اصابتي بتمزق و التهاب الفقرات القطنية وتدهور صحتي الجسدية والنفسية

معرفتش اني كنت في نعمة ربنا اعطاها لي الا اما حسيت بوجع شديد في ظهري وبدا الموضوع يسببلي اكتئاب ، للاسف ما بنحسش بقيمة النعم الي بنستمتع بيها الا اما نفقد حاجة منها الحمد لله.

بدات معايا اصابة فقرات ظهري من شهر ونصف ، كنت وقتها بشيل حجات ثقيلة جدا ومفيش حد معايا ، فاضطريت اني اشيلها لوحدي بصعوبة وامشي شايلها مسافة ومستحمل بالعافية وظهري حسيت بترقعة ووجع فيه والم شديد واستحملت الاصابة وقلت لنفسي بكره هتروح.

يوميها معرفتش انام وطول الليل في ارق ومعرفتش انام كويس ، وصحيت تاني يوم وكنت مسافر مصر رايح مشوار في العتبة ، وطول وانا قاعد في الميكروباص في الم في ظهري ومش عارف اقعد في الميكروباص.

فيه الي نصحني ان الموضوع ممكن بسبب وزني الزائد وهو الي عامل ضغط علي فقرات الظهر، وفيه الي قالي اني لو رحت الجيم وخسيت وعملت تمارين، فعضلات ظهري هتقوي ومش هحس بوجع

اول يوم لعبت سوبر علي كل الاجهزة بوزن خفيف، مع اتنين من اصدقائي وكل ما اقول لحد فيه اني تعبان ومش قادر، فيضحك ويسخر مني ، حتي الي كان بيدربني قلتله ان ظهري بيوجعني وفيه الم في كل جسمي ، فقال ان ده طبيعي بسبب ان ده اول يوم في الجيم وان عضلات الجسم مش متعودة علي التمارين دي ، واول اسبوع هحس بتعب.

تاني يوم في الجيم لعبت التمارين بطلوع الروح علشان مفيش حد يقول ان مش قادر اشيل بالرغم اني جاي علي صحتي، وفي اخر تمرينة كنت بلعب تمرينة البطن ومش قادر العبها بسبب وجع ظهري وعديت فقط 6 عدات بطن ووشي جاب الوان الطيف وظهري ترقع ومقدرتش اقوم ، صحابي ضحكوا اني مش عارف العب بطن ، ومقدروش اني تعبان فعليا.الكابتن وقتها خلاني اجلس علي بطني وعملي زي مساج لظهري يفك العظمة  وروحت ونمت بردوا بالعافية وقلت ان الالم ده من التمرين وانه طبيعي زي ما الكابتن قلي.
اقرأ ايضا 6 نصائح طبية غريبة للعناية بالصحة - نصائح عن الصحة العامة ارشادات صحية

معلومات عن التهاب الفقرات القطنية

تاني يوم صحيت حسيت باني مش عارف اقوم من علي السرير وجسمي فيه تشنج رهيب بسبب ظهري ، وقتها ما كنش حد فاضي في البيت وبرضو مش عارف مين من صحابي الي هيكون صاحي 9 الصبح او فاضي وبدل الاحراج مع حد و بدل ما اروح الكلية خدت نفسي بالعافية لوحدي وطلعت علي مستشفي قويسنا المركزي والدكتور كتبلي علي حقن وبرشام ومسكنات وراحة لمدة 3 ايام علي الاقل ، مقتنعتش برضو بكلام الدكتور فرحت مستشفي شبين العسكري وكان معايا البطاقة العلاجية لاولاد الضباط ،ونفس الوضع الدكتور قلي فيه التهاب في الفقرات القطنية  طلب مني الراحة  قلتله اني مسافر بكره مصر ورايا كلية وورايا امتحانات ،قلي اكثر من مرة خد راحة واعمل عذر غيابي ولما شرحتله انه مش هينفع اغيب قلي ، يبقي امرك لله ويكون في عونك وتعرف تسافر بالوضع ده.

وانا مروح وبتالم ومش عارف انزل من الميكروباص او اقعد جبت الحقن والادوية وخدت الحقنة في الصيدلية بالمرة بعد ما اتصلت بممرض صاحبي انه يعطيني الحقنة وطلع في مستشفي بنها ومشغول ، استمر وضعي في غرفتي الخاصة لكام يوم بخرج فقط اذهب للصيدلية اخذ الحقنة واروح ، وقتها زعلت انه مفيش حد سال عليا في الفترة الي اختفيت فيها ، و تأقلمت على الوضع.

بعد ما اتحسنت شوية روحت الجيم حسيت بالملل في البيت ولعبت التمرين خفيف علشان مأذيش نفسي وظهري يشد ويوجعني تاني وكانت تمرينة البطن والظهر وتمرينة القطنية خصوصا من اصعب التمرينات وكنت بلعب تمرينة الرجل وشايل البار فاضي من غير اوزان ، وكان فيه تريقة من الي بيدرب او الي واقفين اني مش عارف العب التمرينة ، فقلت لهم الصعوبة مش في الوزن ، الصعوبة عندي اني اوطي.

اقرأ ايضا نصائح صحية وطبية للعناية بالبشرة الدهنية والجافة للبنات ونصائح لحياة صحية

اسباب تضاعف مرضى بالتهاب الفقرات وزيادة الامر سوءا

في اول اسبوع، اصابتي بدأت تقل مع اخذ الادوية والحقن والراحة  وبدات اتعافي قليلا حتي جاءت الايام بما لا اشتهية ، كان فية عمال محارة شغالين عندنا بيشطبوا شقة وبناء منزل اخر وفيه شغل ، واي حاجة لازم انا الي اخلصها للعمال ، في الفترة دي وبعد الميدترم وانا غائب عن الكلية بسبب مرضي ، اضطريت اني اقف مع العمال واصابتي بدات ترجع تاني بسبب اني كل شوية اشيل اوزان ثقيلة والظروف بتجبر الواحد انه يشيل ويجي علي نفسه ، واضطريت اني اشيل شكارتين اسمنت وانا مصاب واطلع بيهم الدور الرابع كل منهم علي كتف ، ولكن الامر ازداد سوءا، مكنتش عارف اوطي ظهري واشتغل او اصلي بسبب وجع اسفل الظهر الرهيب الذي اعاني منه ولا يقدر اي من حولي ان ظهري فيه مشاكل واني مريض ، ورد البعض بتريقة عندما اقول مش قادر اشيل دي ، فين ايام الشباب هما الشباب اليومين دول صحتهم فين

اقرأ ايضا افضل حبوب فيتامينات للمرضع ينصح بها أشهر الأطباء فيتامينات بريجناكير حبوب فيتامين د حبوب أوميجا 3

علاج الفقرات القطنية اسفر الظهر معي

انا يعتبر بدات اتحسن بعد ما عملت الحجات دي 

1. اخذت الادوية الي وصفها الطبيب والمسكنات والحقن في مواعيدها 
2. عملت شوية رياضة علشان اقوي عضلات ظهري بس باوزان خفيفة من غير ارهاق شديد
3. انا كان وزني زايد عن المعدل الطبيعي ، فخلال شهر اصابتي بدات اعمل رجيم واروح الجيم وخسيت 9 كيلو وحسيت اني جسمي بقي مرن شوية
4. التزمت بالراحة يعتبر مش كتير بس الراحة الي الدكتور طلبها مني كان ليها دور كبير

اقرأ ايضا حقيقة موقع ربحاك

أعراض التهاب الفقرات القطنية التي مررت بها

1. اكبر الم شعرت بيه هو الالام في اسفل الظهر
2. مكنتش عارف انام بسبب وجع ظهري 
3. مش عراف اجلس واقوم مرة واحدة او العكس
4. مش عارف اوطي او اصلي او حتي لو حاجة علي الارض مش عارف اوطي اجبها
5. حاسس بخمول رهيب

تعديل المقال