقولو لو عاوز يفندم نعطيك باقه اضافيه كذا بمبلغ كذا ، وكل الهدف اصلا انهم يخلوك تشتري باقات اضافيه ، سرعه 1 غير محدود بتاع زمان كنت متعاقد عليها وارخص وبتفتح وسريعه مش فاهم ازاي اتعاقد علي سرعه 5 لشقتي التانيه والنت بالبطئ ده وكنت اتعاقدت في سنترال بنها وما استلمتش عقد تركيب روتر ولا الموظف ردي يديني عقد خدمة.

مشكلة تأخر وصول الحرارة لشهر بعد التعاقد والمستوي المتدني للخدمة بسنترال عرب الرمل


3. المشكلة الثالثة بتكون في التعاقد اصلا وبتختلف من مكان لمكان ، في مدينة الشروق من 5 سنين كنت اتعاقدت علي تليفون وكان وقتها فيه اهمال وتسيب وفنيين حرامية فقعد تركيب التليفون شهر ، من سنتين سكنت في شقه في المتميز مدينة الشروق قدمت طلب الصبح والفني جيه ركبلي التليفون في نفس اليوم ولو فيه مشكله يوم وتتحل ، اما سنترال مدينة قويسنا بالمنوفيه فلا اجده محصل محل تليفونات مفيش معامله ولا تنظيم ولا خدمة واستهتار وتقعد بالشهرين والمشكله متتحلش والكارثه الاكبر ان كل حاجه ماشيه كوسه وانت عارف حد من السنترال يسرع تركيب التليفون ليك ، وسنترال قويسنا ليه سنترالات في القري منهم سنترال عرب الرمل الحاجه الوحيده المخصصه له ندفع فاتورة التليفون ولو فيه عطل او تركيب الي شغالين يقولوا اطلع علي سنترال قويسنا ، كنت مقدم علي تليفون في سنترال عرب الرمل فكنت مسافر وجيت بعد 3 اسابيع وبرضو مفيش خدمة روحت السنترال اشتكي ليه كل الوقت ده والعماره عليها بوكس وجنب كبينه كمان والمطلوب منهم فقط يشوفوا شغلهم فواحد جاهل هناك يقول يعني انته يلي بقالك كام اسبوع مقدم ومش عاجبك والناس بقالها شهور لسه مركبلهاش استني دورك ، وقعد يتكلم مع الموظف التاني وعمل نفسه مش شايفني وكان من الزوق والاحترام انه يعاملني باسلوب افضل من كده، بعدها ب4 شهور بعد ما التليفون والنت اشتغلوا كان فيه تركيب سلوك تليفون جديده وتغير الاسلاك القديمة للكبائن واعمال حفر استمرت لاسبوعين ولكن خربوا كل خطوت التليفون في البلد في الكبائن روحت اشتكي بالعطل وانقطاع الحرارة في جوده الي شغال في الصيانه قال الرقم ايه وفين وباسم مين بعد ما كتبتهم لهم واحد معاه بيقوله خليه يروح يبلغ بالعطل في قويسنا احنا ملناش دعوة وهو نفس الشخص القديم ومتعودين ميصلحوش العطل الا ب50 ج بالرغم انه دورهم. روحت سنترال قويسنا عملت شكوي في سنترال عرب الرمل وانقطاع الخدمة قعدت كمان ل ازيد من اسبوعين وكل شويه اتصل بخدمه العملاء واروح لمدير السنترال وللاسف مبيقابلش حد وبتوع التركيبات هما الي بيسجلوا الاعطال زي عبدالله ، لاقيت حد من خدمة العملاء بيكلمني ان المشكلة اتحلت والشكوي اترفعت تلقائي وهي اصلا متحلتش ، ويوم علي يوم بخسر فلوس والشغل بتاعي بيضيع عليا ، روحت تاني اشتكيت في سنترال قويسنا وممشيت الا اما عملت شكوي في خدمة العملاء والتركيبات وكنت زهقان من المستوي المتدني من الخدمة في قويسنا بعدها بيقوم الفني جه وصلح التليفون ومنتظر اعطيه حق الاصلاح ولكن ابقي انا كده ظالم اما اعطي حد فلوس علي شغله الي المفروض يعمله ، بعدها بيومين جالي فني تاني علشان يصلح العطل فقلتله انه اتصلح فبيقول اني عملت شكوي انهارده بتليفون كذا محمول وهو اصلا مش تليفوني الي متسجل عندهم  ، وبعمل مكالمة لاقيت حد دخل في المكالمة وبيقول الو يا فاروق الحرارة وصلتلك طلع ان الافنديه مبدلين الخط بتاعي في الكابينه وشخص تاني بيعمل شكوي ان تليفونه مش شغال وتليفوني هو الي بيتسجل بيه الشكوي وشغل اخر عك

مر حاليا نصف يوم والنت والتليفون ما زال لا يعمل وحرار التليفون بتيجي دقيقه وبعدين تروح ساعتين ثلاثه وباين كده حرارة التليفون مش هتيجي انهاردة


مر يوم 1 يوليو 2019 وحرارة التليفون لم تعمل حتي الان ، ذهبت لسنترال عرب الرمل اليوم لتسجيل عطل بانقطاع الحرارة والموظفه بتقول انا هسجل رقمك بس ما اعرفش الحرارة هتيجي امتي بقولها هي مش 48 ساعه دي اقصي حاجه تقولي لو مستعجل اتصل بخدمه العملاء علي 111 ، عملت مكالمه والرصيد خلص من قبل ما ابلغ بالعطل ، وبعدين سجلت العطل علي خدمه الشات الاونلاين علي موقع المصريه للاتصالات وقال هنتابع مع حضرتك في ظرف 48 ساعه والمشكلة تتحل اتمني انها تتحل متقعدش شهر زي كل مرة


دي كانت تجربتي باختصار مع شركة وي (المصرية للاتصالات)  باهم 3 شكاوي واجهتها بعد ما ركبت تليفون في بلدي ودي كانت تجربتي الثالثة اني اركب تليفون وفي كل مرة كان فيه شكاوي وانعدام خبره ومواقف عمرها ما هتتنسي حتي اني اتكلمت عنها في مقالات قبل كده وخصوصا مشكلتي مع شركة اتصالات مصر وتجربتي السيئة جدا سواء في النت مرتين او سرقه الرصيد بدون وجه حق باستمرار


بالنسبه لسنترال عرب الرمل



تلغوا سنترال عرب الرمل خالص ملهوش اي لازمه نروح نسجل عطل الموظفين يقولوا اتصل بخدمه العملاء نقدم علي خط نقعد بالشهر والموظف يقول انت مش عاجبك دا فيه ناس مقدمه بقالها شهور
ومفيش اي معامله  ولا احترام
وارجوا المشاكل تتحل بسرعه اول باول مش اقعد شهر لغيه ما خطي الحرارة توصله


ليه مفيش اتجاه للانترنت الهوائي ونلغي خالص النت علي التليفون الارضي خصوصا ان الامكانيات تساعدنا في كده ليه الانترنت الهوائي ميكنش متوافر لكل المواطنين واشتراكه يكون معقول عن موضوع ال 1000 ج ده يعني 10 اضعاف ما الواحد متعود يدفعه والتليفون الارضي يعتبر مبقاش له اي لازمه هو والنت ونتلاشي مشاكل التركيبات والبنيه التحتيه كلها موضوع النت اتحت علي حرارة التليفون علشان ميتلغيش التليفون الارضي وتفضل الشركة شغاله وكان متاح يخلوه هوائي

تعليقات