القائمة الرئيسية

الصفحات






ازاى اختار تخصصى فى علم النفس ؟ وازاى اقدر اطور من نفسى فى المجال ؟ وايه نوع الدورات التدريبيه اللى اخودها ؟


ازاى اختار تخصصى فى علم النفس ؟
وازاى اقدر اطور من نفسى فى المجال ؟
وايه نوع الدورات التدريبيه اللى اخودها ؟

اﻻسئله دى اتكررت عليا كتير جدا وان شاء الله اقدر افيدكو بكل حاجة ...
مبدئيا فى اربع سنوات الليسانس هتاخود كل مواضيع علم النفس من اول اصول علم النفس لحد اﻻمراض واﻻضطرابات وتشخيصها وعﻻجها .
عندنا فى علم النفس مجاﻻت مختلفه ..
ادمان او نفسى او اطفال .
 طول مانت بتدرس هتدرس مواضيع تخص المجاﻻت دى ﻻنها اﻻكثر انتشارا .

حبيت اثناء دراستك مجال اﻻطفال :-

( يبقى هتتجة لكورسات التدريب زى كورسات التخاطب ودى اﻻكثر انتشارا ،وكورسات التوحد ،وتعديل السلوك ، تنميه المهارات ،كورسات فى اضطراب فرط الحركة وتشتت اﻻنتباه واضطراب العناد والتحدى ).
 دى هتﻻقيها فى جامعتك بتتعمل بشكل دورى ،او فى مراكز نفسيه او دبلومة تربيه خاصه بعد الليسانس ، او فى اﻻمانه العامة للصحة النفسيه بمستشفى العباسيه دورة تدريب لمجال اﻻطفال لمدة 6 شهور بحوالى 600 جنيه تقريبا .

تانى حاجة حبيت مجال اﻻدمان اثناء دراستك :-

(يبقى هتخلص الليسانس وتاخود دورة تدريب اﻻدمان بردة فى اﻻمانه العامة ولمدة 6 شهور وبنفس السعر السابق وهيدربك على برنامج الNA وازاى تستخدمة فى مجال العمل ).

تالت حاجة حبيت المجال النفسى :-

(عشان تكون اخصائى نفسى اكلينيكى يعنى فى تخصص اﻻمراض النفسيه وعﻻجها وتطبيق اﻻختبارات النفسيه والتشخيص من خﻻلها)
ﻻزم تنمى نفسك فى كذا حاجة .....
-ﻻزم تهتم بكل انواع اﻻختبارات النفسيه اﻻسقاطيه زى الTAT و اختبار H.T.p واختبار الروشاخ وغيرها من اﻻختبارات اﻻسقاطيه ، وايضا اﻻختبارات الموضوعيه واهمها اختبار Mmpi .

-ﻻزم كمان تهتم باختبارات الذكاء جدااا وخصوصا بينيه الصورة الرابعه والخامسه . وﻻزم تكون واخد كورس فى الصورة الخامسه ﻻنه اساس الشغل .
-اهتم جدا بكل انواع التدريب العملى اللى بتاخدة فى اثناء دراستك زى تدريب المستشفيات او تدريب مراكز اﻻعاقه وذوى اﻻحتياجات الخاصه .
-حاول على قد ماتقدر تاخود كورسات فى اﻻمراض النفسيه وعﻻجها واغلبها بيعملها دكتور محمد نجيب الصبوة فى جمعيه المعالجين النفسيين بالهرم .

-وبعد الليسانس قدامك طريقين عشان تكون اخصائى نفسى اكلينيكى ياتاخود دبلومة اكلينيكى من جامعتك ودى مدتها سنتين ، ياتقدم بردة على تدريب فى التخصص النفسى لمدة 6 شهور فى اﻻمانه العامة للصحة النفسيه بالعباسيه .

طيب اللى عاوز يكمل طريق الدراسات العليا ؟

-ييخلص الليسانس وبيقدم على تمهيدى ماجيستير وبعد اجتيازة بنجاح بيقوم باختيار موضوع الرساله التى يريد اجتيازها واذا تم الموافقه عليها بتبدى التطبيق العملى لمدة ﻻ تقل عن سنه كحد ادنى وﻻ تزيد عن 5 سنين كحد اقصى .
-بعدها يتم عمل تمهيدى دكتوراة وبعدها اختيار موضوع رساله الدكتوراة بنفس الخطوة السابقه .

طب انا مش عاوز كل دة وعاوز اشتغل مدرس علم نفس ؟!

-حضرتك بعد الليسانس بتاعك وﻻزم تقدير جيد بتقدم فى كليه تربيه جامعه عين شمس (معرفش جامعه تانيه ) على دبلومة تربوى لمدة سنه وبعدها تقدر تشتغل مدرس فى اى مدرسه .

طب عاوز ابقى ظابط متخصص علم نفس ؟!

-بتخلص الليسانس بتاعك بردة بتقدير جيد كحد ادنى وبتنتظر اعﻻن قبول دفعات جديدة للكليه الحربيه ، ولو كان مطلوب فى اﻻعﻻن مطلوب ذكور او اناث او اﻻتنين من خريجى علم النفس بتروح فى الميعاد المعلن عنه وبتسحب ملف التقديم ،اﻻعﻻن بيظهر فى شهر 11 كل سنه على التليفزيون وفى موقع الكليه الحربيه بس خلى بالك بيبقى مسموح ليك التقديم لمدة سنتين بس بعد التخرج .
يارب اكون قدرت افيدكو فى كل حاجة ...
شير عشان غيرك يستفاد 

تعليقات

تعليقان (2)
إرسال تعليق
  1. طب أنا خريجه أداب أثار ينفع أعمل دبلومه تربوي ف علم النفس وبعد ماأخلصها ينفع أقدم ظابط متخصص

    ردحذف
  2. لو دخلت مجال الاطفال عشان اكون اخصائية تخاطب بياخد قد ايه كام سنه يعني🤔

    ردحذف

إرسال تعليق