القائمة الرئيسية

الصفحات

تعب وبهدلة في منيا القمح وبنها والدائري والعاشر(يوم ام مصرية)

مش قادره استحمل التعب الي مريت بيه انهارده ،بالرغم ان ابني كان بياخد نفس المشوار لمده سنتين ولا اشتكي وعرفت انهارده اد ايه هوا كان بيتبهدل في المواصلات بالساعات وكل ما يطلب مننا انه يسكن في السكن الجامعي في العاشر في بدايه كل ترم فنقوله انا ووالده لا فيسكت مغلوب علي امره هيعمل ايه معانا ، وطلع اننا الغلطانين في حقه. 


خرجت من قريه اسمها اسطنها (احدي القري المجاورة لمدينه بنها) وركبت لبنها ورايحه لبني الي ساكن السنادي في سكن هندسة العاشر هو بقاله اسبوعين منزلش علشان وراه امتحانات ميدترم فقلت لنفسي اروح اطمن عليه ،وكان معايا حاجات تقيله (شنطة فيها اكل وبطانيه علشان الشتاء)

اول البهدله حصلت في موقف بنها متعدد الطوابق طلعت بالشنط الدور التاني وبسأل علي عربيات موقف العاشر فسواق رد عليا وقلي ده الموقف الجديد اتنقل ياامي لموقف السلام الجديد والعربيات وقفه هناك اه ، روحت للعربيه لاقيت ناقصها مكان واحد ورا وليس مكانين ، فسألت السواق علي العربيه الي عليها الدور ، فشورلي علي العربيه الي جنبه وقلي دي الي عليها الدور فركبت والعربيه طلعت ومشيت من علي الطريق الجديد وبعدين من طريق اول مره اشوفه وبعدين بيلموا الاجرة وطلعت 4 جنيه فقط يعني الكرسيين 8 جنيهوانا ابني كان قيلي في حدود 10 جنيه .

في البدايه شكيت اني ركبت غلطت وان السواق ربنا يسامحه قلي اركبي غلط ، بس قلت اتاكد وسألت السواق يحج هوا انت مش مكمل للسلام ولا اخرك الدائري وبعدين قلي والي في العربيه سلام ايه!! ،انتي ركبتي غلط دي عربيه منيا القمح قلتلهم تب نزلني علي جنب رد وقلي احنا قربنا من موقف منيا القمح ومن هناك اركبي عربية مصر .

وصلت موقف منيا القمح وبسأل علي عربيات السلام فقلولي ان مفيش عربيات سلام وان العربيات الي ممكن اركبها ، لاركب لبنها تاني لقما اركب عربيه مصر وانزل الدائري ومن هناك اركب اتوبيس العاشر. 

تعب وبهدلة في منيا القمح وبنها والدائري والعاشر(يوم ام مصرية)

ركبت عربيه مصر والكرسي 12.5 فدفعت 25 جنيه وامري لله وبعدين نزلت دائري وكان الاتوبيس الي طالع زحمه والناس عماله تتدافع علي الي يلحق كرسي او مكان في الاتوبيس وانا معايا الشنط ومتبهدله اخر بهدله لغيت مركبت ومكنش فيه كراسي فاضيه ، فطالب كتر خيره قام من علي كرسيه ووقف هوا وانا قعدت ، ونزلت انا وهو عند نزلت سلم السلام وشال معايا شنطة ودلني علي عربيات العاشر من رمضان الي كانت قريبه من مكان ما بيركب لمدينة الشروق ، ربنا يباركله ده كان مشوار كبير

ركبت عربيه العاشر من رمضان ووصلت موقف اردنيه ومن هناك مش فاكره ركبت عربيه اسمها مجاورة تقريبا 11 هو انا قولت للسواق نزلني عند سكن طلاب معهد تكنولوجي الي هو العاشر ونزلنا وداخله الامن بيقولي داخله لمين قوتله داخله لابني وقلتله رن علي نمرة ابني الحمد لله اني كنت حافظها اصل الموبيل كان مخلص شحن ولا عارفه اعمل حاجه من غيره تمرمط اخر مرمطه وابني جيه ودخلت معاه للغرفه بتاعته ومكنش لسه فطر وكانت الساعه 11 ونص وانا كنت خارجه من 6 ونصف وعملت فطار وقعدت معاه شويه واستريحت من المشوار

تعليقات