القائمة الرئيسية

الصفحات

كيف احصل على 99 فى الثانوية العامة واهم النصائح لطلاب الثانوية العامة علمي رياضة لدخول هندسة

فروع الرياضة فى علمى رياضة بريمو هندسة


كيف احصل على 99 فى الثانوية العامة، هنتكلم عن اهم نصائح لطلاب الثانوية العامة علمي رياضة ،في البداية هتتعرف علي كيفية دخول كلية الهندسة واهم المشاكل الي ممكن تقابل الطالب خلال السنة، وهنذكر قصة نجاح لطالب في الثانوية العامة دخل هندسة بعد ما أصيب بالاكتئاب  وهنتناول منهج علمى رياضة وعدد ساعات النوم وعدد ساعات المزاكرة الضرورية لطالب الثانوية العامة ، وهتعمل ايه خلال اخر شهر وشهرين في الثانوية العامة وافضل جدول انهاء منهج الثانوية لذلك.

ازاى تجيب مجموع هندسة من علمى رياضة

اولا نبدا باهم مادة وهي رياضة 2، امتحانات رياضة 2 في الثانوية العامة المصرية مبتخرجش عن 3 حاجات
  1. كتاب المدرسة
  2. كتاب دليل التقويم
  3. امتحانات السنين الي فاتت
ونفس الاسئلة بتتكرر كل سنة والامتحان مستويات وبيكون سؤال جديد كل سنة وبيكون عليه 4 درجات ولو محلتهوش مفيش مشكلة، اهم حاجة ثقتك بنفسك انك هتدخل هندسة

مشكلة علمي رياضة مع رياضة 2


الامتحان مشكلته في وقته، مش في صعوبته ، ولو مش مزاكر مش هتعرف تحل ، كل الاسئلة بتيجي من الاسئلة الي بتحلها بالنص من كتاب المعاصر(بيكون مجمع كل اسئلة كتاب الوزارة+دليل التقويم+الامتحانات السابقة)، يكفي انك تزاكر المعاصر وكتاب البوكليت بتاعه وهتجيب ال120 في الرياضة

اول مرة هتحل المسألة ممكن تاخد نصف ساعة او حتي ساعة بالكتير فمن طبيعي أن حل المسألة ياخد وقت ، تاني مرة هتحل المسالة بعد اسبوع هتاخد منك ربع ساعة وتحلها من نفس الكتاب وبنفس الارقام، ومذاكرة الرياضة بكثرة الحل هتلاقي المسائل بتخلص معاك زي الصاروخ وفي امتحان اخر السنه هتخلص الامتحان في ساعة لو مذاكر كويس علشان هيكون من كل الاسئلة الي حليتها

والي بيحل كتير وبيتعب هيلاقي نفسه حافظ الامتحان من كثرة تكرار حل الاسئلة وربنا بيوفقه

قصص نجاح في الثانوية العامة علمي رياضة 

لو انا قدرت اني اخلص فروع الرياضة كاملة في شهرين ومذاكرة مع نفسي ،فأنت تقدر، والله العظيم اول ما يكون عندك دافع انك تزاكر هتذاكر وهتنجز و هتخلص ومش هتحط في دماغك غير المذاكرة ، انا كنت علمي علوم وحولت علمي وقررت اني احول علمي رياضة في نهاية شهر 12 بعد ما كان اهلي عاوزيني اكمل علمى علوم،

 بالرغم اني كنت خلصت أحياء وجيولوجيا الا اني مكنتش مقتنع بالطب وراغب الهندسة ، بعد ما حولت علمي رياضة لاقيت كل المدرسين بتهزئني وتشتمني اني هدمر نفسي وهدمر مستقبلي واني مش هعرف ادخل اي حاجة، ومفيش حد راضي يساعدني او يديني درس وفكرني طالب فاشل

بس انا اثبتلهم اني  استحق احترامهم ليا ودخلت هندسة بتعبي وتوفيق ربنا الي وقف جنبي وانقذني بعد ما كنت مكتئب في شهر 1 ومعرفتش ازاكر فيه وكنت فقدت الثقة في نفسي

عدد ساعات النوم لطلاب الثانوية العامة


أفضل وقت للنوم في الثانوية العامة هو بليل من الساعة 10 حتي الساعة 4 ونصف (يعني لغية الفجر) ، وعدد ساعات النوم المفروض تكون بين 5:7 ساعات متواصلين وبليل  انا جربت اني ازاكر بالنهار وانام بليل  واني ازاكر بالليل وانام وقت الظهر ، وافضل وقت كنت بحقق فيه انجاز فعليا وقت ما كنت بنام لغية الفجر

وايضا كل واحد له ظروف معينه ممكن يختار وقت غير التاني، جرب بنفسك.

عدد ساعات المذاكرة لطلاب الثانوية العامة


عدد ساعات اليوم في الثانوية العامة المفروض لا تقل عن 6 ساعات ، يعني كل يوم هتذاكر 3 مواد وتظبط نفسك طول السنة ان كل يوم تزاكر 3 مواد مختلفين وتخلي الجمعة انك تراجع على مذاكرة الأسبوع كله.

وافضل وقت للمزاكرة بعد الفجر يعني لو زاكرت من الساعة 4 للساعة 9ص ،فأنت كده ذاكرت 5 ساعات وهيكون يومك كبير وهتنجز وتزاكر فيه ، ومتحطش في دماغك انك هتنام شويه بنهار علشان تصحي تزاكر ، ممكن تنام لو تعبان شويه.

فروع الرياضة فى علمى رياضة

يتسال الكثير من الطلاب عن فروع رياضة 3 ثانوي قبل دخول 3 ثانوي وهم كالاتي
  • رياضة 1: هتدرس فيها فرع التفاضل والتكامل وفرع الجبر والهندسة الفراغية 
  • رياضة 2: هتدرس فيها فرعي الاستاتيكا وفرع الديناميكا
واهم كتاب خارجي يغطي كل فروع رياضة 3 ثانوى كشرح وامتحانات هيكون المعاصر ، وهيكون عبارة عن 4 كتب لكل فرع كتابين وفي اخر السنة بتمتحن للرياضة 4 امتحانات ، وكل امتحان من 30 درجة وبكده يكون منهج الرياضيات للصف الثالث الثانوى 2018 من 120 درجة من المجموع الكلي في ثانوية عامة
  • امتحان التفاضل والتكامل 
  • امتحان الجبر والهندسة الفراغية 
  • امتحان الاستاتيكا
  • امتحان الديناميكا

مواد علمى رياضة 3 ثانوى

مواد علمى رياضة 3 ثانوى
مواد علمي رياضة 3 ثانوي

منهج علمى رياضة للطلاب المقبلين علي ثالثة ثانوي عبارة عن 6 مواد تضاف للمجموع وهم
  1. عربي عبارة عن قصة وقراءة ونصوص وادب وبلاغة ونحووتعبير
  2. رياضيات عبارة عن رياضة 1 و2
  3. انجليزي
  4. فيزياء
  5. كيمياء
  6. فرنساوي

مواد علمى علوم 3 ثانوى


مواد الصف الثالث الثانوى علمى علوم 2018 نفس مواد علم رياضة مع استبدال الرياضة بفرعيها بالاحياء والجيولوجيا، وبذلك تكون مواد علمى علوم 2018 او 2019 التي تضاف للمجموع

  1. عربي عبارة عن قصة وقراءة ونصوص وادب وبلاغة ونحو وتعبير
  2. احياء
  3. جيولوجيا
  4. انجليزي 18 unit و قصة
  5. فيزياء
  6. كيمياء
  7. فرنساوي او اسباني او الماني حسب اختيارك ومدرستك

و3 مواد لا تضاف للمجموع في الثانوية العامة، يذاكرهم الطالب في اخر السنة او اجازة 2 ثانوية او كل جمعة لمدة ساعة مثلا
  1. احصاء وإقتصاد: مهمة جدا خصوصا لو دخلت هندسة او تجارة ، هتقابلك نفس مادة ثانوي ولكن بالانجليزي ، وانا في كلية الهندسة رجعت زاكرت الاحصاء بتاع ثانوي ، علشان كانت في الكلية نفسها ولكن بالانجليزي
  2. تربية وطنية : معلوماتها كلها جميلة وبتزود الحصيلة اللغوية والمعرفة العامة بالوطن سياسيا ومعرفة اهم الحقوق والواجبات 
  3. دين: الحاجة الوحيدة الي هتشفعلك يوم القيامة ، ده سبب كافي انك تزاكر الدين حتي ولو مش مادة مجموع

ناس ذاكرت في اخر شهر ودخلت طب فيسبوك

بنلاقي بوستات علي الفيس وفيديوهات علي اليوتيوب  ان فيه ناس زاكرت في آخر شهر ودخلت طب وهندسة ، الكلام ده صحيح وانا كنت واحد من الناس دي الي خلص الرياضة في شهر، بس وقتها كان عندي الارادة اني انجح واعدي السنه بعد ما كل الي حوليا فاكرني اني هعيد السنة ، وبالرغم من ذلك تفوقت ودخلت الهندسة وفرحت بتعبي في الاخر

اخر شهرين فى الثانوية العامة


هتركز علي الامتحانات وهتكون اهم حاجة انك تخلص كتاب مراجعة في كل مادة خلال الشهرين وتفتش المنهج وتكون مستعد لامتحانات اخر السنة في الثانوية العامة، ولو فيه دروس انت محلتهاش في كتب الشرح حلها في كتب المراجعة ومع كتر حل الاسئلة هتكون تمام في كل المواد ، الخلاصة في اخر شهرين في الثانوية العامة انك تحل امتحانات كتير

افضل جدول انهاء منهج الثانوية العامة في شهر

فيه جداول كتيرعلي النت ، بس علشان تعمل بالجدول ده ، فانت لازم تكون مخلص منهجك الاول في كل المواد ، وتعمل مراجعه سريعة علي المنهج وتحل، ووضع الجدول بيختلف من طالب لاخر والافضل انك تضع لنفسك جدولك وتهتم بمذاكرة الدروس.

وابتعد عن الحشو في الجدول علشان مش هتعمل اي حاجة، يعني لو انت عملت جدول فاعمل مزاكرة ساعتين وراحة ربع او نصف ساعة ، او تزاكر الساعتين في البيت وانت رايح الدرس تضحك وتهزر مع زمايلك كراحة وتغيير جو، بس ترجع البيت اذاكر صح 

خلي جدولك واقعي ، ثبت معاد للنوم ومعاد للدروس ثم بعد ذلك شوف الوقت الفاضي ايه وتعمل جدولك علي اساسه والمفروض تعمل لنفسك كم من مواد المذاكرة تخلصه يوميا، يعني مثلا انا بكره هذاكر درس قراءة في العربي كذا وحل درس في رياضة2 كذا وهذاكر unit في الانجليزي كذا ، والمفروض تذاكرهم وتخلصهم قبل ماتنام

كيف احصل على 99 فى الثانوية العامة


99% في الثانوية ممكن تحققها، ان كانت كل الشروط متوافرة زي عندك الارادة ومستعد تزاكر علشان تحقق هدفك، مظبط دروسك ومزاكرتك ، البيت عندك مفيش اي مشاكل ، وقتها كل الي هتعمله انك تزاكر وتجتهد وتحل كل درس في كتابين علي الاقل وتكرر مزاكرتك وحلك للدروس طول السنة، وتهتم بالعربي والانجليزي والفيزياء وتحتلهم وقت زيادة للمزاكرة لو فيه عندك اي نقص فيهم ، وقل ما تبدا مزاكرة بدري هتستريح 

خلص النحو قبل ما تبدا مزاكرة او دروس الثانوية العام في اجازة 2 ثانوية هتفرق معاك

اكون واقعي معاك ان حصولك علي 99 في الثانوية هيكون مزاكرة ومجهود واهم حاجة توفيق ربنا، ركز علي حلمك وثق بنفسك وهتحققه

شهر أكتوبر محاسبة النفس علي التقصير وعمل خطة في الثانوية العامة 

اليوم 30-9-2018 يكون خلص شهر 9 ومن قبله شهر 8 . شهرين مروا علينا مرور الكرام هل انجزت فيهم الي مطلوب منك وعملت لنفسك جدول تقريبي لكل ماده هتخلصها امتي ولا سايب نفسك للدروس ،المدرس يشرح درس وانت تروح حافظه ومزاكره  وخلاص ولا بتعمل اكثر من كده ؟

عملت ايه في الشهرين دول  ؟
ذكرت كام درس قراءة ونص وادب او قصة في العربي؟
ولا انت في الوحدة الكام في الانجليزي ؟
وهل خلصت حتي الحث المتبادل في الفيزيا ولا لسه؟

واخيرا كل شهر لازم تحاسب نفسك وتعمل لنفسك تقييم علي الشهر الماضي وتعمل حلول ومقترحات للشهر الجديد، علشان متقعش في نفس المشكلة، وعادي جدا لو فيه شهر محققتش فيه الي كنت عاوزه في الشهر الجديد باذن الله هتحقق الي نفسك فيه

ازاي تبدأ مذاكرة من شهر يناير وتجيب مجموع كبير( ثانوية عامة)


لكل شخص لسه بادئ دراسة أو مبدأش بشكل كويس منذ بداية العام،الفرصة معك كاملة أنك تحقق هدفك وتجيب مجموع كبير وتدخل هندسة وطب كمان، كل ما عليك فعله هو اتخاذ قرارك والبدء في الدراسة من الآن وسوف تصل إلى هدفك إن شاء الله وانت مش متأخر ولا حاجه وخلي عندك اصرار وثقة في نفسك شوية ومتحسبش اي حاجه تانية.

الكلام ده فعلا حقيقي وحصل معايا انا دخلت هندسة بعد ما حولت من علم علوم لعلم رياضة وكل الي حولي اقنعني اني مش هجيب مجموع وكده بضر نفسي، بس انا كنت قد المسئولية ودخلت هندسة وكمان مزاكر الرياضة في البيت ومن اليوتيوب ، اهم حاجه الثقة في نفسك ومتضيعش وقت في التفكير الزائد وفكر علي ورق ونظم دماغك وابدأ مزاكرة



اعدت الصف الثالث ثانوي ثلاث مرات لاحقق حلمي


ان شاء الله تحقق حلمك حبيبي، والخيرة فيما اختاره الله لك اعمل الي عليك ومتشغلش نفسك باي حاجه تانية ولا ناس ولا مجتمع متحتش رأي حد فيك، انت الي بتدرس وانت الي بتتعلم وانت الي هتشتغل واي حاجه بتعملها ان كانت ليها قيمة عاليه فهتشرفك انت واهلك وكل الي حواليك هيفخروا بيك
ومتحتش في دماغك موضوع ثانويه اكثر من اللزوم زاكر وخلص الثانوية وشوف مرحلة جديدة، وانت المسئول الوحيد عن اي قرار هتعمله وسامحني لو قلتلك انك مكبر موضوع ثانوية ان كان حلمك في طب او هندسة فقط فالموضوع مش هيتحل الا بمزاكرة ومش خيالية زي ما متخيل بل فقط كام ساعة طول السنة بدون تشتيت ذهني او بدني

تعليقات

8 تعليقات
إرسال تعليق
  1. انا داخله تالته ثانوي ان شاء الله ٢٠٢١ بس انا المشكله عندي اني معنديش حلم يعني مش حابه ادخل كليه معينه انا الحمد الله حلو في الرياضه والاحياء زي بعض واهلي بيقوليلي خشي علمي علوم وانا بردو كنت ناويه ادخل علمي علوم بس بعد الامتحان لقيت نفسي بفكر في علمي رياضه شيء الاهي كده صليت استخاره ٣ مرات والله وكل مره احلم بحاجه مختلفه تدل اني دخلت علمي رياضه مش عارفه اعمل اي بقا وخايفه ادخل وميجيبش هندسه واهلي يحملوني اللوم ياريت لو حد يفيدني

    ردحذف
  2. انا خايفه جدآ جدآ

    ردحذف
  3. طيب انا عايزة اذاكر كيميا وفيزيا اخد فيهم دروس برة ولا اعتمد ع اليوتيوب بس ؟مع العلم فى ناس كتير بتشرح وبتعمل امتحانات وواجبات واسئلة فروح دروس ولا اعتمد ع اليوتيوب وافور الفلوس للباقة بتاعة النت وكمان محملش اهلى مصاريف كتير +انا علمى علوم +انا حجزت عربى وانجليزى وعايزة احجز فرنساوى عشان المواد دول المدرسين ع النت عاملين بس ب اشتراك وانا مش هقدر ادفع وانا مش ضامنة الباقة تفضل معايا ولا بسببها تضيع عليا حصص +الفيزيا لو اعتمد ع شرح مستر محمد عبد المعبود اقدر اجيب فيها درجة حلوة ؟ والجيولوجيا والاحياء الحمد الله ماشية فيهم يعتبر كويس مع مستر ربنا يكرمه مش بيسبنا ثانية ومن غير مقابل فأرجو الرد

    ردحذف
  4. بصي انا داخله ٣ث دفعة 2021 مش ناويه أخد دروس فى كل المواد ماعدا فى انجلش عشان مستوايا مش اووي فيه وهذاكر من يوتيوب ونفسي وهدفي ادخل كلية طب بشري ممكن اعرف اسماء مدرسين شرحهم حلو ع يوتيوب كمان عايزة اعرف فيه احتمال اجيب طب بشري وفرح أهلي وحقق هدفي ولا احتمال ضعيف عشان فى ناس كتير بتقولي من غير دروس مش هتقدري تجيبي مجموعة عالي مهما ذاكرتي وبصراحة ظروفنا متلخبطة شويه مش هقدر اخد دروس .

    ردحذف
    الردود
    1. انت زي كده برضو بس ظروفي الحمد لله بذاكر على اليوتيوب أحسن بكتير من الدروس الخصوصية

      حذف
  5. يا جماعه انا زيكم عايزه ابطل دروس بس خايفه

    ردحذف
  6. انا مش عارفه اعمل اي بصراحه ومش عايزه اخد دروس خصوصي ممكن تقوليلي اي احسن مدرسين جولوجيا الانجليزي

    ردحذف

إرسال تعليق