 |
| فودافون فرع قويسنا من الخارج وداخل الفرع مزدحم |
لوهلة ظننت ان شركة فودافون مصر افضل من غيرها من شركات الاتصالات ، بس الي اتاكدت منه ان احنا في مصر بيتنصب علينا بشياكة وبخطة مدروسة مفيش حد في مصر راضي عن الخدمات الي بتقدمها اي شركة ، سبب ذلك سياستهم المتبعة 'الجودة لمن يدفع اكثر' ، وانهم بيتعاملوا مع العملاء على مجرد هم ارقام وبيانات مش بشر.
انا اتعاملت مع شركة فودافون فرع قويسنا 3 مرات ، مرة كانت جيدة وحققت الي كنت عاوز اعمله والمرة التانية كانت سيئة برغم اني اتبعتلى رسالة من الشركة بتطلب مني تقييم الفرع فقيمتهم علي ان الفرع ممتاز وقلت لنفسي تلاقي الموظف مش قصده السخرية مني ،بس تعاملي معاه في المره الثالثة اكدلي ده فعلا واني كنت غلطان اما بررت للموظف وفعلا احنا بنعاني جدا.
عيوب لاقتها في فرع قويسنا لشركة فودافون
1- فرع قويسنا لشركة فودافون مساحته صغيرة جدا لا تزيد عن 4م * 4م وزحمة طول الوقت ومفيش مكان مخصص للجلوس وبيكون جوه الفرع (اشبه بالمحل او الغرفة) ازيد من 20 شخص كلهم واقفين
2- مفيش تنظيم في الخدمات يعني الي بياخد رقم لدفع النت زي الي واخد رقم لفودافون كاش زي الي بيدفع اشتراك زي الي بيطلع خط جديد اول ما تخش الفرع بتاخد ورقه بدورك حتي لو فيه قبلك 40 رقم وكلهم خدمات اخري وانت الوحيد الي هتودع فلوس في فودافون كاش لازم تستني كل الي قبلك يخلصوا وتلاقي عميل لسه جاي يسأل علي العروض والخدمات ويخليه يسأل بالنص ساعة ويأخر كل الي وراه بالرغم ان كل حاجه متاحه اونلاين وفيه برشورات بالخدمات.
3- مش دي الخدمة الي متعود عليها من فودافون وفيه تقصيير من الشركة في حق الفرع ازاي يكون الفرع عليه اقبال دائم بالحجم ده ويكون حجم الفرع صغير للدرجة دي ، انا كنت بتعامل مع فرع الشروق وبنها وحجمهم اكبر بالرغم ان فرع الشروق مفيهوش عدد كبير زي ما موجود في فرع قويسنا وعدد الموظفين كانوا اكتر من 3 موظفين ، مش فرع قويسنا الي مفيهوش الا 3 موظفين لخدمة العملاء.
4- تعامل الموظفين مع العملاء مش مناسب ، يعني هما لسه شباب والمعاملة احيانا بتكون فيها هزار بكبر شوية او ان الشخص العميل جاهل ومش عارف برغم ان فيه ناس مستواهم العلمي والمادي اعلي من مدرائهم ، والتعامل احيانا بيكون علي حسب انت لابس ايه.
تفاصيل التجربة السيئة الاولي مع فرع فودافون
كان يوم 22 نوفمبر 2018 ورايح اودع 200 جنيه في محفظة فودافون كاش علشان ارسلهم لزميل وكنت قبل ما ادخل الفرع في بنك اسكندرية بستلم حوالة من ايرلندا ، دخلت سحبت رقم (فودافون كاش وكله زي بعضه ) وانتظرت اكتر من نصف ساعه واقف وفي زحمه كتيير خرجت وقفت بره شويه وبعدين دخلت تاني لغية ما جه دوري ، في هذه الاحيان الموبيل خلص شحن وفصل بس انا الحمد لله معايا عقد خدمه فودافون كاش ومسجل فيه رقم الموبيل والرقم القومي وقلتله حولي 200 جنيه اداني ورقه امضي عليها باني اودعت 200 جنيه في فودافون كاش فقلتله لو سمحت عاوز نسخه منها (اولا علشان موبيلي مقفول ولو متبعطش حاجه اروح الفرع واقله اني حولت ومجليش فلوس ووقتها يكون معايا ورقه التحويل -
ثانيا مينفعش امضي علي ورقه من غير ما اخد منها نسخة والمفروض الشركات تتعامل علي هذا المبدأ يعني اي شركة بتضمن حقوقها قبل ما بتقدم الخدمه ودي اول مره يخليني فرع من شركة فودافون امضي علي ورقه تحويل اموال) ومش شايف عذر يخلي الموظف ياخد كلمتي بضحك او سخرية ويقولي علشان انت ضمنت حقك انا كمان هضمن حقي وهاخد نسخة من البطاقة اعطيتوا البطاقة ياخد نسخة منها ،
وانا مش لاقي سبب انه ياخد الموضوع بضحك وفي نفس اليوم حولت لنفسي من المحفظة 15 جنيه رصيد وللاسف جتلي الرسالة انه تم الشحن بالرصيد المقدر واما جيت اعمل مكالمة يقولي مش معاك رصيد بالرغم ان الخط باستخدمه فقط في التحويل وكمان مفيش حاجه في التطبيق توضح ان فيه رصيد او الفلوس راحت فين وكمان جتلي رسالة بحسابي في محفظة فودافون كاش بعد التحويل ، واما كلمت الشركة علي الفيس بوك فيه تجاهل وكل اما ابعت تفاصيل بالمشكلة بالصور والرسائل ورقم التليفون يقولي علي الفيس ارسل تفاصيل كاملة حسسني اني بكلم بوت مش انسان او موظف ومفيش اي رد من الشركة
تفاصيل التجربة السيئة الثانية مع فرع فودافون
كان يوم 25 نوفمبر 2018 وهحول هذه المرة 150 جنيه لمحفظة فودافون كاش الخاصة بي ، ذهبت الفرع واخدت رقم وكان 151 والدور حاليا اول ما دخلت كان 134 استنيت واقف داخل الفرع وبعدين خرجت وقفت بره شويه من الزحمة وانا مش هخليني منتظر واقف من غير كراسي طول الوقت هو احنا مش بشد وبني ادمين ، دخلتتاني الفرع لاقيته في الرقم 155 يعني انا الدور عدا عليه 3 ارقام فقط ونفس الموظف الي قابلته المره الي فاتت يقولي خد رقم تاني يعني هتتساوي بالناس الي واقفه دي بالرغم اني كنت واقف وخرجت من الخنقه ورجعت ومعداش الا 3 ارقام ،
مسحبتش ورقه ثانيه ورحت للموظف الي جنبه وكان الدور واقف عند رقم 157 وقلت له عاوز اودع 150 جنيه في محفظة فودافون كاش علي رقم التليفون ده وفاتح التطبيق بتاع" انا فودافون " يقولي هوا انت عامل فودافون كاش ، قلتله اه وناولته 150 جنيه البطاقه علشان يتاكد ، وبعدين قلي انا خلاص حولتلك معملش زي موظف المره الي فاتت الي يقولي امضي هنا وشويه صورة بطاقة وشويه يقولي دورك فات.
المفروض الشركة موظفنها يكونوا عندهم احترام شوية وازاي يتعاملوا مع الجمهور ، والشركة تهتم بالخدمات مش التسويق وخلاص والعميل دايما علي حق مش مجرد شخص هيمشي ويجي غيره ، وفرع قويسنا يتعامل مع الجمهور بطريقة حضارية زي ما انا متعود عليها في فرع فودافون مدينة الشروق وفرع فودافون مدينتي ، الناس قليلة في فرع الشروق والمساحة كبيرة والفرع فيه شغل جامد ومفيش مقارنه مع فرع قويسنا الي مهمول ومساحته صغيره والموظفين مش كما يجب بيحاولوا يظهروا انهم محترمين ولكن كل شوية يتسببوا في غضب احد العملاء كما حصل معي وقررت اني اتعامل مع فرع الشروق زي ما انا وغيري كنا متعودين ، الفرع في مكانه ميزه للشركة والتارجت الي بيحققوا ماديا افضل من فروع كتيير مصروف عليها ،
ارجوا ان الشركة تغيير سياستها مع فرع مدينة قويسنا ويكون التعامل اكثر من راقي ، الناس مش جاهلة زي ما الشركة وأخذه عن المنطقه كل الي ماسكين مناصب كبيرة من المدينه وفيه عدد كبير من أهلها مسافر دول اوروبا وامريكا ودول كتير والحياة أشبه بالرفاهية. احنا في 2018 ولسه فيه شركة مش عاوزه ترد علي شكوي عميل وتتجاهل محادثته وده الي حاولت اعمله مع صفحة فودافون.